សៀមរាប ៖ រថយន្តកាមរីដឹកឈើមួយគ្រឿងបានបើកបោះពួយក្នុងល្បឿនយ៉ាងលឿន បណ្ដាលឲ្យ
ធ្លាក់ទឹកអូរស្លាប់ម្នាក់និងរងរបួសម្នាក់ក្នុងទិសដៅពីលិចទៅកើតហើយករណីនេះពលរដ្ឋនិយាយថា មានការប្រដេញគ្នាដូចក្នុងរឿងចិនអញ្ចឹង។
ហេតុការណ៍នេះកើតឡើងនៅវេលាម៉ោង១៣និង៣០នាទីថ្ងៃទី១៣ ខែកញ្ញា នេះនៅតាមបណ្តោយផ្លូវជាតិលេខ៦៤ក្នុងភូមិគោលថ្មី ឃុំពេល ស្រុកសូទ្រនិគម ខេត្តសៀមរាប។ សាក្សីនៅកន្លែងកើតហេតុបានឲ្យដឹងថា នៅពេលនោះគេឃើញមានរថយន្ត២ទៅ៣គ្រឿងបានបើកប្រដេញក្នុងល្បឿនយ៉ាងលឿនដូចក្នុងរឿងចិនហុងកុងសង្ស័យថា មានសមត្ថកិច្ចណាមួយបើកប្រដេញ។
លោកអនុសេនីយ៍ឯកសុខ សាលីអធិការរងទទួលបន្ទុកចរាចរណ៍នៃស្រុកសូទ្រនិគម បានឲ្យដឹងថា រថយន្តនោះបើកលឿនអូសចម្ងាយ៧០ម៉ែត្របណ្ដាលឲ្យឈើបុកពីក្រោយស្លាប់នៅនឹងកន្លែងម្នាក់និងម្នាក់ទៀតរងរបួសជនរងគ្រោះដែលអ្នកស្លាប់នោះមានឈ្មោះឆោម ប្រុស ភេទប្រុសអាយុ៣៧ឆ្នាំ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប និងម្នាក់ទៀតមានឈ្មោះឌឿក ឌីណា ភេទប្រុស អាយុ២៨ឆ្នាំ រស់នៅភូមិជាមួយគ្នា។
លោកបន្តថា រថយន្តនោះដឹកឈើប្រភេទផ្ចឹកមានចំនួន១៥ដុំ ហើយបច្ចុប្បន្ននេះរថយន្តម៉ាកកាមរីពាក់ស្លាកលេខ សៀមរាប2A6276ព្រមទាំងឈើត្រូវបានកម្លាំងនគរបាលចរាចរណ៍ស្រុកអូសយកមករក្សាទុកនៅអធិការដ្ឋានស្រុករង់ចាំដោះស្រាយតាមច្បាប់។
លោកបន្ថែមថា ចំពោះករណីនេះលោកមិនទាន់ហ៊ានសន្និដ្ឋានថា មានការប្រដេញ ឬយ៉ាងណានោះទេ។
ប្រភពពីពលរដ្ឋបានឲ្យដឹងថា នៅតាមផ្លូវលេខ៦៤នេះមានសមត្ថកិច្ចជាច្រើនស្ថាប័ន បានបណ្ដាក់គ្នាដាក់កុងត្រូលចាំប្រមូលលុយពីបទល្មើសព្រៃឈើយ៉ាងត្រជាក់ត្រជុំដោយមិនមានការខ្វាយខ្វល់និងគ្មានចំណាការណាមួយពីសំណាក់អាជ្ញាធរនៅតំបន់នោះឡើយ ដោយគេដាក់ការសង្ស័យថា ជាឆ្នាំងបាយរបស់សមត្ថកិច្ចនៅតំបន់នោះ៕
អ្នកដឹកឈើម្នាក់បានស្លាប់និងម្នាក់រងរបួសសង្ស័យមានការប្រដេញរកលាភសក្ការៈ
0 Comments