ប្រដាល់ ៖ អ្នកប្រដាល់កម្ពុជា ឃីម ឌីម៉ា ក្លិបរស្មីភូមិគាបខេត្តបន្ទាយមានជ័យ បានត្រឹមតែស្មើជាមួយ Chheang Krai អ្នកប្រដាល់ជនជាតិថៃប៉ុណ្ណោះ ក្នុងការជួបគ្នានៅលើសង្វៀនSEA-TV កាលពីរសៀលថ្ងៃអាទិត្យ ទី២៣ ខែសីហា។
ឃីម ឌីម៉ា បានស្មើជាមួយChheang Krai នេះ ចាត់ទុកថាជាសំណាងល្អហើយ ព្រោះបើតាមការកត់សម្គាល់នៅក្នុងការប្រកួតរបស់គេជាមួយអ្នកប្រដាល់ថៃនោះ គឺ ឌីម៉ា មានតែចាញ់ប្រៀបគេ មិនមានប្រៀបឈ្នះលើChheang Krai នោះឡើយក្នុងការប្រកួតគ្នា៥ទឹកនោះ។
Chheang Krai ធ្លាប់មកប្រកួតនៅសង្វៀនSEA-TVម្តងហើយ កាលពីថ្ងៃទី២៨ ខែមិថុនា ឆ្នាំ២០១៥ ដោយវាយចាញ់ ឯម វិចិត្រ អ្នកប្រដាល់ក្លិបឫទ្ធីពោធិសែនជ័យក្នុងទឹកទី៤ ។ អ្នកប្រដាល់ថៃនេះ ចាញ់ វិចិត្រ ពេលនោះដោយសារតែគេវាយខុសលក្ខន្តិកៈប្រកួតតែប៉ុណ្ណោះ ដោយវាយកែងថែមទៅលើក្បាលផ្នែកខាងក្រោយរបស់ ឯម វិចិត្រ ធ្វើឲ្យអាជ្ញាកណ្តាលពិន័យឲ្យចាញ់តែម្តង។
សម្រាប់ការប្រកួតជាមួយ ឃីម ឌីម៉ា លើកនេះ Chheang Krai ក៏មានប្រៀបឈ្នះលើ ឌីម៉ា ដែរ ដោយគេបានវាយចេញបានច្រើន និងចំគោលដៅបានច្រើនជាងការវាយចេញរបស់ ឌីម៉ា។ តែយ៉ាងណា អ្នកប្រដាល់ថៃរូបនេះ ក៏មិនឈ្នះ ឌីម៉ា ដាច់ដែរ ទើបគណៈកម្មការឲ្យស្មើគ្នាតែម្តងទៅ។
សេក គឹមផៃ អ្នកប្រដាល់ក្លិបអង្គរមានជ័យខេត្តសៀមរាប គេប្រកួតចាញ់អ្នកប្រដាល់ថៃ RE DA ដោយពិន្ទុ បន្ទាប់ពីពួកគេទាំងពីរ ប្រកួតគ្នាប្រាំទឹកពេញនោះ។
ជាការបរាជ័យលើកទី១របស់ គឹមផៃ ហើយ ដែលប្រកួតចាញ់អ្នកប្រដាល់ថៃ នៅសង្វៀនភ្នំពេញនេះ។ នៅក្នុងស្រុក គឹមផៃ ជាអ្នកប្រដាល់ដែលវាយមិនចេះខ្លាច និងមិនសូវដែលស្គាល់ពាក្យថាចាញ់នោះទេ។
RE DA គេជាអ្នកប្រដាល់សកលអាជីពទេ។ ក្នុងវ័យ៤០ឆ្នាំទៅហើយ RE DAនៅតែរហ័ស និងខ្លាំង។ ទម្ងន់ជើងទាត់របស់គេខ្លាំង និងធ្ងន់ ធ្វើឲ្យ គឹមផៃ ពិបាកទប់ទល់ដែរ។ ដូច្នេះហើយ ទើប គឹមផៃចាញ់ពិន្ទុ RE DA នោះ។
ចំពោះការប្រកួតរវាងអ្នកប្រដាល់រួមជាតិវិញ តក់ សោភ័ណ្ឌ អ្នកប្រដាល់ក្លិបម្កុដរាជសីហ៍ ប្រកួតចាញ់ ឆៃ សារ៉ា អ្នកប្រដាល់សមាគមកីឡាក្រសួងការពារជាតិដោយពិន្ទុ។
តក់ សោភ័ណ្ឌ ត្រូវ ឆៃ សារ៉ា វាយកែងបែកលើកភ្នែកខាងឆ្វេងក្នុងទឹកទី២ និងបែកមួយកន្លែងទៀតក្នុងទឹកទី៣ ដោយសារតែកែងរបស់សារ៉ា។
ភួង ពិសិដ្ឋ អ្នកប្រដាល់ក្លិបតាឡីដំរីមានរិទ្ធ វាយឈ្នះ អៀម ដាវុធ អ្នកប្រដាល់ក្លិបកងទ័ពជើងទឹក ក្នុងទឹកទី៥។
*សង្វៀនBlack Cat
អ្នកប្រដាល់ចេង គា ក្លិបសាលវ័ន្តកីឡា ប្រកួតចាញ់ គង់ សំបូរ អ្នកប្រដាលសមាគមកីឡាក្រសួងការពារជាតិ ក្នុងទឹកទី៤ ក្នុងការប្រកួតគ្នាក្នុងទម្ងន់៦០គីឡូក្រាម នៅយប់ថ្ងៃអាទិត្យ ទី២៣ ខែសីហា ២០១៥នេះ នៅកម្មវិធីប្រដាល់Black Cat លើសង្វៀនSEA-TV។
ចេង គា ជាអ្នកប្រដាល់ដែលមិនមានឈ្មោះល្បីអីទេ។ ក្នុងការប្រកួតជាមួយសំបូរនេះ ចេង គា ត្រូវ សំបូរ ទាត់ប៊ិះៗតែសន្លប់។ ក្នុងទឹកទី២ ចេង គា ត្រូវអាជ្ញាកណ្តាលរាប់៨ម្តង ដោយសារតែឈឺសន្លាក់កែងដៃស្តាំ ហើយមកដល់ទឹកទី៣ គេត្រូវរាប់៨ម្តងទៀត និងមកដល់ទឹកទី៤ ចេង គា ក៏បោះបង់ការប្រកួតតែម្តង។
គុន សំណង អ្នកប្រដាល់នៃក្លិបគីសែមានរិទ្ធ ប្រកួតឈ្នះ គួន ប៊ុនហ៊ីម អ្នកប្រដាល់មកពីក្លិបពន្លឺសាមគ្គី ខេត្តបាត់ដំបងដោយពិន្ទុ។ សិទ្ធ ចន្ទ្រា អ្នកប្រដាល់ក្លិបសាមគ្គីកូនខ្មែរ ប្រកួតឈ្នះ សូត្រ ខេវិន អ្នកប្រដាល់ក្លិបបក្សីស្លាបដែកដោយពិន្ទុដែរ។ ឯ ចាប សុភា អ្នកប្រដាល់ក្លិបតាឯកដំបងដែកមានរិទ្ធ ប្រកួតឈ្នះ ង៉ែត្រ បូរិន អ្នកប្រដាល់ក្លិបពន្លឺសាមគ្គីខេត្តបាត់ដំបងដោយពិន្ទុដែរ។
*ចាន់ ប៊ុនថឿន ឈ្នះ ង៉ែត រដ្ឋា លើសង្វៀនK.Cement
អ្នកប្រដាល់ចំណូលថ្មី ចាន់ ប៊ុនហឿន ក្លិបនិរោធមានជ័យ បានផ្តួលយកឈ្នះអ្នកប្រដាល់ជើងចាស់ ង៉ែត រដ្ឋា ក្លិបតាព្រហ្មមានជ័យដោយពិន្ទុ ក្នុងការជួបគ្នាលើសង្វៀន K. Ce ment កម្មវិធីប្រដាល់SEA-TV កាលពីព្រឹកថ្ងៃអាទិត្យ ទី២៣ ខែសីហា ឆ្នាំ២០១៥។
ង៉ែត រដ្ឋា ប្រកួតចាញ់ពិន្ទុ ចាន់ ប៊ុនហឿន ដាច់តែម្ដង ដោយក្នុងប្រាំទឹករដ្ឋាចេញកណ្តាប់ដៃបានតែមួយទឹកទី៣មួយប៉ុណ្ណោះ ក្រៅពីហ្នឹងគឺអត់ចេញរួចតែម្តង។
អ្នកប្រដាល់ បឺត វ៉ាន់ឌី ក្លិបរ៉ាហាប់ស្វាយប៉ាក បានឈ្នះលើគូប្រកួតរបស់គេ គឺ ឆេង លាង ក្លិបកងពលតូចទ័ពឆ័ត្រយោង៩១១ នៅក្នុងទឹកទី២។ វ៉ាន់ឌី ឈ្នះដោយហេងបំផុត ព្រោះក្នុងការប្រកួតទឹកទី២នេះ ឆេង លាង វាយបុកកែងមកលើ សឹងតែមិនអាចការពារបាន តែសំណាងគេបានបញ្ជូនកែងយ៉ាងប្រថុយ ទៅលើមុខ ឆេង លាង បណ្តាលឲ្យឆេង លាង ដួលសន្លប់ធំតែម្តងនៅក្នុងទឹកទី២នោះ។
ស្ថានភាពនៃការប្រកួត ឆេង លាង ហាក់ដូចជាមានប្រៀបជាងតែនៅទឹកទី២ ដោយសារតែឃើញគូប្រកួតចាញ់ប្រៀបខ្លួននោះ ឆេង លាង ព្យាយាមសម្រុកចូល តែភ្លាត់ស្នៀតត្រូវកែង វ៉ាន់ ឌីមួយទំហឹងបណ្ដាលឲ្យសន្លប់ក្រោកលែងរួច។
ម៉ន ខួច ក្លិបការិយាល័យទី៥ កងទ័ពជើងគោក ប្រកួតឈ្នះ សំរាំង ភក្តី ក្លិបព្រៃទទឹងកីឡាខេត្តបាត់ដំបងដោយពិន្ទុដាច់តែម្ដង។ ភក្ដី ត្រូវអាជ្ញាកណ្ដាលរាប់៨នៅទឹកទី៣ និងទឹកទី៤ តែគេខំតស៊ូរហូតចប់ទឹកទី៥ ដោយសុខចិត្តចាញ់ពិន្ទុម៉ន ខួច។ ចំណែក ម៉ឺន សៃ ក្លិបកងយោធពលខេមរភូមិន្ទ សងសឹកជាមួយ ណឿ កូប ក្លិបតាព្រហ្មមានជ័យមិនបានសម្រេចនោះទេ។
*រឿម វណ្ណះ ឈ្នះគឹម វាសនា យ៉ាងវេទនា
អ្នកប្រដាល់ គឹម វាសនា ក្លិបកងពលតូចទ័ពឆ័ត្រយោង៩១១ បានធ្វើឲ្យអ្នកប្រដាល់ជើងចាស់ រឿម វណ្ណៈ សមាគមប្រដាល់ក្រសួងការពារជាតិមានរបួស២កន្លែងនៅក្នុងការប្រកួតនាល្ងាចថ្ងៃទី២២ ខែសីហាលើសង្វៀន SEA-TV។
គ្មាននរណានឹកស្មានដល់ថា វាសនា អាចជាដៃគូជាមួយ រឿម វណ្ណៈ នោះឡើយ។ តែសម្រេចសម្រួលទៅ វាសនា បានធ្វើឲ្យ រឿម វណ្ណះ បែកឈាម និងក្តៅស្លឹកត្រចៀក ដោយសារវាសនា ប្រើកែង ធ្វើឲ្យ វណ្ណៈ មានរបួសលើចិញ្ចើមទាំងសងខាង។ តែនៅដើមទឹក៣ វាសនាភ្លាត់ស្នៀតត្រូវមួយកែងរបស់ វណ្ណៈ បណ្ដាលឲ្យដួលបះជើង ហើយត្រូវអាជ្ញាកណ្ដាលរាប់៨ ទើបបន្តការប្រកួតបានទៀត។
អ្នកប្រដាល់ទាំង២រូបនេះប្រកួតគ្នា៥ទឹកពេញ ហើយ រឿម វណ្ណៈ បានទទួលជ័យជំនះលើ គឹម វាសនាដោយពិន្ទុទាំងវេទនា។
ប៊ី ចាន់ណា អ្នកប្រដាល់ក្លិបព្រះខ័នរាជប្រកួតឈ្នះ ស៊ូ ពី ក្លិបពោធិ៍ជ័យកីឡានៅទឹកទី៣។ អ្នកប្រដាល់ទាំង២រូបនេះប្រកួតគ្នាក្នុងប្រភេទទម្ងន់៦០គីឡូក្រាម។
ស៊ូ ពី ត្រូវអាជ្ញាកណ្ដាលរាប់ ៨ នៅទឹកទី១ និងទី៣ ហើយទីបញ្ចប់អាជ្ញាកណ្ដាល នួន បូរ៉ាបង្ខំចិត្តបញ្ចប់ការប្រកួតមុនស្នូរជួងបញ្ចប់ទឹកទី៣ ដោយសារតែ ស៊ូ ពី គ្មានសមត្ថភាព។
សេង កំសត់ ក្លិបគីសែមានរិទ្ធសន្លប់នៅទឹកទី៤ ដោយសារជង្គង់ គឿម សុវណ្ណនឿត ក្លិបឃ្លាំងមឿងកីឡា។ ធន តារ៉ា ក្លិបកងយោធពលខេមរភូមិន្ទប្រកួតចាញ់ពិន្ទុ គីន ធារ៉ា ក្លិបរស្មីកុមារកំព្រាដោយពិន្ទុ និងប៊ី ឆានី ក្លិបកងពល តូចលេខ៤១ សន្លប់នៅទឹកទី២ ដោយសារជង្គង់ រឿង ធារិនក្លឹបគុនខ្មែរអង្គរ៕
ខ្មែរស្មើ១ ចាញ់១ ក្នុងការប្រកួតជាមួយថៃនៅSEA-TV
0 Comments