កោះកុង ៖ មានករណីគ្រោះថ្នាក់ចរាចរណ៍មួយបានកើតឡើងកាលពីវេលាម៉ោង៣និង៥នាទីល្ងាច ថ្ងៃទី២៣ ខែសីហា ឆ្នាំ២០១៥ ដោយមានរថយន្តដឹកទំនិញមួយគ្រឿងដែលគេដឹងថា ជារបស់ក្រុមហ៊ុនកៀធី បានបើកចុះចំណោទដាច់ប្រាំង រួចរេចង្កូតក្រឡាប់ផ្ងារជើងឡើងលើបណ្ដាលឲ្យមនុស្សចំនួន២នាក់ស្លាប់នៅនឹងកន្លែងភ្លាមៗ និងម្នាក់ទៀតរងរបួសធ្ងន់។
ហេតុការណ៍នេះបានកើតឡើងនៅចំណុចភូមិអន្លង់វ៉ាក់ ឃុំតាតៃក្រោម ស្រុកកោះកុង ខេត្តកោះកុង។
បើតាមសាក្សី ដែលបានឃើញហេតុការណ៍ បានឲ្យដឹងថា មុនពេលកើតហេតុគេឃើញរថយន្តដឹកទំនិញម៉ាកយីឌុប ពណ៌ត្រួយចេក ពាក់ស្លាកលេខភ្នំពេញ3B.3943 បើកពីលិចមកកើត ស្រាប់តែមកដល់ចំណុចកើតហេតុ រថយន្តបានចុះចំណោទយ៉ាងលឿន ប្រហែលជាដាច់ហ្វ្រាំងក៏បានរេចង្កូតកាច់ក្រឡាប់តែម្តង។ សាក្សីបានបន្តថា រថយន្តខាងលើជារបស់ក្រុមហ៊ុនកៀធីគ្រុប បើកបរដោយឈ្មោះ យ៉ាន់ រីណែត ភេទប្រុស អាយុ៤០ឆ្នាំ ជនជាតិខ្មែរ មានទីលំនៅភូមិចេកធ្លក ឃុំត្រពាំងស្រែ ស្រុកមេសាង ខេត្តព្រៃវែង (ស្លាប់នៅនឹងកន្លែងកើតហេតុ) និងអ្នករួមដំណើរឈ្មោះអ៊ូ វ៉ុន ភេទប្រុស អាយុ៤៦ឆ្នាំ ជនជាតិខ្មែរ មានទីលំនៅភូមិព្រៃសណ្ដែក ឃុំព្រៃសន្លឹក ស្រុកទ្រាំង ខេត្តតាកែវ (ស្លាប់នៅនឹងកន្លែង) រួមទាំងជនម្នាក់ទៀតពុំស្គាល់ឈ្មោះបានរងរបួសធ្ងន់ ហើយសមត្ថកិច្ចបានបញ្ជូនទៅកាន់មន្ទីរពេទ្យបង្អែកខេត្តកោះកុងដើម្បីសង្គ្រោះបន្ទាន់។
ក្រោយកើតហេតុសមត្ថកិច្ចបានហៅរថយន្តស្ទូច ដើម្បីជួយសង្គ្រោះជនរងគ្រោះ៕
រថយន្តដឹកទំនិញចុះចំណោទក្រឡាប់ស្លាប់មនុស្ស២នាក់ និងរបួសធ្ងន់ម្នាក់
0 Comments