បាត់ដំបង ៖ តំបន់ពីរ គឺជាដីក្នុងតំបន់ព្រៃរនាម ហើយក៏ជាតំបន់ហាមឃាត់ដែរដោយមិនមានបុគ្គលណាម្នាក់ហ៊ានទៅទន្ទ្រាន ឬប៉ះពាល់ឡើយព្រោះវាជាដីរដ្ឋដែលជាប់នឹងបឹងទន្លេសាបស្ថិតក្នុងភូមិសាស្ត្រភូមិស្វាយស ឃុំតាប៉ុន ស្រុកសង្កែ ខេត្តបាត់ដំបង ប៉ុន្តែបែរជាថ្មីៗនេះមានក្រុមហ៊ុនឯកជនមួយបាន និងកំពុងដាក់គ្រឿងចក្រឈូសឆាយជាបែរ និងបឹងសម្រាប់ស្ទាក់ចាប់ត្រីយ៉ាងអនាធិបតេយ្យដោយសារ តែមានអង្គភាពជំនាញ និងអាជ្ញាធរនៅពីក្រោយខ្នងយ៉ាងរឹងមាំថែមទៀតផង។
បើតាមសេចក្តីរាយការពីប្រភពមួយចំនួន បានឲ្យដឹងថា មួយរយៈនេះមានក្រុមឈ្មួញមួយក្រុមដែលទំនងជាមានការឃុបឃិតគ្នាពីសំណាក់ខណ្ឌរដ្ឋបាលជលផល និងដោយមានការបើកភ្លើងខៀវពីអស់លោកអាជ្ញាធរម្ចាស់ទឹកម្ចាស់ដីផងនោះ បានចាប់ផ្តើមដឹកបញ្ជូនគ្រឿងចក្រចូលទៅកាន់តំបន់ពីរ ដែលស្ថិតក្នុងព្រៃរនាមនិងជាតំបន់ហាមឃាត់ ដើម្បីធ្វើសកម្មភាពឈូសឆាយ និងកាយធ្វើជាបែរ ជាប្រឡាយ និងជាស្រះដើម្បីស្ទាក់ចាប់ត្រីពីតំបន់ព្រៃលិចទឹកនេះយ៉ាងអនាធិបតេយ្យ។
បន្ទាប់ពីបានទទួលព័ត៌មាននេះរួចមក នៅថ្ងៃទី៩ ខែកញ្ញា ឆ្នាំ២០១៥ លោកអភិបាលស្រុកសង្កែ គឹម វណ្ណៈ បានចេញដំណើរក្នុងគោលបំណង ទៅត្រួតពិនិត្យទីតាំងនេះ ប៉ុន្តែជាអកុសលលោកមិនបានទៅដល់ទីតាំងនោះឡើយ ដោយសារតែអង្គភាពពាក់ព័ន្ធ និងអាជ្ញាធរឃុំនាំបង្វែងដានឲ្យទៅមើលការកាយដីបន្តិចបន្តួច ដែលនៅជាប់នឹងក្រោយផ្ទះប្រជាពលរដ្ឋទៅវិញ ហើយចំណែកគ្រឿងចក្រក៏ត្រូវបានគេផ្តល់ដំណឹងឲ្យដកថយសិនដែរ។
នៅក្នុងថ្ងៃដដែលនេះដែរ បន្ទាប់ពីលោកអភិបាលស្រុកវិលត្រឡប់មកវិញគេក៏បានបញ្ជាគ្រឿងចក្រឲ្យចូលទៅធ្វើសកម្មភាពដូចដើម ដែលប្រឡាយដែលគេកាយនោះមានប្រវែងជិត៤០០ម៉ែត្រទៅហើយនៅក្នុងតំបន់ព្រៃរនាមនេះ។
ថ្មីៗនេះបន្ទាប់ពីមានការសម្ភាសន៍ទៅអាជ្ញាធរឃុំពីសំណាក់អ្នកសារព័ត៌មានក្នុងស្រុករួចមកក៏ស្រាប់តែគ្រឿងចក្រនោះមានការដកថយមួយដង្ហើមចង្រិតទៀតដើម្បីបំភ័ន្តភ្នែកតែប៉ុណ្ណោះ តែធាតុពិតបទល្មើសនៅតែជាបទល្មើសដដែល នេះដោយសារតែមានការឃុបឃិតគ្នាយ៉ាងល្អប្រសើដែរ ពីសំណាក់អស់លោកមន្ត្រីជំនាញនិងអាជ្ញាធរមូលដ្ឋាន។
បញ្ហានេះយើងបានទំនាក់ទំនងទៅលោក គឹម វណ្ណៈ អភិបាលស្រុកសង្កែកាលពីវេលាម៉ោង១១និង១០នាទី ថ្ងៃទី១៤ ខែកញ្ញា នេះដែរប៉ុន្តែទូរស័ព្ទរបស់លោកមិនអាចភ្ជាប់បានឡើយ៕
អង្គភាពជំនាញឃុបឃិតជាមួយឈ្មួញកាយក្បែរក្នុងតំបន់ហាមឃាត់
0 Comments