តារាចម្រៀងកញ្ញា គង់ ចាន់រដ្ឋា បច្ចុប្បន្ន នាងបានបង្ហាញវត្តមាននៅក្នុងស្រុកខ្មែរវិញហើយ បន្ទាប់ពីតារារូបនេះបានឈានជើងចាកចេញពីប្រទេសកម្ពុជា ទៅចម្រៀងនៅប្រទេសអូស្ត្រាលីកាលពីថ្ងៃទី១៩ ខែមិថុនា ឆ្នាំ២០១៥ តាមរយៈការអញ្ជើញរបស់ប៉ុស្តិ៍ទូរទស្សន៍ក្នុងស្រុកនៅទីនោះ។
ឆ្លើយឆ្លងជាមួយភ្នាក់ងារកម្ពុជាថ្មីតាមសារអេឡិចត្រូនិកនៅរសៀល ថ្ងៃទី២៤ ខែមិថុនា ឆ្នាំ២០១៥នេះ តារាសម្ដែងកញ្ញា គង់ ចាន់រដ្ឋា បានប្រាប់ឱ្យដឹងថា ឥឡូវនេះ នាងកំពុងតែមានវត្តមាននៅលើទឹកដីប្រទេសកំណើត(កម្ពុជា)វិញ ហើយក្រោយពីការវិលត្រឡប់មកដល់ស្រុកខ្មែរ កាលពីថ្ងៃទី១៩ ខែមិថុនាកន្លងទៅ។
តារាសម្ដែងពន្លកពូជមកពីដែនដីខេត្តសៀមរាបអង្គរ កញ្ញា គង់ ចាន់រដ្ឋា បានបន្តថា ខ្ញុំមានអារម្មណសប្បាយរីករាយខ្លាំងណាស់ ពេលទៅដល់ទីនោះ ព្រោះមានបងប្អូនអាណិកជនខ្មែរគាត់គាំទ្រច្រើន ហើយក្នុងរយៈពេលមួយខែនេះ គឺបានចេញទៅច្រៀង-សម្ដែងច្រើនរដ្ឋ..។
រដ្ឋា បានបន្ថែមថា ខ្ញុំក៏ទទួលបានការគាំទ្រខ្លាំង ព្រមជាមួយភាពជោគជ័យផងដែរ ពីការចេញទៅច្រៀង និងសម្ដែងនៅលើទឹកដីប្រទេសអូស្ត្រាលី ដោយសារបងប្អូនអាណិកជនខ្មែររស់នៅទីនោះមានការពេញចិត្ត និងគាំទ្រមកលើតារាសិល្បៈខ្មែរយើងយ៉ាងច្រើន។ ជាពិសេសក៏ទទួលបានការសរសើរ និងពេញចិត្តពីអ្នករស់នៅទីនោះថា ជាតារាមិនចេះឆ្មើងឆ្មៃទៀតផង។
គួរបញ្ជាក់ថា នេះជាលើកទី២ហើយសម្រាប់តារាចម្រៀងកញ្ញា គង់ ចាន់រដ្ឋា ដែលក្ដាប់បានឱកាសចេញទៅកើបលុយនៅក្រៅប្រទេស ដោយលើកទីមួយនាងទទួលបានការហៅចេញទៅច្រៀង និងសម្ដែងលើទឹកដីសហរដ្ឋអាមេរិករយៈពេលជាង៣ខែ។
ចំណែកលើកទី២នេះ រដ្ឋា ទទួលបានឱកាស នៃការអញ្ជើញជាថ្មីម្តងទៀតរបស់ប៉ុស្តិ៍ទូរទស្សន៍នៅប្រទេស អូស្ត្រាលីក្នុងការចេញទៅច្រៀង-សម្ដែងនៅទីនោះរយៈពេលមួយខែកន្លងមក ៕
0 Comments