បាត់ដំបង ៖ ក្មេងស្រីម្នាក់ ដែលទើបតែមានអាយុ៨ឆ្នាំបានស្លាប់ភ្លាមៗនៅនឹងចំណុចកើតហេតុស្ថិតក្នុងភូមិព្រះធាតុ ឃុំរបស់មង្គល ស្រុកមោងឬស្សី ខេត្តបាត់ដំបង កាលពីវេលាម៉ោង១២និង៤០នាទី ខណៈដែលក្មេងស្រីរូបនោះបានដើរទៅលែងក្បែរនឹងម៉ាស៊ីនភ្លើងដែលគេកំពុងបញ្ឆេះសម្រាប់ចាក់ធុងបាសក្នុងពិធីភ្ជាប់ពាក្យមួយ។
ប្រភពនៅទីនោះបានរាយការណ៍មកថា នៅមុនពេលកើតហេតុគឺក្នុងភូមិឃុំខាងលើបានរៀបចំពិធីភ្ជាប់ពាក្យកូនរបស់ឈ្មោះនឹម ដៀប ដោយមានមនុស្សម្នាមកចូលរួមយ៉ាងច្រើនកុះករផងដែរ។ នៅពេលនោះដែរ ក្រុមអ្នកកាន់គ្រឿងបំពងសំឡេង ក៏បានរៀបចំធុងបាសដើម្បីឲ្យមានភាពសប្បាយរីករាយ និងមានសំឡេងកងរំពងផង ដោយគេបានអូសម៉ាស៊ីនភ្លើងទៅយ៉ាងឆ្ងាយជៀសវាងនូវការរំខានអំពីសំឡេងរបស់វា ដោយនៅទីនោះគឺមិនមានអ្នកណានៅចាំយាមឡើយ ដោយគេបានបញ្ឆេះហើយក៏នាំគ្នាមកក្នុងរោងអស់រលីង។
ចៃដន្យនៅពេលនោះដែរក៏មានក្មេងស្រីម្នាក់ឈ្មោះ ចិន ស្រីនាថ អាយុ៨ឆ្នាំ រស់នៅក្នុងភូមិ ឃុំជាមួយគ្នា ដែលបានមកលេងក្នុងពិធីនេះដែរ បានដើរទៅលេងតែម្នាក់ឯងក្បែរនឹងម៉ាស៊ីនភ្លើងនោះ ហើយក៏ទំនងជាត្រូវខ្សែភ្លើង ដែលចេញពីម៉ាស៊ីនភ្លើងនោះឆក់ទើបបណ្តាលឲ្យនាងដួលស្លាប់ក្បែរទីនោះតែម្តង លុះមួយសន្ទុះក្រោយមកក៏មានការភ្ញាក់ផ្អើលតែម្តង។
ក្រោយពីបានពិនិត្យរួចមកទើបសមត្ថកិច្ចបានបញ្ជាក់ថា ក្មេងស្រីរូបនេះពិតជាត្រូវខ្សែភ្លើងឆក់ស្លាប់យ៉ាងពិតប្រាកដ ដោយភ្លាមៗនោះដែរក្រុមគ្រួសារក៏បាននាំយកសពក្មេងស្រីទៅធ្វើបុណ្យតាមប្រពៃណីយ៉ាងក្រៀមក្រំចិត្តជាទីបំផុត៕
ក្មេងស្រីម្នាក់ឆក់ខ្សែភ្លើងស្លាប់ ក្នុងពិធីភ្ជាប់ពាក្យមួយ
0 Comments