ភ្នំពេញ ៖ កម្មករសំណង់ម្នាក់បានរងរបួសបាក់ជើងទាំងពីរយ៉ាងធ្ងន់ធ្ងរ ហើយក៏ត្រូវបានគេជួយសង្គ្រោះដោយដឹកបញ្ជូនទៅកាន់មន្ទីរពេទ្យភ្លាមដែរ ក្រោយពីមានហេតុការណ៍បាក់ពិតានជណ្ដើរ ទើបសាងសង់ថ្មីគ្មានបច្ចេកទេសមកលើជនរងគ្រោះម្នាក់នេះទាំងដឹងខ្លួនមុនហើយ នៅតែរត់គេចមិនរួចនោះ។
ហេតុការណ៍អាក្រក់នេះបានកើតឡើងនៅវេលាម៉ោង៣និង៤០ឆ្នាំរសៀល ថ្ងៃទី២៥ ខែកុម្ភៈ ឆ្នាំ២០១៥ នៅតាមបណ្តោយផ្លូវលេខ៥៦០ ក្នុងសង្កាត់បឹងកក់ទី១ ខណ្ឌទួលគោក។ ជនរងគ្រោះត្រូវបានគេស្គាល់ឈ្មោះ វង់ វ៉ុ ន ភេទប្រុស អាយុ២៦ឆ្នាំ មុខរបរកម្មករសំណង់ក្នុងការដ្ឋានសំណង់ខាងលើនិងមានស្រុកកំណើត ស្រុកមុខកំពូល ខេត្តកណ្តាល បានបាក់ជើងទាំងពីរ ហើយក៏ត្រូវបានគេដឹកបញ្ជូនទៅកាន់មន្ទីរពេទ្យភ្លាមដែរ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញជនរងគ្រោះបំពេញការងារជាកម្មករសំណង់នៅក្នុងការដ្ឋានខាងលើដូចសព្វមួយដង។ ក្នុងខណៈពេលនោះ ជនរងគ្រោះបានឮសម្លេងប្រឹបៗ ក៏បានក្រឡេកមើលទៅខាងលើ ក៏ស្រាប់តែឃើញពិតានបេតុងដែលចាក់រឹងហើយនោះបាក់ធ្លាក់មកក្រោមតែម្តង ដែលធ្វើឲ្យជនរងគ្រោះប្រឹងរត់ចេញពីក្រោមពិតាននោះ តែរត់មិនផុតក៏ត្រូវពិតាននោះបាក់មកត្រូវចំជើងទាំង២បណ្ដាលឲ្យបាក់តែម្តង ហើយភ្លាមៗនោះជនរងគ្រោះក៏ត្រូវបានគេដឹកបញ្ជូនទៅកាន់មន្ទីរពេទ្យព្រះកុសុមៈភ្លាមៗដែរ ដើម្បី សង្គ្រោះជីវិត។
មន្ត្រីដែលមានសមត្ថកិច្ចចុះទៅមើលហេតុការណ៍បានឲ្យដឹងថា ការបាក់ធ្លាក់ពិតានបេតុងដែលកំពុងតែធ្វើការស្ថាបនានេះ គឺផ្ដើមឡើងពីការសាងសង់គ្មានបច្ចេកទេស ហើយពិតានដែលបាក់ធ្លាក់មកនេះហាក់មិនឃើញមានសរសៃដែកភ្ជាប់ជាមួយគេឡើយ៕
ស្រីរ័ត្ន
0 Comments