ប្រធានាធិបតីនីហ្សេរីយ៉ា លោកហ្កត់ឡាក់ ចូណាថាន់ (Goodluck Jonathan) នៅថ្ងៃព្រហស្បត្តិ៍ បានធ្វើទស្សនកិច្ចទីកន្លែងអ្វីដែលគេបារម្ភថា ជាការសម្លាប់រង្គាលដ៏អាក្រក់បំផុតរបស់ក្រុមបូកូហារ៉ាម ហើយបានប្តេជ្ញាថា ឧទ្ទាមកម្មនឹងត្រូវបញ្ចប់ក្នុងពេលឆាប់ៗ។
ប៉ុន្តែពួកឥស្លាមនិយម បានផ្តល់ការបង្ហាញថ្មីមួយឲ្យឃើញពីទំហំនៃភារកិច្ចជាមួយនិងការបំផ្ទុះគ្រាប់បែកបីលើក ដោយឡែកពីគ្នា នៅក្នុងតំបន់ភាគកណ្តាល និងភាគឦសាន ដែលជ្រួលច្រាលរបស់ប្រទេស ដែលបានបណ្តាលឲ្យស្លាប់មនុស្សយ៉ាងតិច៣៥នាក់។
ការបំផ្ទុះគ្រាប់បែកទាំងនោះ បានបង្កើនការភ័យខ្លាចថា នឹងមានរលកវាយប្រហារជាថ្មី ទៅលើគោលដៅទាំងឡាយ នៅកណ្តាលទីក្រុង នៅពេលកងទ័ពមកពីប្រទេសនីហ្សេរីយ៉ា នីស្ស ឆាដ និងប្រទេសកាមេរ៉ូនយកជ័យជំនះលើពួកសកម្មប្រយុទ្ធ ក្នុងតំបន់ដាច់ស្រយាល។
ទស្សនកិច្ចរបស់លោកចូណាថាន់ ទៅកាន់បាហ្កាជាកន្លែងដែលមនុស្សរាប់រយនាក់ មានការភ័យខ្លាចថា នឹងត្រូវគេសម្លាប់នោះ ធ្វើឡើងក្រោយពីអ្នកប្រឆាំងបោះឆ្នោតដ៏សំខាន់របស់លោក ឈ្មោះមូហាម៉ាឌូ ប៊ូហារី (Buhari) ចោទប្រកាន់លោកថា ខ្វះសមត្ថភាពដឹកនាំក្នុងការដោះស្រាយវិបត្តិនេះ៕
0 Comments