សៀមរាប ៖ ផ្ទះធ្វើពីឈើលើថ្មក្រោមមួយខ្នង ត្រូវបានអគ្គិភ័យឆាបឆេះអស់ទាំងស្រុង និងខូចខាតទ្រព្យសម្បត្តិមួយចំនួនធំ បណ្ដាលមកពីម្ចាស់ផ្ទះអុចធូប នៅថ្ងៃសីលហើយចុះទៅអង្គុយនៅផ្ទះបាយដោយមិនបានប្រុងប្រយ័ត្ន។
ហេតុការណ៍នេះកើតឡើងនៅវេលាម៉ោង១១ថ្ងៃទី២២ ខែសីហា ឆ្នាំ២០១៥ក្នុងភូមិថ្មី សង្កាត់ស្វាយដង្គំក្រុងសៀមរាប ខេត្តសៀមរាប។
សាក្សីនៅកន្លែងកើតហេតុបានឲ្យដឹងថា ម្ចាស់ផ្ទះគាត់បានអុជធូបនៅលើផ្ទះ ព្រោះជាថ្ងៃសីល ហើយក៏ចុះមកក្រោមផ្ទះ រួចដើរទៅផ្ទះបាយដើម្បីធ្វើម្ហូប។ សាក្សីបន្តថា គាត់បានឃើញផ្សែងហុយចេញពីលើផ្ទះ រួចក៏ផ្អើលឆោឡោ តែត្រូវបានភ្លើងឆាបឆេះអស់ក្លាយជាផេះផង់ ដោយរថយន្តអគ្គិភ័យមកជួយពន្លត់មិនទាន់។ លោកអនុសេនីយ៍ទោ ស៊ូ វ៉ាន់ដេត នាយប៉ុស្តិ៍នគរបាលសង្កាត់ស្វាយដង្គំ បានឲ្យដឹងថា ហេតុការណ៍នេះកើតឡើងដោយសារភ្លើងធូបដែលម្ចាស់ផ្ទះអុជហើយចុះមកផ្ទះបាយមិនបានប្រយ័ត្នក៏ឆាបឆេះតែម្តង។ លោកបន្តថា ម្ចាស់ផ្ទះមានឈ្មោះនឹម សឿម ភេទប្រុសអាយុ៥៥ឆ្នាំមុខរបរ ធ្វើស្រែ។ លោកបន្តថា ទ្រព្យសម្បត្តិខូចខាតរួមមាន ផ្ទះធ្វើពីឈើលើថ្មក្រោមមួយខ្នងទំហំ៦×៧ ,លុយចំនួន១ម៉ឺនដុល្លារ ,លុយខ្មែរ៤លានរៀល,មាស២ដំឡឹង,ប្លង់ដី១០ច្បាប់,និងសម្ភារៈមួយចំនួនទៀត។ លោកបន្ថែមទៀតថា នៅក្នុងហេតុការនោះដែរមិនមាននរណាម្នាក់រងរបួសនោះទេ ហើយក៏មិនមានឆាបឆេះរាលដាលទៅផ្ទះអ្នកជិតខាងនោះទេ ហើយនៅក្នុងហេតុការណ៍នោះដែរប្រើប្រាស់រថយន្តពន្លត់អគ្គិភ័យរបស់នគរបាលខេត្តសៀមរាប ចំនួន២គ្រឿង៕
អគ្គិភ័យលេបត្របាក់អស់ផ្ទះ១ខ្នង និងខូចខាតទ្រព្យ សម្បត្តិជាច្រើនទៀត(Update)
0 Comments