បាត់ដំបង ៖ ប្រជាពលរដ្ឋដែលរងគ្រោះអំពីបញ្ហាដីធ្លី រវាងលោក ឈាន នី មេឃុំបឹងប្រាំ ស្រុកបវេល ខេត្តបាត់ដំបងចំនួនប្រាំរូប នៅថ្ងៃទី២១ ខែកក្កដា ឆ្នាំ២០១៥នេះ ត្រូវបានលោកព្រះរាជអាជ្ញារង តូច សុភក្តី កោះហៅឲ្យចូលខ្លួននៅម៉ោង៨និង៣០នាទីព្រឹកនេះ តាមពាក្យបណ្ដឹងរបស់លោកមេឃុំ និង មេភូមិបឹងប្រាំចោទប្រកាន់ថា បានប៉ះពាល់កម្មសិទ្ធិលើដីធ្លីប្រជាពលរដ្ឋទាំងប្រាំរូបនោះរួមមាន ១-ឈ្មោះ ឌឺម អាន ភេទប្រុស ,២-ឈ្មោះ តៅ ហាប់ ភេទប្រុស ,៣-ឈ្មោះ ឆម ស្រួច ភេទប្រុស ,៤-ឈ្មោះ ឥត ឈឿន ភេទស្រី ,៥-ឈ្មោះ ដួង ឯម ភេទស្រី។
ប្រជាពលរដ្ឋមកតវ៉ានៅមុខសាលាដំបូងខេត្តចំនួន១៧០នាក់នោះបានបញ្ជាក់ថា ពួកគេគ្មានកំហុសដូចការចោទប្រកាន់របស់លោកមេឃុំ ឈាន នី នោះទេ ព្រោះពួកគាត់ធ្វើតែនៅលើដីរបស់ពួកគេ ដែលបានកាប់ឆ្ការ និងថែទាំយូរឆ្នាំមកហើយតែប៉ុណ្ណោះ មានតែលោក ឈាន នី ជាមេឃុំប៉ុណ្ណោះ ដែលរំលោភយកដីរបស់ពួកគាត់ ដូច្នេះហើយទើបពួកគាត់នាំគ្នាមកចាំមើល ថាតើតុលាការ មានចំណាត់ការយ៉ាងណាទៅលើពលរដ្ឋរងគ្រោះ ហើយពួកគាត់បានចោទប្រកាន់ថា ចំពោះប្រជាពលរដ្ឋក្រីក្រប្តឹងម្តងៗពុំដែលតុលាការមានចំណាត់ការលើពាក្យបណ្ដឹងរបស់ប្រជាពលរដ្ឋបានឆាប់រហ័សនោះទេ តែបើមានអ្នកមានលុយប្តឹង តុលាការមានចំណាត់ការលើពាក្យបណ្ដឹងរបស់អ្នកនោះលឿនបំផុត ពុំដែលបានចុះស៊ើបអង្កេតដល់កន្លែងនោះឡើយ។ ពួកគាត់បានបន្តទៀតថា ពួកគាត់ធ្លាប់ឮអនុសាសន៍របស់សម្ដេចកាលពីមុនថា សម្ដេចមិនចង់ឃើញប្រជាពលរដ្ឋជាប់គុកដោយសារតែទំនាស់ដីធ្លីនោះទេ។
ពួកគាត់បញ្ជាក់ថា ពួកគាត់មកតវ៉ានៅមុខតុលាការនេះមិនមែនមកកាន់ជើងជនខិលខូចនោះទេ ពួកគាត់ចង់បានសេចក្ដីសុខណាស់ ព្រោះពួកគាត់យល់ថា បច្ចុប្បន្នប្រទេសយើងមានសន្តិភាព និងអភិវឌ្ឍន៍គ្រប់ទីកន្លែង ទើបជនមួយចំនួនចេះតែដើរយកដីរបស់ពួកគាត់។ ប្រជាពលរដ្ឋឈ្មោះ ហ៊ុយ យ៉ុង និងឈ្មោះ សៀង ដួង ក្នុងចំណោមប្រជាពលរដ្ឋទាំង១៧០នាក់បានបញ្ជាក់ថា ពួកគាត់សុខចិត្តមកចោលផ្ទះសំបែងមួយយប់ហើយ ព្រោះពួកគាត់ឡើងមកតាំងពីថ្ងៃទី២០ ខែកក្កដា ឆ្នាំ២០១៥ ដោយពួកគាត់សុំទីកន្លែងវត្តដំរី.ស សម្រាកមួយយប់ ដោយសារតែរង់ចាំមើលអ្នកទាំងប្រាំ រូបចូលតុលាការ តើតុលាការដាក់កំហុសឲ្យពួកគាត់យ៉ាងណា ព្រោះអ្នកទាំងប្រាំរូបនោះមានបញ្ហាដូចពួកគាត់ដែរ គឺក្នុងមួយគ្រួសារ ពួកគាត់គ្រប់គ្រងដីខ្លះ បីរ៉ៃ សម្រាប់ដី ភូមិស្រាប់ តែលោកមេឃុំ កាត់ដីពួកគាត់អស់ នៅសល់ត្រឹមតែមួយគ្រួសារមួយរ៉ៃប៉ុណ្ណោះ ស្មើនឹង៤០ម៉ែត្រ គុណនឹង៤០ម៉ែត្រ ចំពោះដីកសិកម្មវិញ មានតែប្លង់ តែគ្មានដី ត្រូវលោក ឈាន នី មេឃុំ ជាមួយមេភូមិឃុបឃិតយកដីលក់ឲ្យអ្នកដទៃអស់រលីង។ ពួកគាត់ថា តើអ្នកទាំងប្រាំរូបមានទោសត្រង់ណា? ចំណែកលោកព្រះរាជអាជ្ញារង តូច សុភក្តី អ្នកយកព័ត៌មានយើងពុំអាចសុំការបំភ្លឺបាននៅឡើយទេ នៅថ្ងៃទី២១ ខែ កក្កដា ឆ្នាំ២០១៥នោះ ដោយជាប់រវល់សួរចម្លើយ។ ទោះយ៉ាងនេះក្តី មន្ត្រីនៅក្នុងតុលាការដំបូងបានបញ្ជាក់ថា ចំពោះសមត្ថកិច្ច តុលាការ ជាទូទៅត្រូវតែមានចំណាត់ការទៅលើពាក្យបណ្ដឹង ជារឿងនីតិវិធីរបស់តុលាការ មិនថាបុគ្គលណានោះទេ សំខាន់ទៅលើរឿងនោះថា តើពិត ឬមិនពិត មិនមែនចេះតែកាត់ទោសគ្មានមូលហេតុនោះទេ តែបើពួកគាត់គ្មានការពាក់ព័ន្ធដូចការចោទប្រកាន់ក្នុងពាក្យ បណ្ដឹងរបស់ភាគីដើមបណ្ដឹងនោះទេ នីតិវិធីក្នុងសំណុំរឿងនោះ ត្រូវបានតុលាការបញ្ចប់ តែចំពោះប្រជាពលរដ្ឋទាំងប្រាំរូបនេះមិនទាន់ដឹងថាមានទោស ឬមិនមាននៅឡើយ ពីព្រោះស្ថិតនៅក្នុងការសាកសួររបស់តុលាការមិនបានចប់សព្វគ្រប់នៅឡើយ៕
តុលាការសាលាដំបូងខេត្តបាត់ដំបង នៅតែមានចំណាត់ការទៅលើប្រជាពលរដ្ឋ ទំនាស់ដីធ្លីនៅឃុំបឹងប្រាំ
0 Comments