កំពង់ចាម ៖ ក្នុងរយៈពេល១ថ្ងៃ គ្រោះថ្នាក់ចរាចរណ៍បានកើតឡើងចំនួន២លើក បណ្ដាលឲ្យមនុស្ស១នាក់ស្លាប់នៅកន្លែងកើតហេតុ រីឯ២នាក់ទៀតរងរបួស ព្រមទាំងខូចខាតរថយន្តចំនួន៣គ្រឿង និងម៉ូតូ១គ្រឿងនៅក្នុងស្រុក២ នៅខេត្តកំពង់ចាម។
លោក កែវ ស៊ាងហន អធិការនគរបាលស្រុកព្រៃឈរបានឲ្យដឹងថា នៅថ្ងៃទី២១ ខែសីហា ឆ្នាំ២០១៥ វេលាម៉ោង១៥និង២៥នាទី នៅលើផ្លូវជាតិលេខ៧ ស្ថិតក្នុងភូមិអំពិលលើ ឃុំខ្វិតធំ ស្រុកព្រៃឈរ មានគ្រោះថ្នាក់ចរាចរណ៍បានកើតឡើងបង្កដោយរថយន្តហាយឡែនឌើរ ពណ៌ស ពាក់ស្លាកលេខ2AF7861 បើកបរដោយឈ្មោះ អ៊ី គឹមស្រ៊ាន ភេទប្រុស អាយុ៤៩ឆ្នាំ មានទីលំនៅភូមិស្គន់ ឃុំសូទិព្វ ស្រុកព្រៃឈរ ខេត្តកំពង់ចាម បើកក្នុងទិសដៅពីកើតទៅលិច។
លោកអធិការបន្តថា ពេលមកដល់កន្លែងកើតហេតុឈ្មោះ សេង យ៉េង ភេទប្រុស អាយុ៤៧ឆ្នាំ មានទីលំនៅនៅភូមិអំពិលធំ ឃុំខ្វិតធំ ស្រុកព្រៃឈរ បានបើកម៉ូតូC100កូរ៉េ ពណ៌ក្រហម គ្មានស្លាកលេខ បានជិះចេញពីហាងកាហ្វេមិនបានមើលមុខក្រោយ ក៏ត្រូវរថយន្តខាងលើបុកពីក្រោយបណ្ដាលឲ្យអ្នកបើកម៉ូតូឈ្មោះ សេង យ៉េង ស្លាប់នៅកន្លែងកើតហេតុតែម្ដង។
ចំណែកអ្នកបើករថយន្តត្រូវសមត្ថកិច្ចឃាត់ខ្លួនយកមកអធិការដ្ឋាននគរបាលស្រុកព្រៃឈរចាត់ការតាមផ្លូវច្បាប់។ នៅថ្ងៃទី២១សីហានេះដែរ ក៏មានគ្រោះថ្នាក់ចរាចរណ៍មួយលើកទៀតនៅស្រុកស្ទឹងត្រង់រវាងរថយន្ត និងរថយន្តផងដែរ។
លោក ជា ធារិទ្ធ អធិការនគរបាលស្រុកស្ទឹងត្រង់បានឲ្យដឹងថា នៅថ្ងៃទី២១សីហា វេលាម៉ោង២១និង០៥នាទី ចំណុចផ្លូវបំបែកនៅព្រះអង្គគុហ៌ ស្ថិតនៅភូមិបឹងកេតលើ ឃុំព្រែកកក់ ស្រុកស្ទឹងត្រង់ ខេត្តកំពង់ចាម មានគ្រោះថ្នាក់ចរាចរណ៍មួយបង្ករដោយរថយន្តនីសាន់ គ្មានស្លាកលេខបើកបរដោយឈ្មោះ ថេង ស៊ាងហាក់ ភេទប្រុស អាយុ២៤ឆ្នាំ ទីលំនៅនៅភូមិព្រែកសង្កែ ឃុំពាមប្រធ្នោះ ស្រុកស្ទឹងត្រង់ ខេត្តកំពង់ចាម ធ្វើដំណើរក្នុងទិសដៅពីជើងទៅត្បូង បានប៉ះទង្គិចជាមួយរថយន្តម៉ាកហ៊ីយាន់ដាយចំណុះ២តោនកន្លះ ពាក់ស្លាកលេខ3A3932 បើកបរដោយឈ្មោះ ឈិន ប៉េងស៊ាង ភេទប្រុស អាយុ៤៣ឆ្នាំ មានទីលំនៅនៅភូមិបែកអន្លូង ឃុំអាំរក្សត្នោត ស្រុកស្ទឹងត្រង់ខេត្តកំពង់ចាម ជារថយន្តសម្អាងការ ធ្វើដំណើរពីត្បូងទៅជើង(ច្រាសទិសគ្នា)។
លោកអធិការបានបញ្ជាក់ថា ក្នុងករណីគ្រោះថ្នាក់ចរាចរណ៍នេះ ភាគីទាំងសងខាងបានរងរបួស ត្រូវបញ្ជូនទៅមន្ទីរពេទ្យ។ រីឯរថយន្តទាំង២ត្រូវបានយកមករក្សាទុកនៅអធិការដ្ឋាន ដើម្បីបំពេញសំណុំឯកសារតាមនីតិវិធីច្បាប់៕
នៅខេត្តកំពង់ចាម ក្នុង១ថ្ងៃ គ្រោះថ្នាក់ចរាចរណ៍កើតឡើង២លើក
0 Comments