គ្រោះថ្នាក់ចរាចរណ៍នេះបានកើតឡើងកាលពីរសៀលថ្ងៃទី២០ ខែកក្កដា នៅលើកំណាត់ផ្លូវជាតិលេខ៧៦ ចំណុចគីឡូម៉ែត្រលេខ១០៨ ស្ថិតនៅក្នុងឃុំឃ្សឹម ស្រុកស្នួល ខេត្តក្រចេះ បណ្តាលឲ្យជនរងគ្រោះម្នាក់បានស្លាប់។
ជនរងគ្រោះឈ្មោះ សោម ឯម ភេទស្រីអាយុ៣១ឆ្នាំបានស្លាប់ភ្លាមៗនៅកន្លែងកើតហេតុ ចំណែក២នាក់ផ្សេងទៀត ឈ្មោះ សូរ ចំរើន ជាកូនប្រុសទើបតែអាយុ២ឆ្នាំ និងម្នាក់ទៀតត្រូវជាម្តាយឈ្មោះ មាស សុផាត អាយុ៥១ឆ្នាំ បានរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តកំពង់ចាម។ ជនរងគ្រោះទាំងបីនាក់ មានទីលំនៅក្នុងឃុំឃ្សឹម ស្រុកស្នួល ខេត្តក្រចេះ។
ដោយឡែកអ្នកបើកបររថយន្តបង្ក ជាមន្ត្រីយោធា ដែលបានរត់គេចខ្លួន ដោយបន្សល់ទុករថយន្ត និងឯកសណ្ឋានយោធាពាក់ស័ក្ដិ៤នោះ ឈ្មោះ ឆឹត ភារម្យ។ កន្លងមក គេតែងតែឃើញមន្ត្រីយោធាម្នាក់នេះនៅឈរជើងនៅចំណុចកាបី ក្នុងឃុំឃ្សឹម ស្រុកស្នួល ចាំរាប់ក្បាលឡានដឹកឈើយកលុយ ឬពេលខ្លះយោធាម្នាក់នេះ បានដឹកឈើខ្លួនឯងក៏មាន។ នេះបើតាមការឲ្យដឹងពីមន្ត្រីនគរបាលដែលឈរជើងនៅតំបន់នោះ។
លោកវរសេនីយ៍ត្រី កែវ វីណូ បានបញ្ជាក់ថា ក្រោយពីកើតហេតុបាន១ថ្ងៃ ខាងសាច់ញាតិអ្នកបើករថយន្តបង្ក ចូលមកដោះស្រាយជាមួយ ខាងជនរងគ្រោះនៅអធិការដ្ឋាននគរបាលស្រុកស្នួលនៅរសៀលថ្ងៃទី២១ ខែកក្កដានេះ៕
រថយន្តមន្ត្រីយោធាស័ក្ដិ៤បើកបុកជិះម៉ូតូស្លាប់ម្នាក់របួសធ្ងន់២នាក់នៅស្រុកស្នួល
0 Comments