ភ្នំពេញ ៖ ចោរឆក់មិនរើសមុខម្នាក់បានត្រូវបានកម្លាំងនគរបាលប៉ុស្តិ៍ផ្សារកណ្ដាល១ឃាត់ខ្លួនភ្លាមៗក្នុងពេលធ្វើសកម្មភាពឆក់ទូរស័ព្ទពីស្ត្រីជនជាតិរុស្ស៊ី ហើយព្យាយាមរត់គេចខ្លួន កាលវេលាម៉ោង២១យប់ថ្ងៃទី២៥ ខែកុម្ភៈ ឆ្នាំ២០១៥ នៅផ្លូវព្រះស៊ីសុវត្ថិកែងនឹងផ្លូវលេខ១៣០ ក្នុងសង្កាត់ផ្សារកណ្ដាល១ ខណ្ឌដូនពេញ។
សមត្ថកិច្ចមូលដ្ឋានបានឲ្យដឹងថា ជនសង្ស័យដែលឃាត់ខ្លួននេះឈ្មោះ រស់ ចយ អាយុ២២ ឆ្នាំ មានមុខរបរមិនពិតប្រាកដ ស្នាក់នៅក្បែររោងកុនហែមជាតិ ផ្លូវ១៣០ សង្កាត់ផ្សារចាស់ ខណ្ឌដូនពេញ។ ចំណែកនារីបរទេសរងគ្រោះមានឈ្មោះ VLADISLAVA (វល្លាឌីស ឡាវី )ជាជនជាតិរុស្ស៊ី អាយុ១៦ឆ្នាំ មុខរបរនៅសិស្សរៀលនៅប្រទេសរុស្ស៊ី សព្វថ្ងៃស្នាក់នៅផ្ទះលេខ១៤ ផ្លូវ៥១ សង្កាត់បឹងគីងកង១ ខណ្ឌចំការមន។
សមត្ថកិច្ចបានបន្តថា នៅមុនពេលកើតហេតុ ជនរងគ្រោះនិងមិត្តភ័ក្ដិស្រីម្នាក់ទៀតនាំគ្នាមកអង្គុយលេងនៅលើសួនច្បារមាត់ទន្លេដោយទុកទូរស័ព្ទដៃម៉ាកSONY នៅក្នុងហោប៉ៅខោរ ខណៈនោះស្រាប់តែជនសង្ស័យបានរត់មកឆក់យកព្យាយាមរត់គេចខ្លួន ក៏ជនរងគ្រោះស្រែកឆោឡោរត់ដេញតាមពីក្រោយ ហើយត្រូវបានប្រជាពលរដ្ឋជិតខាងនិងកម្លាំងមូលដ្ឋានកំពុងតែល្បាតនៅក្បែរជួយអន្តរាគមន៍ចាប់ភ្លាមៗ រួចហើយប្រជាពលរដ្ឋបានស្វាគមន៍ម្នាក់មួយដៃមួយជើងឡើងបែកមុខមាត់ផងដែរ បើទោះបីកម្លាំងសមត្ថកិច្ចបានព្យាយាមយកជនល្មើសចេញពីចំណោមប្រជាពលរដ្ឋយ៉ាងណាក៏មិនរួចខ្លួនឡើយព្រោះពួកគាត់ខឹងខ្លាំងណាស់ពេលឮសូរថាចោរនោះ។
សមត្ថកិច្ចបញ្ជាក់ថា ក្នុងការឃាតើខ្លួនជនសង្ស័យរូបនោះគឺដកហូតបានទូរស័ព្ទរបស់ជនបរទេសមកវិញតែត្រូវបែកខូចខាតអស់ ពីព្រោះតែជនល្មើសបោះទម្លាក់ចោលប៉ះផ្លូវបណ្ដាលឲ្យបែកកញ្ចក់អេក្រង់អស់តែម្តង។ បច្ចុប្បន្នជនសង្ស័យ ត្រូវបានសមត្ថកិច្ចខណ្ឌដូនពេញ ឃុំខ្លួនបណ្ដោះអាសន្ន ដើម្បីកសាងសំណុំរឿងបញ្ជូនទៅតុលាការ៕
រស្មី
0 Comments