ភ្នំពេញ ៖ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានធ្វើការព្រមានទៅលើមន្ត្រីមួយចំនួនដែលធ្វើការតែងតាំងមន្ត្រី ដោយផ្អែកទៅលើមនោសញ្ចេតនា និងបក្ខពួក ក្រុមគ្រួសារ សាច់ញាតិរបស់ខ្លួន ដែលបញ្ហានេះធ្វើឲ្យមន្ត្រីខ្លះដែលគ្មានសមត្ថភាព គ្មានលក្ខណៈសម្បត្តិ ក៏ត្រូវទទួលតំណែងដោយមិនសមរម្យ។
រដ្ឋមន្ត្រីក្រសួងមហាផ្ទៃថ្លែងបែបនេះនៅក្នុងពិធីផ្ទេរមុខតំណែងអគ្គនាយក អគ្គនាយករង ប្រធាននាយកដ្ឋាន ចំណុះអគ្គនាយកដ្ឋានរដ្ឋបាលនៃក្រសួងមហាផ្ទៃកាលពីព្រឹកថ្ងៃទី៩ ខែកុម្ភៈ ឆ្នាំ២០១៥ នៅទីស្ដីការក្រសួងមហាផ្ទៃ។ លោកបញ្ជាក់ថា "ការតែងតាំងមនុស្ស ត្រូវឈរលើសច្ចៈធម៌ពិតប្រាកដ ធ្វើបានឬមិនបាន ជៀសវាងការរើសបក្ខពួក ដែលធ្វើឲ្យមន្ត្រីដែលល្អមានសមត្ថភាពគេមិនសប្បាយចិត្ត មិនខំធ្វើការ ធ្វើឲ្យប៉ះពាល់ដល់កិច្ចការរួម"។ លោកបន្តថា ក្រសួងមហាផ្ទៃហាក់ដូចជាបានជៀសផុតស្ទើរទាំងស្រុងនូវបញ្ហានេះ តែវាអាចមាននៅថ្នាក់ក្រោមខ្លះ អគ្គនាយកដ្ឋានខ្លះ ប៉ុន្តែនៅក្នុងក្របខណ្ឌក្រសួង គឺយើងបានរៀបចំបញ្ហានេះ។
តាមលោកឧបនាយករដ្ឋមន្ត្រីបញ្ជាក់ថា "នេះគឺជាចំណុចល្អណាស់ មិនមែនថា យើងចង្អៀតចង្អល់ចំពោះកូនមន្ត្រីដែលមានសមត្ថភាពល្អនោះទេ គឺយើងខិតខំលើកទឹកចិត្តដែរ ប៉ុន្តែយើងជៀសវាងថា កូនមន្ត្រីដែរ ប៉ុន្តែសមត្ថភាពអន់ គ្មានបទពិសោធន៍ ឬក៏ការសិក្សារៀនសូត្រមិនបានជ្រោះជ្រះ ឬក៏លក្ខណៈសម្បត្តិមិនគ្រប់គ្រាន់ ហើយចេះតែយកមកតែងតាំងក៏មិនបានដែរ ពីព្រោះយើងទាំងអស់គ្នាត្រូវទទួលខុសត្រូវចំពោះជោគវាសនារបស់ប្រទេសជាតិ មិនមែនទទួលខុសត្រូវចំពោះក្រុមគ្រួសារមួយទេ ទទួលខុសត្រូវចំពោះសង្គមទាំងមូល អីចឹងហើយត្រូវឈរលើទស្សនបែបនេះ ដើម្បីយើងរៀបចំមន្ត្រីរបស់យើងឲ្យបានសមស្រប" ទាក់ទងការដាក់មន្ត្រី ដែលដល់អាយុចូលនិវត្តន៍ លោកឧបនាយករដ្ឋមន្ត្រីបានអះអាងថា ក្រសួងមហាផ្ទៃមិនបានបោះបង់ចោលមន្ត្រី ដែលចូលនិវត្តន៍នោះទេ គឺដោយសារតែសុខភាព សមត្ថភាព និងលទ្ធភាពនៅមាន គឺក្រសួងមហាផ្ទៃប្រមែប្រមូលមន្ត្រីទាំងនោះមកឲ្យជួយការងារផ្សេងៗ ដែលអាចធ្វើទៅបាន ឬក៏អាចតែងតាំងជាអនុរដ្ឋលេខាធិការជាដើម ជាតំណែងនយោបាយ ហើយនៅពេលខាងមុខនេះ ក្រសួងមហាផ្ទៃនឹងពិនិត្យមើលលទ្ធភាពដើម្បីធ្វើការស្នើតែងតាំងតំណែងចំពោះមន្ត្រីចូលនិវត្តន៍មួយចំនួនដែលមានបទពិសោធន៍ល្អៗ មានបទពិសោធន៍ច្រើន ដែលអាចជួយកិច្ចការងាររបស់ក្រសួង និងរាជរដ្ឋាភិបាលបាន។ ថ្លែងទាក់ទងទៅនឹងបញ្ហាការបោកប្រាស់ តាមរយៈការដើរតួជាមីក្រូហិរញ្ញវត្ថុនោះ លោកឧបនាយករដ្ឋមន្ត្រីបានអះអាងថា នឹងបង្កើតក្រុមការងារចំនួន២ដើម្បីចាត់វិធានការចំពោះក្រុមមនុស្សដែលយកឈ្មោះមីក្រូហិរញ្ញវត្ថុទៅបោកប្រាស់ប្រជាពលរដ្ឋតាមរយៈឲ្យខ្ចីប្រាក់ ហើយយកការប្រាក់ខ្ពស់ដែលបញ្ជាក់ថា នេះមិនមែនជាការកាត់បន្ថយភាពក្រីក្រទេ តែវានឹងបង្កើនភាពក្រីក្រទៅវិញ។ លោកឧបនាយករដ្ឋមន្ត្រីបញ្ជាក់ថា នៅខេត្តបាត់ដំបងប្រជាជនដែលបានខ្ចីលុយតាមរយៈមីក្រូហិរញ្ញវត្ថុមានដល់២៨៣លានដុល្លារ ហើយបើតាមការបូកសរុបប្រជាពលរដ្ឋខ្ចីលុយតាមមីក្រូហិរញ្ញវត្ថុទូទាំងប្រទេសកម្ពុជាមានរហូតទៅដល់៣.៥០០លានដុល្លារ ហើយក្នុងចំណោមមីក្រូហិរញ្ញវត្ថុ ដែលឲ្យប្រជាពលរដ្ឋខ្ចីលុយនេះ មានខ្លះបានចុះបញ្ជីត្រឹមត្រូវ តែខ្លះអត់បានចុះបញ្ជីត្រឹមត្រូវ។ លោកឧបនាយករដ្ឋមន្ត្រីបានលើកឡើងថា កាលពីប៉ុន្មានថ្ងៃមុខក្រសួងសេដ្ឋកិច្ច និងហិរញ្ញវត្ថុបានចេញសេចក្តីប្រកាសថ្កោលទោសចំពោះអ្នកខ្លះដែលយកឈ្មោះអង្គការក្រៅរដ្ឋាភិបាល និងមីក្រូហិរញ្ញវត្ថុដើម្បីយកលុយឲ្យប្រជាពលរដ្ឋខ្ចី។ លោកបានបញ្ជាក់ថា "ពីព្រោះអាហ្នឹងដូចជាកន្លែងប្រចាំ មិនមែនក្នុងបំណងដើម្បីទៅជួយកាត់បន្ថយភាពក្រីក្រប្រជាពលរដ្ឋទេ គឺយកការខ្ពស់ ហើយត្រូវយកប្លង់ដី ប្លង់ផ្ទះទៅបញ្ចាំ។ កាលណាបើគាត់រកលុយទៅបង់មិនបានទេ គឺផ្លូវតែម្យ៉ាងទេ គេរឹបអូសយកដី និងផ្ទះ ឬមួយក៏គាត់ទៅធ្វើការនៅស្រុកក្រៅដើម្បីយកលុយទៅសងគេ"។
លោកឧបនាយករដ្ឋមន្ត្រីបានបញ្ជាក់ដែរថា បញ្ហានេះជាកម្មវត្ថុមួយ ដែលរាជរដ្ឋាភិបាលត្រូវគិត និងធ្វើការសិក្សាអំពីបញ្ហានេះ ហើយលោកបានបញ្ជាក់ថា បានបង្កើតក្រុមចំនួនពីរ គឺមួយក្រុមក្រសួងមហាផ្ទៃជាអ្នកទទួលខុសត្រូវ មានវិធានការចំពោះមីក្រូហិរញ្ញវត្ថុណា ដែលធ្វើសកម្មភាពដោយមិនបានចុះបញ្ជី ហើយក្រុមមួយទៀតក្រសួងសេដ្ឋកិច្ច និងហិរញ្ញវត្ថុ និងធនាគារជាតិជាអ្នកទទួលខុសត្រូវ៕
កោះកែវ
0 Comments