កំពង់ស្ពឺ ៖ នៅព្រឹកថ្ងៃទី២៣ ខែសីហា ឆ្នាំ២០១៥នេះ លោក ច័ន្ទថេត ថានរះ នាយខណ្ឌរដ្ឋបាលព្រៃឈើកណ្ដាល និងសហការី បាននាំកូនឈើចំនួន៥៣៨០ដើម យកមកប្រគេនព្រះសង្ឃ នៅពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា ស្ថិតនៅភូមិស្រះពោធិន៌ ឃុំផ្សារដែក ស្រុកពញាឮ ខេត្តកណ្ដាល។
នៅក្នុងពិធីដាំកូនឈើនេះគេសង្កេតឃើញមានការចូលរួមដាំពីលោកយាយជី តាជី៣៣៨នាក់និង ព្រះសង្ឃ៨៥អង្គ ហើយកូនឈើទាំងនោះរួមមាន គ្រញូង,បេង, នាងនួន, ធ្នង់, កកោះ, គគីរ,ឈើទាល និងលឿងរាជ។
ដែលពិធីនេះធ្វើឡើងក្នុងគោលបំណង ដើម្បីចូលរួមអបអរសាទរបុណ្យរុក្ខទិវា៩ កក្កដា ការចូលរួមការពារបរិស្ថាន ដើម្បីជាម្លប់ និងទាក់ទាញទឹកភ្លៀងជារបាំងការពារខ្យល់ និងទុកសម្រាប់កូនចៅជំនាន់ក្រោយបានស្គាល់ ជាពិសេសសម្រាប់ព្រះសង្ឃសម្រាប់ធ្វើជាព្រៃធុតង្គបដិបត្តិធម៌។
លោក ច័ន្ទថេត ថានរះ នាយខណ្ឌរដ្ឋបាលព្រៃឈើកណ្ដាលបានលើកឡើង ថាការដាំឈើនៅក្នុងនៅពុទ្ធមណ្ឌលវិបស្សនាធុរៈនៃព្រះរាជា ណាចក្រកម្ពុជានាថ្ងៃនេះ ធ្វើឡើងដើម្បីអបអរបុណ្យរុក្ខទិវា ៩កក្កដា និងលើកកម្ពស់ស្មារតីដល់ ព្រះសង្ឃដូនជីតាជីស្រឡាញ់ព្រៃឈើ និងចូលរួមបំផុសដល់ពុទ្ធបរិស័ទលើវិស័យព្រៃឈើក្នុងការចូលរួមកែលំអ បរិស្ថានជាតិនិងបានលើកកម្ពស់ដល់ ទីធ្លា ក្នុងពុទ្ធមណ្ឌលវិបស្សនាធុរៈ ឲ្យមាន សោភណ្ឌភាពស្រស់បំព្រងធានាដល់ម្លប់ សម្រាប់ព្រះសង្ឃដូនជីតាជី សម្រាកលំហែកាយ និងធ្វើជាព្រៃធុតង្គបដិបត្តិធម៌ថែមទៀតផងដែរ។
នាយខណ្ឌបានបន្តថា កូនឈើយកមកដាំពេលនេះ ដើម្បីរួមចំណែកក្នុង កិច្ចថែរក្សា ការពារ បរិស្ថានឲ្យបានល្អ និងបង្កើនសោភ័ណភាព ប្រកបដោយ ពណ៌បៃតងស្រស់ បំព្រង និងកាត់បន្ថយជាតិពុលក្នុងបរិយាកាស ដែលជាកាក សំណល់ បញ្ចេញពី គ្រឿងចក្រ យានយន្តតូច-ធំគ្រប់ប្រភេទ។
មិនតែប៉ុណ្ណោះនាយខណ្ឌរដ្ឋបាលព្រៃឈើកណ្ដាល ដែលបានយក កូនឈើ ៥៣៨០ដើមបានសម្ដែងក្តីរីករាយចំពោះព្រះសង្ឃដូនជីតាជី ដែលបានយកចិត្តទុកដាក់នាំ សហការជាមួយកំលាំងរដ្ឋាបាលព្រៃឈើ ក្នុងមូលដ្ឋាន សម្រាប់ដាំ នាពេលនេះ ក្នុងនោះជារៀងរាល់ឆ្នាំក៏ បានសង្កេតឃើញមានការដាំតាមនៅ ទីសាធារណៈជាច្រើននិងទីអារាមផងដែរ៕
ព្រះសង្ឃដូនជីតាជីបានដាំឈើគ្រប់ប្រភេទ៥៣៨០ដើម នៅស្រុកពញាឭ
0 Comments