ភ្នំពេញ ៖ ជនសង្ស័យករណីលួចកង់ម្នាក់បានរត់គេចពីអធិការដ្ឋាននគរបាលខណ្ឌឫស្សីកែវកាលវេលាម៉ោង៨ព្រឹកថ្ងៃទី២៣ ខែសីហា ឆ្នាំ២០១៥ ដោយសារតែការធ្វេសប្រហែសរបស់សមត្ថកិច្ចមិនបានចាក់សោទ្វារគុក។
សេចក្ដីរាយការណ៍បានឲ្យដឹងថា ជនសង្ស័យនោះត្រូវបានសមត្ថកិច្ចនគរបាលប៉ុស្តិ៍ឫស្សីកែវធ្វើការឃាត់ខ្លួនបានកាលពីល្ងាចថ្ងៃទី២២ ខែសីហា ឆ្នាំ២០១៥ រួចយកទៅប្រគល់ជូនមន្ត្រីនៅអធិការនគរបាលខណ្ឌឫស្សីកែវ។ ប៉ុន្តែដោយសារតែការធ្វើប្រហែសរបស់មន្ត្រី ដែលមិនបានចាក់សោទ្វារគុកធ្វើឲ្យជនសង្ស័យនោះមានឱកាសរត់គេចខ្លួនបាត់កាលពីព្រឹកមិញនេះតែម្ដង។ ករណីនេះ សមត្ថកិច្ចកំពុងលាក់អត្តសញ្ញាណជនសង្ស័យ ដោយមិនបានបង្ហើបឲ្យដឹងនៅឡើយទេ។
សេចក្ដីរាយការណ៍បន្តទៀតថា ករណីនេះសមត្ថកិច្ចនគរបាលនៅអធិការដ្ឋាននគរបាលខណ្ឌឫស្សីកែវបានបន្ទោសលើសមត្ថកិច្ចប៉ុស្តិ៍ឫស្សីកែវថាយកជនសង្ស័យបញ្ចូលគុកហើយមិនព្រមចាក់សោទ្វារ។ ចំណែកខាងសមត្ថកិច្ចប៉ុស្តិ៍ក៏បន្ទោសខាងអធិការវិញថា ខាងខ្លួនបានយកទៅប្រគល់ឲ្យខាងអធិការហើយ តែមន្ត្រីខាងអធិការមិនព្រមចាក់សោទ្វារ។
គួរបញ្ជាក់ថា នេះជាលើកទី២ហើយ ដែលជនសង្ស័យបានរត់គេចចេញពីអធិការដ្ឋាននគរបាលខណ្ឌឫស្សីកែវ ដោយសារតែការធ្វើប្រហែសរបស់មន្ត្រីនៅទីនោះ។ លើកទី១. នៅឆ្នាំ២០១៤ គឺជនសង្ស័យ៣នាក់បានហែកគុករត់គេចខ្លួនបានសុវត្ថិភាព លើកទី២. គឺនៅព្រឹកថ្ងៃទី២៣ ខែសីហានេះឯង៕
ចាប់ចោរបានហើយញាត់ចូលគុក ភ្លេចចាក់សោ ចោររត់គេចខ្លួនបាត់
0 Comments