បាត់ដំបង ៖ ជនរងគ្រោះម្នាក់បានរងរបួសនៅត្រង់ក្បាលចំនួន៤ថ្នេរ បន្ទាប់ពីមានការផឹកស៊ីស្រវឹងស្រឿងៗកាលពីវេលាម៉ោង៧និង៣០នាទីយប់ ត្រង់ចំណុចភូមិអូរមុនី១ ឃុំអន្លង់វិល ស្រុកសង្កែ ខេត្តបាត់ដំបង ហើយបានប៉ះទង្គិចនូវពាក្យសម្តី ក៏ត្រូវភាគីម្ខាងកាំបិតប៉័ងតោកាប់តម្រង់ក្បាលតែម្តង តែជាសំណាងល្អបានបងប្អូនជួយចាប់ទាន់។
លោកមួ ឡាន អធិការរងស្រុកសង្កែទទួលបន្ទុកការងារយុត្តិធម៌បានបញ្ជាក់ថា កន្លងមកជនទាំងពីរនាក់នេះធ្លាប់មានទំនាស់នឹងគ្នាផង លុះនៅមុនពេលកើតហេតុជនទាំងពីរនាក់នេះបានផឹកស៊ីនៅវង់ផ្សេងគ្នា ដែលមានចម្ងាយប្រហែលមួយរយម៉ែត្រពីគ្នាគឺជនបង្កផឹកនៅផ្ទះ រីឯជនរងគ្រោះផឹកនៅក្នុងតៀមស្រា ដោយមានបក្ខពួករៀងៗខ្លួន។
លោកអធិការរងបានបន្តថា នៅពេល ដែលពួកគេចាប់ផ្ដើមស្រវឹង គឺបក្ខពួករបស់ជនរងគ្រោះបានដើរសំដៅទៅផ្ទះរបស់ជនបង្ករហូតបង្កើតជាបញ្ហា ដោយឃើញសភាពបែបនេះជនរងគ្រោះដែលមានឈ្មោះថោង តាំងហូ ភេទប្រុស អាយុ២៦ឆ្នាំ បានទៅតាមហៅបក្ខពួករបស់ខ្លួនឲ្យត្រឡប់មកកន្លែងផឹកស៊ីវិញ។ ប៉ុន្តែនៅពេលដែលជនល្មើសឈ្មោះវ៉េត ណាត់ ហៅគក់ ភេទប្រុស អាយុ១៩ឆ្នាំបានឮសំឡេងមនុស្ស ដែលខ្លួនធ្លាប់មានទំនាស់ពីមុនមក ទើបធ្វើឲ្យគំនុំចាស់បានរើឡើងវិញយ៉ាងឆាប់រហ័សរហូតស្ទុះទៅទាញកាំបិតប៉័ងតោពីចង្ក្រានបាយមកបម្រុងនឹងកាប់ក្បាល តែត្រូវបានម្ដាយលើកដៃចាប់ទើបធ្វើឲ្យកាំបិតនោះជ្រុះពីដៃធ្លាក់ទៅត្រូវក្បាលជនរងគ្រោះតែម្ដង ដែលត្រូវព្យាបាលអស់ចំនួន៤ថ្នេរ។
បន្ទាប់ពីបានឃាត់ខ្លួនទាំងយប់យកមកកាន់អធិការដ្ឋានដើម្បីសាកសួររួចមកទើបដឹងថាជនទាំងពីរនាក់នេះធ្លាប់មានគំនុំពីមុនមក ដោយសារទំនាស់ក្នុងពេលផឹកស៊ីផងដែរ ទើបមានរឿងរ៉ាវកើតឡើងបែបនេះ ដោយអ្នកទាំងពីរត្រូវជាបងប្អូនជីដូនមួយនឹងគ្នាផង ប៉ុន្តែជនសង្ស័យត្រូវបានគេទាមទារសំណងមួយលានកន្លះ សម្រាប់ថ្លៃព្យាបាល៤ថ្នេរ។ បច្ចុប្បន្នសមត្ថកិច្ចជំនាញនៃអធិការដ្ឋាននគរបាលស្រុកសង្កែត្រៀមបញ្ជូនខ្លួនជនសង្ស័យទៅកាន់សាលាដំបូងហើយ៕
គំនុំចាស់រើឡើងចំពេលស្រវឹងទាញប៉័ងតោកាប់តែម្តង
0 Comments