ប៉ៃលិន ៖ ក្មេងប្រុសម្នាក់ បានជិះម៉ូតូចេញពីសាលារៀនឡើងមកដល់ផ្លូវជាតិ ស្រាប់តែត្រូវម៉ូតូមួយគ្រឿងទៀតដែលបើកបរក្នុងស្ថានភាពស្រវឹងបុកពេញទំហឹង បណ្ដាលឲ្យម៉ូតូទាំងពីរដួល ចំណែកម្ចាស់ម៉ូតូរងរបួសធ្ងន់១ ស្រាល១។ ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង១១និង១០នាទីព្រឹក ថ្ងៃទី២៥ ខែកុម្ភៈ ឆ្នាំ២០១៥ លើកំណាត់ផ្លូវជាតិលេខ៥៧ ស្ថិតក្នុងភូមិអូរពើត សង្កាត់ទូលល្វា ក្រុងប៉ៃលិន ខេត្តប៉ៃលិន។
ប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញក្មេងប្រុសម្នាក់ជិះម៉ូតូម៉ាកស្កប់ពីចេញពីសាលាតែម្នាក់ឯង លុះឡើងមកដល់ផ្លូវជាតិលេខ៥៧ ស្រាប់តែមានម៉ូតូមួយគ្រឿងទៀតម៉ាក់ឌ្រីម ស៊េរីឆ្នាំ២០១៣ បើកបរដោយបុរសម្នាក់ ក្នុងល្បឿនលឿនទំនងជាស្រវឹងស្រា ជិះរេចង្កូតពេញផ្លូវ ក្នុងទិសដៅស្របគ្នាពីកើតទៅលិច លុះមកដល់ចំណុចកើតហេតុក៏បុកជាមួយម៉ូតូយុវសិស្សនោះ បណ្ដាលឲ្យដួលទាំងពីរគ្រឿង ចំណែកម្ចាស់ម៉ូតូបង្កសន្លប់និងកន្លែង។ ប្រភពបន្តថា ក្រោយពេលកើតហេតុគេឃើញប៉ូលិសចរាចរណ៍ផ្លូវគោកខេត្តចុះមកវាស់វែង។
តាមប្រភពពីសមត្ថកិច្ចចរាចរណ៍ផ្លូវគោកនៃស្នងការដ្ឋាននគរបាលខេត្តបានឲ្យដឹងថា អ្នកបើកបរម៉ូតូស្កប់ពីឈ្មោះ ម៉ៅ ភត្រា ភេទប្រុស អាយុ១៦ឆ្នាំ ជាសិស្ស (រងរបួសស្រាល) រស់នៅភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន ជិះម៉ូតូម៉ាក់ស្កប់ពី ពណ៌ស ពាក់ស្លាកលេខប៉ៃលិន1A-1049 រងការខូចខាតម៉ាស៊ីនផ្នែកខាងឆ្វេង។ ចំណែកអ្នកបើកបរម៉ូតូមួយគ្រឿងទៀតមិនត្រួវបានស្គាល់អត្តសញ្ញាណនោះទេ គ្រាន់តែដឹងថាជិះម៉ូតូម៉ាកឌ្រីម ស៊េរីឆ្នាំ២០១៣ ពាក់ស្លាកលេខប៉ៃលិន1A-2252 បើកក្នុងស្ថានភាពស្រវឹងជោកជាំ រងរបួសសន្លប់នឹងកន្លែង។
ក្នុងហេតុការណ៍នេះដែរ ម្ចាស់ម៉ូតូទាំងពីរបានសម្រួលគ្នាដើម្បីបញ្ចប់រឿង។ តាមការសន្និដ្ឋានរបស់សមត្ថកិច្ចចរាចរណ៍បានឲ្យដឹងទៀតថា ហេតុការណ៍គ្រោះថ្នាក់ចរាចរណ៍បណ្ដាលមកពីកត្តាមនុស្សបើកបរក្នុងស្ថានភាពស្រវឹង៕
សេង សុវណ្ណារិទ្ធ
0 Comments