ភ្នំពេញ ៖ ក្នុងការប្រកួតជម្រុះជុំទី៣ ឈានទៅដណ្ដើមខ្សែក្រវាត់លីអូទម្ងន់៦០គីឡូក្រាម នារសៀលថ្ងៃសៅរ៍ ទី២៨ ខែកុម្ភៈ ឆ្នាំ២០១៥ នៅលើសង្វៀនរោងសៀកអតីតមហោស្រពទន្លេបាសាក់ទល់មុខរដ្ឋសភានោះ សេង ស្រឿន អ្នកប្រដាល់ក្លិបព្រះខ័នរាជ្យ ត្រូវជួបជាមួយអ្នកប្រដាល់ សល់ ពិសិដ្ឋ ក្លិបកុសលកីឡា។
សេង ស្រឿន ប្រកួតពីរជុំកន្លងមកនេះចាញ់ទាំងពីរប្រកួត មាន២ពិន្ទុ ឯ សល់ ពិសិដ្ឋ ពីរប្រកួតដូចគ្នា ក៏ចាញ់ទាំងពីរប្រកួតមាន២ពិន្ទុដែរ។ សម្រាប់ការជួបគ្នារវាង សេង ស្រឿន និង សល់ ពិសិដ្ឋនេះ គេមិនហ៊ានទាយមុនថាអ្នកណាឈ្នះអ្នកណាចាញ់នោះឡើយ ព្រោះថាអ្នកប្រដាល់ទាំងពីរនេះមិនធ្លាប់ដែលជួបគ្នាទេកន្លងមក។
ពួកគេពីរនាក់នេះ បើតាមការកត់សម្គាល់ពីបច្ចេកទេសក្នុងការប្រកួតកន្លងមក គឺមានលក្ខណៈប្រហាក់ប្រហែលគ្នាទេ ដូច្នេះនរណាឈ្នះ នរណាចាញ់នោះ គឺស៊ីសងលើកម្លាំងស៊ុហ្វអ្នកណាខ្លាំងរឹងមាំជាង អ្នកនោះឈ្នះហើយ។
សេង ស្រឿន កាលពីជុំទី២បានវាយចាញ់ ម៉ន លីហ៊ួរ ក្លិបការិយាល័យទី៥ កងទ័ពជើងគោកដោយពិន្ទុ។ ចំណែក សល់ ពិសិដ្ឋវិញ គេបានវាយចាញ់ ឈឿន ឆៃដែន អ្នកប្រដាល់ក្លិបនិរោធមានជ័យក្នុងទឹកទី២។
សម្រាប់ការជួបគ្នារវាង សេង ស្រឿន និង សល់ ពិសិដ្ឋនៅជុំទី៣នេះ មិនដឹងថានរណាជួបសំណាងល្អ នរណាជួបសំណាងអាក្រក់នោះទេ? ប៉ុន្តែក្រុមអ្នកវិភាគប្រដាល់ក្នុងស្រុក ពួកគេមានជំនឿទុកចិត្តលើសេង ស្រឿន ឈ្នះច្រើនជាង ដោយហេតុថា ស្រឿន គេមានកម្លាំងស៊ុហ្វល្អជាងពិសិដ្ឋ។
ចំពោះការប្រកួតជម្រុះមួយគូទៀតនោះ ឈឿន ឆៃដែន អ្នកប្រដាល់ក្លិបនិរោធមានជ័យ ត្រូវជួបប្រកួតជាមួយ ម៉ន លីហ៊ួរ អ្នកប្រដាល់ក្លិបការិយាល័យទី៥ កងទ័ពជើងគោក។ ពួកគេពីរនាក់នេះ ក៏មិនធ្លាប់ប៉ះគ្នាដែរកន្លងមក។
រវាងពួកគេទាំងពីរនាក់នេះ ជាអ្នកប្រដាល់ខ្លាំងដូចគ្នា គ្រាន់តែ លីហ៊ួរ មានស្នៀតប្រដាល់អន់ជាង ហើយថែមទាំងមានកម្ពស់ទាបជាងបន្តិចប៉ុណ្ណោះ។ ឆៃដែន ប្រកួតសម្រុកខ្លាំង ហើយគេខ្លាំងនិងល្អជង្គង់ តែក៏ពិបាកធ្វើលីហ៊ួរដែរ ព្រោះថាគេមិនអាចចាប់លីហ៊ួរជាប់នោះទេ ដូច្នេះលទ្ធភាពវាយជង្គង់គឺមានតិចតួចណាស់។ ក្នុងការប្រកួតជុំទី២កន្លងមកនេះ ឈឿន ឆៃដែន បានវាយសល់ ពិសិដ្ឋឲ្យសន្លប់ក្នុងទឹកទី២។
ម៉ន លីហ៊ួរ គេមានភាពរហ័សរហួន ស្នៀតគុនគេក៏មានលក្ខណៈល្អប្រសើរដែរ។ ប៉ុន្តែសម្រាប់ការប្រកួតនេះ ក្រុមអ្នកវិភាគប្រដាល់គេមិនហ៊ានទស្សន៍ទាយថា អ្នកណាឈ្នះ និងអ្នកណាចាញ់ដែរ។
ឈឿន ឆៃដែន ពីរប្រកួតកន្លងមកនេះឈ្នះទាំង២ប្រកួត មាន៦ ពិន្ទុក្នុងដៃ។ រីឯ ម៉ន លីហ៊ួរ ២ប្រកួតកន្លងមក ក៏ឈ្នះទាំងពីរប្រកួតបាន៦ពិន្ទុដែរ។ ចាំមើល ការប្រកួតជុំទី៣នេះ តើ ឆៃដែនឬលីហ៊ួរ ដែលរកបាន៣ពិន្ទុបន្ថែមនោះ?
ចំពោះការប្រកួតក្រៅពីគូខ្សែក្រវាត់នេះ មាស សារិទ្ធ អ្នកប្រដាល់ក្លិបភារម្យគុនខ្មែរ ប្រកួតជាមួយ ពុទ្ធផន កុសល អ្នកប្រដាល់ក្លិបពុទ្ធសេរីវង្សកីឡា ក្នុងទម្ងន់៦៩គីឡូក្រាម ហើយ ផាន់ សារ៉ែម អ្នកប្រដាល់ក្លិបគជសារកីឡា ប្រកួតជាមួយ ម៉ន គឹមឡុង អ្នកប្រដាល់ក្លិបការិយាល័យទី៥ កងទ័ពជើងគោក៕
វិសិទ្ធ
0 Comments