វង្ស ណ​យ និង ឡៅ ស៊ី​ណាត ជួប​ថៃ​លើក​ទី​២​ក្នុង​ជម្រុះ​ខ្សែក្រវាត់​ខា​រ៉ា​បាវ

ប្រដាល់ ៖ អ្នក​ប្រដាល់​ជើង​ខ្លាំង​របស់​កម្ពុជា​២​រូប គឺ​វង្ស ណ​យ អ្នក​ប្រដាល់​ក្លិប​ខេត្ត​ប៉ៃលិន និង​ ឡៅ ស៊ី​ណាត អ្នក​ប្រដាល់​ក្លិប​កងពលតូច​ទ័ព​ឆ័​ត្រ​យោង​៩១១ នឹង​ប្រកួត​ជាមួយ​អ្នក​ប្រដាល់​ថៃ​លើក​ទី​២ នា​យប់​ថ្ងៃអាទិត្យ​ទី​២៣ ខែ​សីហា ឆ្នាំ​២០១៥​នេះ នៅ​លើ​សង្វៀន​បាយ័ន​ស្ទឹងមានជ័យ ក្នុង​ព្រឹត្តិការ​ណ៍​ជម្រុះ​ដណ្ដើម​ខ្សែក្រវាត់​ខា​រ៉ា​បាវ​វគ្គ​II ទម្ងន់​៦៩​គីឡូក្រាម។​

វង្ស ណ​យ នឹង​ត្រូវ​ជួប​ប្រកួត​ជាមួយ​អ្នក​ប្រដាល់​ថៃ​Plangchork Or.Yuthachai។ អ្នក​ប្រដាល់​ថៃ​រូប​នេះ​ខ្លាំង​គួរសម​ដែរ តែ​កាលពី​ប្រកួត​លើក​ទី​១ គេ​ត្រូវ​ បឺត ខាំ អ្នក​ប្រដាល់​ជើង​ខ្លាំង​របស់​កម្ពុជា​យើង​បំបាក់​ឲ្យ​សន្លប់​ក្នុង​ទឹក​ទី​៣។

Plangchork Or.Yuthachai វាយ​ចាញ់​ បឺត ខាំ ដោយ​ផុយ​បែបនេះ មក​ប៉ះ​ជាមួយ ​វង្ស ណ​យ ក៏​មិន​ជា​ធានា​ប៉ុន្មាន​ដែរ ព្រោះ​ វង្ស ណ​យ គេ​ខ្លាំង ​និង​មាន​ផ្លែ​ល្អ​ជាង​បឺត ខាំ​ ទៅទៀត។ ប៉ុន្តែ​យ៉ាង​ណា អ្នក​ប្រដាល់​ថៃ​រូប​នេះ គ្រាន់តែ​ភ្លាត់ស្នៀត​ជាមួយ ​បឺត ខាំ​ប៉ុណ្ណោះ ហើយ​សម្រាប់​ការ​ជួប ​វង្ស ណ​យ​ នេះ អាច​ថា​គេ​មានការ​ប្រុងប្រយ័ត្ន​ជាង​មុន ដែល​ធ្វើ​ឲ្យ វង្ស ណ​យ ពិបាក​សង្ឃឹម​ឈ្នះ​នោះ។ អ្នក​ប្រដាល់​ថៃ​រូប​នេះ មាន​កំណត់​ត្រា​ប្រកួត​តែ​ចំនួន​១១១​លើក​ប៉ុណ្ណោះ ឈ្នះ​៩៣​លើក ចាញ់​១៧​លើក ស្មើ​០១​លើក និង​ធ្លាប់​វាយ​ដៃគូ​ឲ្យ​សន្លប់​១៨​លើក​ឯណោះ។

យ៉ាងណា​ បើ​ធៀប​ជាមួយ​ប្រវត្តិ​ប្រកួត​របស់​ វង្ស ណ​យ គឺ​នៅតែ​តិច​ជាង​ដែរ ដោយ ​វង្ស ណ​យ មាន​កំណត់​ត្រា​ប្រកួត​រហូតដល់​១២៩​លើក ឈ្នះ​៩៤​លើក ចាញ់​៣២​លើក និង​ស្មើ​៣​លើក។​ ទោះជា​យ៉ាងណា ជើង​ខ្លាំង​ វង្ស ណ​យ កាលពី​ប្រកួត​លើក​ទី​១ គេ​ត្រូវ​អ្នក​ប្រដាល់​ថៃ​JongangFight វាយ​សន្លប់​ក្នុង​ទឹក​ទី​៤។ ដូច្នេះ ​វង្ស ណ​យ មិន​អាច​មើលងាយ Plangchork Or.​Yuthachai បាន​ឡើយ។ ចាំ​មើល វង្ស ណ​យ អាច​រក​បាន​៣​ពិន្ទុ​ពី​ការប្រកួត​ជាមួយ Plangchork Or.Yuthachai នេះ​ដែរ​ឬ​អត់។

ឡៅ ស៊ី​ណាត អ្នក​ប្រដាល់​ជើង​ខ្លាំង​របស់​កម្ពុជា នៅ​ក្លិប​កងពលតូច​ទ័ព​ឆ័​ត្រ​យោង​៩១១ នឹង​ជួប​ជាមួយ​អ្នក​ប្រដាល់​ថៃ​ឈ្មោះ Klakhunserk ChompeaTou ។ អ្នក​ប្រដាល់​ថៃ​រូប​នេះ​កាលពី​ជុំ​ទី​១ ក៏​បាន​វាយ​ឈ្នះ​ ពេជ្រ សីហា អ្នក​ប្រដាល់​សមាគម​ក្រសួងការពារជាតិ​ដោយ​ពិន្ទុ​ដែរ។​

Klakhunserk ChompeaTou ខ្ពស់​ជាង ​ស៊ី​ណាត គឺ​មាន​កម្ពស់​១,៧៧​ម៉ែត្រ ក្នុង​ខណៈ​ ស៊ីណាត​កម្ពស់​១,៦៨​ម៉ែត្រ គឺ​ខ្ពស់​ជិត​មួយ​តឹក។ ឯ​កំណត់ត្រា​ប្រកួត ក៏​ថៃ​លើស​ច្រើន​ដែរ គឺ Kla Khunserk គេ​ប្រកួត​បាន​១២៦​ដង ឈ្នះ​៩៥​ដង ចាញ់​២៣​ដង ស្មើ​០៨​ដង និង​ធ្លាប់​ផ្ដួល​ដៃគូ​ឲ្យ​សន្លប់​បាន​០៦​ដង ។ ទោះជា​យ៉ាងណា កំណត់ត្រា​ប្រវត្តិ​ប៉ុណ្ណឹង ក៏​មិន​ប្រាកដ​ថា​អាច​ឈ្នះ​ ស៊ី​ណាត ​បាន​ដែរ។ ​

ឡៅ ស៊ី​ណាត គេ​ប្រកួត​ជាមួយ​ថៃ​ច្រើន​គួរសម​ដែរ។​ គ្រាន់តែ​ជួប​ប្រកួត​ក្នុងស្រុក​ចំនួន​ចំនួន​១៧​នាក់ ដោយ​វាយ​ឈ្នះ​ថៃ​១២​នាក់ ចាញ់​០៥ និង​មិនដែល​ស្មើ។ ស៊ី​ណាត ខ្លាំង​កណ្ដាប់ដៃ​ និង​ជើង ហើយ​ប៉ិនប្រសប់​ប្រើ​ជង្គង់​ថែមទៀត។ ជា​មួយ​នេះ គេ​ក៏​មាន​ភាព​អំណត់​ខ្ពស់ និង​មាន​កម្លាំង​គ្រប់​សម្រាប់​តស៊ូ​បាន​៥​ទឹក។ ឡៅ ស៊ី​ណាត មាន​ប្រវត្តិ​ប្រកួត​ចំនួន​៩៩​ដង ឈ្នះ​៧៧​ដង ចាញ់​១៧​ដង និង​ស្មើ​០៥​ដង។​

Kla Khunserk ធ្លាប់​ជួប​ និង​វាយ​ចាញ់​ពិន្ទុ​ ឡៅ ស៊ី​ណាត ១​ដង​ហើយ​កន្លងមក។ ដូច្នេះ ឡៅ ស៊ី​ណាត ប្រហែលជា​ពុំ​ពិបាក​ក្នុង​ការ​រក​៣​ពិន្ទុ​នោះ​ទេ។​ តែ​យ៉ាងណា ឡៅ ស៊ី​ណាត​ មិន​អាច​មើល​ស្រាល Kla Khunserk បានទេ សម្រាប់​ការ​ជួប​ប្រកួត​គ្នា​នេះ។​ ទោះជា​យ៉ាងណា រវាង​ ឡៅ ស៊ី​ណាត និង Kla Khunserk នេះ ការ​ឈ្នះ​ចាញ់ គឺ​មិន​អាច​ទស្សន៍ទាយ​មុន​បាន​ឡើយ។

ព្រឹត្តិការណ៍​ប្រដាល់​ដណ្ដើម​ខ្សែក្រវាត់​ខា​រ៉ា​បាវ​វគ្គ​២ ទម្ងន់​៦៩​គីឡូក្រាម​នេះ មាន​អ្នក​ប្រដាល់​ជើង​ខ្លាំង​កម្ពុជា​៤​រូប និង​អ្នក​ប្រដាល់​ជើង​ខ្លាំង​ថៃ​៤​រូប ដើម្បី​វាយ​ដណ្ដើម​យក​ខ្សែក្រវាត់​របស់​ភេសជ្ជៈ​ខា​រ៉ា​បាវ​២០១៥ ដែល​មាន​ទឹកប្រាក់​រង្វាន់​អម​ចំនួន​៥.០០០​ដុល្លារ សម្រាប់​អ្នកឈ្នះ​តំណែង​ជើងឯក ។

អ្នក​ប្រដាល់​ជើង​ខ្លាំង​ទាំង​៤​រូប​របស់​កម្ពុជា​នោះ គឺ វង្ស ណ​យ ក្លិប​កីឡាប្រដាល់​ខេត្ត​ប៉ៃលិន- ឡៅ ស៊ី​ណាត ក្លិប​កងពលតូច​ទ័ព​ឆ័​ត្រ​យោង​៩១១-​ពេជ្រ សីហា ក្លិប​ក្រសួងការពារជាតិ និង​ពេជ្រ សីហា សមាគម​កីឡា​ក្រសួងការពារជាតិ​កីឡា។​

ចំពោះ​អ្នក​ប្រដាល់​ជើង​ខ្លាំង​ថៃ​ទាំង​៤​រូប​វិញ មាន Watcharalek Or. Kwanmoueng–Jonganfight Jongsnangwin-Kla Khunserk-Kla Khuserk Chomoea និង​Plangchor Or.Yuc hchai។​

មក​ដល់​ពេល​នេះ ឡៅ ស៊ី​ណាត និង វង្ស ណ​យ ពួកគេ​ទាំងពីរ​នាក់​នេះ ទើបនឹង​បាន​១​ពិន្ទុ​ទេ ដោយ​ទើប​ប្រកួត​បាន​មួយ​ប្រកួត​នោះ ចំណែក​ បឺត ខាំ គេ​បាន​៦​ពិន្ទុ​ ក្នុង​២​ប្រកួត ខណៈ​ដែល​ពេជ្រ​ សីហា ​បាន​២​ពិន្ទុ ក្នុង​២​ប្រកួត៕

​

វង្ស ណ​យ និង ឡៅ ស៊ី​ណាត ជួប​ថៃ​លើក​ទី​២​ក្នុង​ជម្រុះ​ខ្សែក្រវាត់​ខា​រ៉ា​បាវ