ភ្នំពេញ ៖ លោកជំទាវម៉ែន សំអនឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងរដ្ឋសភាព្រឹទ្ធសភាពនិងអធិការកិច្ច និងជាប្រធានសមាគមនារីកម្ពុជា ដើម្បីសន្តិភាពនិងអភិវឌ្ឍន៍បានសម្ដែងនូវការគាំទ្រនិងអរគុណចំពោះសកម្មភាពមនុស្សធម៌ទាំងឡាយណា ដែលបានជួយឧបត្ថម្ភគាំទ្រដល់កុមារកំព្រា។ ការផ្ដល់នូវការគាំទ្រនេះធ្វើឡើងខណៈពេលដែលលោកជំទាវដឹកនាំប្រតិភូជាន់ខ្ពស់ក្នុងជួររាជរដ្ឋាភិបាល និងក្រសួងទំនាក់ទំនង អញ្ជើញចុះសួសុខទុក្ខ និងសំណេះសំណាលជាមួយកុមារនៅអង្គការម្លប់តាប៉ាង នាល្ងាចថ្ងៃទី១២ ខែកញ្ញាឆ្នាំ២០១៥។ នេះជាការបញ្ជាក់ ពីមន្ត្រីខុទ្ទកាល័យក្រសួងទំនាក់ទំនងរដ្ឋសភាព្រឹទ្ធសភា និងអធិការកិច្ចបានឲ្យដឹងកាលពីវេលាម៉ោង៧និង៥០នាទីព្រឹកថ្ងៃទី១៤កញ្ញាឆ្នាំ២០១៥។
មន្ត្រីដដែលបានបញ្ជាក់ថា ក្នុងឱកាសនោះលោកអ៊ី សាវរិននាយកអង្គការម្លប់តាប៉ាងខេត្តព្រះសីហនុបានឲ្យដឹងថា អង្គការម្លប់តាប៉ាងជាអង្គការមិនមែនរដ្ឋាភិបាលក្នុងស្រុកមួយ បានបង្កើតនិងចុះបញ្ជីនៅក្រសួងមហាផ្ទៃ នាឆ្នាំ២០០៣ដោយមើលឃើញអំពីបញ្ហា និងកាប្រឈមគ្រោះថ្នាក់ផ្សេងៗរបស់កុមារតាមថ្នល់ ទើបអង្គការបានជួយដល់កុមារដែលចាប់ផ្ដើមដំបូង គឺផ្ដល់ចំណីអាហារនិងផ្ដល់សុវត្ថិភាពដល់កុមារចំនួន៦នាក់ ដែលដេកនៅក្រោមដើមតាប៉ាង ជារៀងរាល់ថ្ងៃនៅតាមឆ្នេរសមុទ្រកុមារទាំនោះ ស្ថិតក្នុងស្ថានភាពងាយរងគ្រោះពីការំលោភបំពានការកេងប្រវ័ញ្ច និងគ្រោះថ្នាក់ផ្សេងៗ។ ដោយឃើញទុក្ខលំបាករបស់ប្អូនៗកុមារទាំងអស់នេះហើយ ទើបអង្គការម្លប់តាប៉ាងបានផ្ដល់ឲ្យកុមារនៅតាមថ្នល់កុមារងាយរងគ្រោះ និងកុមាររងគ្រោះនៅក្នុងខេត្តព្រះសីហនុទាំងអស់ទទួលបាន នូវសុវត្ថិភាព ការថែទាំ គាំទ្រផ្លូវកាយនិងផ្លូវចិត្ត ដោយផ្ដល់ឲ្យពួកគេមានឱកាសទទួលបាននូវកាអប់រំ ជំនាញវិជ្ជាជីវៈ បំណិនជីវិត សកម្មភាពច្នៃប្រឌិត នានានិងការពារពួកគេពីការំលោភបំពានគ្រប់រូបភាព ហើយអង្គការនឹងផ្ដល់នូវសេវាវិជ្ជមានមួយឲ្យពួកគេក្លាយជាពលរដ្ឋល្អមួយក្នុងសង្គម។
លោកបានបន្តទៀតថា មកទល់បច្ចុប្បន្នអង្គការមានមណ្ឌល៨កន្លែងសំរាប់បម្រើសេវាកម្មជូនកុមារតាមថ្នល់និងកុមារក្រីក្រមកទល់ពេលនេះកុមារសរុប មានចំនួនជាង៤០០០នាក់មកពី១៥០០គ្រួសារនិងបុគ្គលិក១៩៥នាក់ស្រី៩៤នាក់ អង្គការជួយមិនប្រកាន់ពូជសាសន៍ ពណ៌សម្បុរ សាសនានិងនិន្នាការនយោបាយណាមួយឡើយ។
លោកជំទាវឧបនាយករដ្ឋមន្ត្រី ម៉ែន សំអន បានកោតសរសើរនឹងវាយតម្លៃខ្ពស់ចំពោះការខិតខំប្រឹងប្រែងរបស់អង្គការម្លប់តាប៉ាង ដែលបានជួយកុមារកំព្រាក្មេងអនាថា រស់នៅតាមចិញ្ចើមថ្នល់ មកចិញ្ចឹមបីបាច់ថែរក្សាបណ្ដុះបណ្ដាលបានសិក្សារៀនសូត្រនិងមានមុខជំនាញផ្សេងៗសម្រាប់ជាទន់ប្រកបរបរទៅថ្ងៃអនាគត។
ឆ្លើយតបទៅនឹងសកម្មភាពមនុស្សធម៌នាឱកាសនោះលោកជំទាវឧបនាយករដ្ឋមន្ត្រី ម៉ែន សំអន បានផ្ដាំផ្ញើដល់ប្អូនៗកុមារក្នុងមណ្ឌលទាំងអស់ត្រូវខិតខំរៀនសូត្រ ដើម្បីឲ្យក្លាយជាកូនល្អ សិស្សល្អពលរដ្ឋល្អនៅក្នុងសង្គមនិងជាទំពាំងស្នងឫស្សី។ នៅក្នុងឱកាសនោះ លោក ជំទាវ រួមជាមួយគណៈប្រតិភូអមដំណើរបាននាំយកនូវថវិកាចំនួន៨លានរៀល(៨.០០០.០០០រៀល)និង២ពាន់២រយសែសិបដុល្លារ(២.២៤០ដុល្លារ)រួមជាមួយគ្រឿឧបភោគបរិភោគមានអង្ករនំធុង មី ទឹកស៊ីអ៊ីវ សំលៀកបំពាក់និងសម្ភារៈសិក្សាមួយចំនួនជូនដល់ប្អូនៗក្មួយៗកុមារក្នុងមណ្ឌលផងដែរ៕
លោកជំទាវ ម៉ែន សំអនគាំទ្រសកម្មភាពមនុស្សធម៌ក្នុងការជួយដល់ក្មេងកំព្រា
0 Comments