ភ្នំពេញ ៖ បុរសពីរនាក់ជិះម៉ូតូពីផ្សេងគ្នា ខណៈពេលជិះម៉ូតូកៀរដៃចង្កូតគ្នាក៏រេចង្កូតទៅបុកជាមួយតួរថយន្តកុងតឺន័រផ្នែកខាងក្រោយ បណ្ដាលឲ្យភាគីម៉ូតូទាំងពីរនាក់ត្រូវដួលម៉ូតូទាំងអស់គ្នាសន្លប់ឈឹងទាំងពីរនាក់ តែសំណាងល្អដែរដោយសារពេលនោះមនុស្សមិនខ្ទាតចូលកង់រថយន្ត បែរជាខ្ទាតចេញមកខាងក្រៅវិញ ធ្វើឲ្យជនរងគ្រោះទាំងពីរនាក់គ្រាន់តែសន្លប់ធំប៉ុណ្ណោះ។
ហេតុការណ៍នេះបានកើតឡើងកាលពីវេលាម៉ោង៣និង២០នាទីទៀបភ្លឺ ព្រឹកថ្ងៃទី២៦ ខែកុម្ភៈឆ្នាំ២០១៥ នៅតាមបណ្ដោយផ្លូវជាតិលេខ៤ ត្រង់ចំណុចមុខសាលាសង្កាត់ចោមចៅ ខណ្ឌពោធិ៍សែនជ័យ។ ជនរងគ្រោះទាំងពីរនាក់មិនត្រូវបានគេស្គាល់ឈ្មោះទេ ដោយជនរងគ្រោះត្រូវសន្លប់ទាំងអស់គ្នាមិនអាចសួរនាំដឹងនោះទេ គ្រាន់តែដឹងថាជនរងគ្រោះម្នាក់ជិះម៉ូតូម៉ាកវីវ៉ាពណ៌ខ្មៅ ពាក់ស្លាកលេខភ្នំពេញ1AN 8689 និងជនរងគ្រោះម្នាក់ទៀតជិះម៉ូតូសណ្ដោងរ៉ឺម៉ក ដែលម៉ូតូរបស់គាត់ពាក់ស្លាកលេខខ១៨៣៩ភព១។ រថយន្តកុងតឺន័រ ដែលត្រូវម៉ូតូបុកនោះពណ៌ក្រហម ពាក់ស្លាកលេខភ្នំពេញ3B7589 អ្នកបើកបរបានរត់គេចខ្លួនបាត់ស្រមោល។
តាមប្រភពព័ត៌មានបានឲ្យដឹងថា មុនពេលកើតហេតុជនរងគ្រោះទាំងពីរនាក់ជិះម៉ូតូស្របទិសគ្នាពីលិចទៅកើតដោយម៉ូតូរ៉ឺម៉កបើកពីមុខម៉ូតូវីវ៉ា តែមកដល់ចំណុចកើតហេតុម៉ូតូម៉ាកវីវ៉ាបានបើកវ៉ាស្ដាំរ៉ឺម៉កនោះ ជាហេតុនាំឲ្យប៉ះដៃចង្កូតគ្នាជាមួយម៉ូតូសណ្ដោងរ៉ឺម៉កនោះ ហើយម៉ូតូរ៉ឺម៉កបានរេចង្កូតទៅបុកតួរថយន្តកុងតឺន័រផ្នែកខាងក្រោយ បណ្ដាលឲ្យអ្នកបើកបរដួលបែកមុខមាត់សន្លប់ឈឹង នៅពេលជាមួយគ្នានោះអ្នកបើកម៉ូតូវីវ៉ា ក៏បានដួលព្រមគ្នាដែរ តែមិនបានមកប៉ះជាមួយរថយន្តនោះទេ គឺដួលដោយសារខ្លួនឯងបើកវ៉ាគេប៉ះដៃចង្កូតគ្នាជាមួយរ៉ឺម៉កប៉ុណ្ណោះ តែជនរងគ្រោះរូបនេះក៏សន្លប់ឈឹងដូចគ្នាដែរ។
ក្រោយពេលកើតហេតុគេបានដឹកជនរងគ្រោះទៅកាន់គ្លីនិកឯកជននៅម្ដុំខណ្ឌទួលគោកដើម្បីជួយសង្គ្រោះហើយរថយន្ត និងម៉ូតូទាំងពីរគ្រឿង ត្រូវយកទៅរក្សាទុកនៅផ្នែកសណ្ដាប់ធ្នាប់ខណ្ឌពោធិ៍សេនជ័យរង់ចាំដោះស្រាយគ្នាជាក្រោយ៕
វិទូ
0 Comments