មនុស្សយ៉ាងហោចណាស់៣៤នាក់ដោយរួមទាំងទារក និងកុមារ១៥នាក់ផងនោះបានលង់ទឹកស្លាប់នៅពេលដែលទូករបស់ពួកគេបានក្រឡាប់នៅកោះរបស់ប្រទេសក្រិកកាលពីថ្ងៃអាទិត្យដែលវាជាសោកនាដកម្មជនចំណាកស្រុកចុងក្រោយបំផុតនៅក្នុងសមុទ្រ។
ទារកបួននាក់និងកុមារតូចៗ១១នាក់ (កុមារាប្រាំមួយនាក់និងកុមារីប្រាំនាក់)គឺស្ថិតក្នុងចំណោមអ្នកដែលនៅលើទូកឈើនោះ នៅពេលដែលវាបានលិចនៅកោះ Farmakonisi ខណៈជនរងគ្រោះចំនួន៨នាក់ត្រូវបានប្រទះឃើញដោយឆ្មាំសមុទ្រ។
តួលេខចុងក្រោយដែលផ្តល់ដោយឆ្មាំសមុទ្របានបង្ហាញថា មនុស្សសរុបចំនួន៣៤នាក់ត្រូវបានគេរកឃើញស្លាប់ ខណៈពេលដែលមនុស្ស៦៨នាក់ផ្សេងទៀតត្រូវបានស្រង់ចេញពីសមុទ្រទាំងនៅរស់ចំណែក៣០នាក់បានព្យាយាមហែលរកកន្លែងសុវត្ថិភាពនៅលើឆ្នេរនៃកោះនេះ។
ទោះបីជាយ៉ាងណាក៏ដោយ ចំនួនពិតប្រាកដនៃអ្នកដែលជិះនៅលើទូកនោះនៅតែមិនទាន់ត្រូវបានគេដឹងប៉ុន្តែគេហទំព័រ ANA បានឲ្យដឹងថា ទូកនោះមានភាពចង្អៀតហើយបានលិចដោយសារតែខ្យល់បក់ខ្លាំងនៅតំបន់នោះ។
ទន្ទឹមនោះនាវាកងទ័ពជើងទឹករបស់ក្រិកបានយកសាកសពទៅកាន់ក្រុង Rhodes ខណៈពេលដែលអ្នកនៅរស់ត្រូវបានបញ្ជូនទៅកាន់តំបន់ Leros។
ដោយឡែកឆ្មាំសមុទ្រក៏កំពុងស្វែងរកផងដែរចំពោះកុមារបួននាក់ដែលនៅតែបន្តបាត់ខ្លួនបន្ទាប់ពីទូកមួយទៀតបានក្រឡាប់កាលពីថ្ងៃសៅរ៍នៅកោះ Samos របស់ក្រិកដែលស្ថិតនៅជិតឆ្នេរសមុទ្រប្រទេសទួរគី។
សោកនាដកម្មនាពេលចុងក្រោយនេះបានកើតឡើងបន្ទាប់ពីការស្លាប់របស់ក្មេងស៊ីរីម្នាក់ដែលសពត្រូវបានគេថតនៅលើឆ្នេរខ្សាច់របស់ប្រទេសទួរគីកាលពីសប្ដាហ៍មុនហើយវាបានក្លាយជានិមិត្តរូបនៃជនភៀសខ្លួនដែលកំពុងរត់ចេញពីប្រទេសមានសង្គ្រាម។
អង្គការអន្តោប្រវេសន៍អន្តរជាតិបាននិយាយថា រហូតមកដល់ពេលនេះមានជនអន្តោប្រវេសន៍ និងជនភៀសខ្លួនជាង ៤៣០ ០០០នាក់បានឆ្លងកាត់សមុទ្រមេឌីទែរ៉ាណេទៅកាន់អឺរ៉ុបនៅក្នុងឆ្នាំ ២០១៥ ខណៈអ្នកស្លាប់និងបាត់ខ្លួននៅតាមផ្លូវមានចំនួន២៧៤៨នាក់។
ស្របពេលជាមួយគ្នានោះ គណបក្សឆ្វេងនិយម Syriza របស់ប្រទេសក្រិកដែលមានគោលបំណង់ចង់បោះឆ្នោតឡើងវិញនៅថ្ងៃអាទិត្យក្រោយនោះបានអំពាវនាវឲ្យមានជំនួយពីខាងក្រៅដើម្បីដោះស្រាយវិបត្តិនេះ។
គណបក្សនេះបាននិយាយក្នុងសេចក្តីថ្លែងការណ៍មួយថា “យើងគួរតែកាន់ទុក្ខប៉ុន្តែក៏ធ្វើសកម្មភាពផងដែរ”។ សេចក្តីថ្លែងការណ៍នេះបានរៀបរាប់ថា លំហូរដ៏ធំនៃជនភៀសខ្លួនគឺជាបញ្ហានៃអឺរ៉ុបនិងសកលលោកទាំងមូល៕
AFP
ទារកនិងកុមារស្ថិតក្នុងចំណោមមនុស្ស៣៤នាក់ដែលបានស្លាប់ក្នុងការលិចទូក
0 Comments