ភ្នំពេញ ៖ លោកអ៊ិត សំហេងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានស្នើឲ្យរដ្ឋាភិបាលកូរ៉េជួយបង្កើនកូតាក្នុងការជ្រើសរើសពលករពីកម្ពុជា ក៏ដូចជាបង្កើតឲ្យមានប្រព័ន្ធគាំទ្រ ការពារសិទ្ធផលប្រយោជន៍ពលករកម្ពុជា។
ក្រៅពីនេះ លោករដ្ឋមន្ត្រីក៏បានស្នើឲ្យកូរ៉េបន្តរៀបចំការ ប្រឡងជ្រើសរើសពលករតាមប្រព័ន្ធEPSផងដែរ ព្រោះវាមានតម្លាភាពអាចទទួលយកបាន។
ការស្នើសុំនេះបានធ្វើឡើងខណៈដែលលោកបានអនុញ្ញាតឲ្យ លោកSong Joung Jungអតីតប្រធានអង្គភាពអភិវឌ្ឍន៍ធនធានមនុស្សនៃសាធារណៈកូរ៉េចូលជួបសម្តែងការគួរសម និងពិភាក្សាការងារកាលពីថ្ងៃទី១៧ ខែសីហា ឆ្នាំ២០១៥ នៅទីស្តីការក្រសួង។
នៅក្នុងជំនួបនោះ លោកអ៊ិត សំហេងបានជម្រាបជូនអំពីដំណើរការនៃការកំណត់ប្រាក់ឈ្នួលអប្បបរមាផ្នែកវាយនភ័ណ្ឌកាត់ដេរសម្លៀកបំពាក់ និងដេរស្បែកជើង នៅកម្ពុជា។ លោករដ្ឋមន្ត្រីបានមានប្រសាសន៍ថា “ខ្ញុំបានរៀនសូត្រពីបទពិសោធន៍ការកំណត់ប្រាក់ឈ្នួលពីសាធារណរដ្ឋកូរ៉េ កាលពីដំណើរទស្សនៈកិច្ចការងាររបស់ខ្ញុំពីពេលកន្លងមក និងបានយកមកអនុវត្តនៅកម្ពុជា ឃើញថា មានភាពជោគជ័យខ្លាំងណាស់”។ លោករដ្ឋមន្ត្រីបានបន្តថា ការកំណត់ប្រាក់ឈ្នួលនៅកម្ពុជាមានលក្ខណៈជាត្រីភាគីលោកហើយយើងបើកទូលាយឲ្យគ្រប់ភាគីលើកយករូបមន្តសមស្របណាមួយផ្អែកលើលក្ខណៈវិទ្យាសាស្ត្រមកពិភាក្សា ជៀសវាងការទាមទារដោយមិនមានមូលដ្ឋានគ្រឹះច្បាស់លាស់ហើយ បច្ចុប្បន្ន កម្ពុជាកំពុងដំណើរការកំណត់ប្រាក់ឈ្នួលសម្រាប់ឆ្នាំ២០១៦។
លោករដ្ឋមន្ត្រីបន្ថែមថា ក្រសួងនឹងបន្តសហការជាមួយគ្រប់ដៃគូពាក់ព័ន្ធ ពិសេសអង្គការអន្តរជាតិខាងវិស័យការងារ (ILO) ដើម្បីជួយជាបច្ចេកទេសដល់ដំណើរការនៃការកំណត់ប្រាក់ឈ្នួលឆ្នាំ២០១៦នេះ។
លោកអ៊ិត សំហេង បន្តជម្រាបជូនភ្ញៀវថា ក្រសួងក៏កំពុងពង្រឹង និងបង្កើនសមត្ថភាពក្នុងការធ្វើអធិការកិច្ចការងារតាមបណ្តាក្រុមហ៊ុន រោងចក្រ សហគ្រាស និងគ្រឹះសា្ថននានាដោយ ក្រសួងបានធ្វើកំណែទម្រង់បង្កើតឲ្យមានក្រុមអធិការកិច្ចពិសេសតែមួយចុះធ្វើអធិការកិច្ចការងារលើគ្រប់ផ្នែកក្នុងពេលតែមួយ ដើម្បីជៀសវាងការចុះធ្វើអធិការកិច្ចជាន់គ្នា និងការបង្ករផលរំខានដល់ក្រុមហ៊ុន។
លោក អ៊ិត សំហេង ក៏បានថ្លែងអំណរគុណដល់សាធារណរដ្ឋកូរ៉េ និងមូលនិធិអភិវឌ្ឍន៍ធនធានមនុស្សកូរ៉េ ចំពោះការផ្តល់ឱកាសការងារ និងការគាំពារដល់ពលកម្មករកម្ពុជា កំពុងធ្វើការ និងស្នាក់នៅប្រទេសកូរ៉េ។
លោករដ្ឋមន្ត្រីបានបញ្ជាក់ផងដែរថា រហូតមកដល់បច្ចុប្បន្ននេះមានពលករកម្ពុជាទៅធ្វើការនៅសាធារណរដ្ឋកូរ៉េ មានចំនួនប្រហែល ៤ម៉ឺននាក់។
លោក Song Joung Jungអតីតប្រធានអង្គភាពអភិវឌ្ឍន៍ធនធានមនុស្សនៃសាធារណៈកូរ៉េបានលើកឡើងថា ជាការពិតណាស់ ការកំណត់ប្រាក់ឈ្នួលត្រឹមត្រូវ ដែលមិនធ្វើឲ្យប៉ះពាល់ដល់ជីវភាពកម្មករ និងដំណើរការវិនិយោគរបស់និយោជក នឹងជួយដល់សេដ្ឋកិច្ចកម្ពុជាឲ្យមានភាពរីកចម្រើនជឿនលឿន។
ទោះជាមានបញ្ហាកើតឡើងបន្តិចបន្តួចចំពោះដំណើរការកំណត់ប្រាក់ឈ្នួលនៅកម្ពុជាកាលពីពេលកន្លងមក តែលោកយល់ឃើញថា “ក្រោមការខិតខំរបស់រាជរដ្ឋាភិបាលកម្ពុជា និងជំនួយបច្ចេកទេសពីគ្រប់ភាគីពាក់ព័ន្ធ កម្ពុជាពិតជាមានការជោគជ័យក្នុងការកំណត់ប្រាក់ឈ្នួលអប្បបរមាសម្រាប់កម្មករនិយោជិត ក្នុងផ្នែកវាយនភ័ណ្ឌកាត់ដេរសម្លៀកបំពាក់ និងដេរស្បែកជើង ហើយលោកជឿជាក់ថា សម្រាប់ការកំណត់ប្រាក់ឈ្នួលឆ្នាំ២០១៦នេះ កម្ពុជាមុខជាទទួលបានភាពជោគជ័យផងដែរ”។
សម្រាប់ការធ្វើអធិការកិច្ចការងារ លោកSong Joung Jung ប្រធានគណៈប្រតិភូ ទទួលស្គាល់ថាពិតជាមានការលំបាក ដោយសារខ្វះការសហការពីនិយោជក។
លោក បន្តថាពលករកម្ពុជាធ្វើការនៅកូរ៉េទទួលបានការកោតសរសើរថាពូកែអត់ធ្មត់ ស្មោះត្រង់នឹងការងារ ហើយចំពោះស្ថិតិពលករកម្ពុជាខុសច្បាប់ធ្វើការនៅកូរ៉េ ក៏មានចំនួនតិចជាងគេផងដែរ។
ពាក់ព័ន្ធនឹងការស្នើសុំរបស់លោករដ្ឋមន្ត្រីលោកSong Joung Jung បានសន្យាថា នឹងនាំយកសំណើ និងលទ្ធផលនៃជំនួបក្នុងថ្ងៃនេះ ទៅជម្រាបជូន រដ្ឋមន្ត្រីក្រសួងការងារ និងមុខរបរនៃសាធារណរដ្ឋកូរ៉េ។
សំរាប់ឆ្នាំ២០១៦ភាគីកូរ៉េបានសម្រេចជ្រើសរើសពលករកម្ពុជាទៅធ្វើការនៅប្រទេសកូរ៉េប្រមាណ៥៧០០នាក់កើនជាងឆ្នាំ២០១៥នេះដែលត្រូវការពលករតែប្រមាណ៤០០០នាក់ប៉ុណ្ណោះ៕
រដ្ឋមន្ត្រីការងារស្នើឲ្យរដ្ឋាភិបាលកូរ៉េបង្កើនកូតាជ្រើសរើសពលករកម្ពុជាបន្ថែម
0 Comments