ព្រះវិហារ ៖ តាមសេចក្ដីរាយការណ៍បានឲ្យដឹងថា អាជ្ញាធរស្រុកជ័យសែន និងផ្នែករដ្ឋបាលព្រៃឈើឆែប បានឃុបឃិតគ្នាឲ្យជនខិលខូចកាប់ដើមឈើធ្នង់១ដើម មានមុខកាត់ប្រមាណ១ម៉ែត្រ ប្រវែងជាង១០ម៉ែត្រ កាលពីថ្ងៃទី១២ ខែកញ្ញា ឆ្នាំ២០១៥ស្ថិតនៅភូមិទឹកលិច ឃុំស្ដៅ ស្រុកជ័យសែន។ ដើមឈើនោះ អ្នកភូមិមានជំនឿថាមានបារមីអ្នកតាសណ្ឋិតទៀតផង ហើយដែនសមត្ថកិច្ចរបស់ផ្នែករដ្ឋបាលព្រៃឈើឆែប គ្រប់គ្រងវិស័យព្រៃឈើចំនួន២ស្រុកគឺស្រុកឆែប និងស្រុកជ័យសែន។
ភ្នាក់ងាររាយការណ៍ឲ្យដឹងថា លោកឈឹម សុខស៊ីវត្ថា នាយសង្កាត់រដ្ឋបាលព្រៃឈើជ័យសែន និងលោកគឹមជេតថាវី នាយផ្នែករដ្ឋបាលព្រៃឈើឆែបត្រូវបានគេសង្ស័យថា ជាអ្នកនៅពីក្រោយខ្នងនិ ងបានអនុញ្ញាតឲ្យជនខិលខូចធ្វើការកាប់បំផ្លាញដើមឈើប្រណីតដ៏ធំ១ដើមខាងលើ។ ទង្វើបទល្មើសនេះគឺផ្ទុយពីបំណងអ្នកភូមិ ដែលពួកគាត់ចង់រក្សាទុកវាជាកន្លែងសក្ការបូជា ដោយសង់អាស្រមតូចមួយតម្កល់ទុកក្បែរដើមឈើធ្នង់នោះ ដើម្បីអុជធូបបួងសួងសុំសេចក្ដីសុខចម្រើន។
ប្រភពព័ត៌មានពីសមត្ថកិច្ច ដែលស្និទ្ធជាមួយអ្នកសារព័ត៌មានបានឲ្យដឹងថា ខ្មោចស្រុកបានផ្ដល់ដំណឹងដល់ឈ្មួញម្នាក់មកពីខេត្តកំពង់ចាមថា មានឈើធ្នង់១ដើមមានមុខកាត់១ម៉ែត្រ និងប្រវែងជាង១០ម៉ែត្រលក់ក្នុងតម្លៃ៣៥០០ដុល្លារអាមេរិក បន្ទាប់មកនៅថ្ងៃទី១២ ខែកញ្ញា ឆ្នាំ២០១៥ស្រាប់តែឃើញដើមឈើធ្នង់នោះត្រូវគេកាប់ផ្ដួលរាបដល់ដីតែម្ដង។
ប្រភពព័ត៌មានដដែលបន្តថា ដើមធ្នង់១ដើមនោះត្រូវគេកាត់អង្កន់ជាច្រើនកំណាត់ជញ្ជូនយកទៅដាក់ក្នុងបន្ទាយតំបន់ប្រតិបត្តិការសឹករងស្រុកជ័យសែនយ៉ាងមានសុវត្ថិភាពដើម្បីត្រៀមដឹកយកទៅលក់បន្តនៅខេត្តកំពង់ចាមឆាប់ៗនេះ។ បើពលរដ្ឋសាមញ្ញជាអ្នកកាប់បំផ្លាញដើមឈើធ្នង់ខាងលើវិញនោះ ប្រាកដជាប្រឈមមុខចាប់ខ្លួនមានទោសគុកច្រវាក់មិនខានឡើយ ប៉ុន្តែដោយសារបទល្មើសបំផ្លាញព្រៃឈើ១ករណីនេះខាងអាជ្ញាធរមានសមត្ថកិច្ចជាអ្នកសមគំនិតគ្នាប្រព្រឹត្តយ៉ាងចាស់ដៃទើបបានជាគ្មានទោសអ្វីសោះ។
អ្នកសារព័ត៌មានមិនអាចជួបទំនាក់ទំនងសុំការបំភ្លឺពីលោកគឹម ជេតថាវី នាយផ្នែករដ្ឋបាលព្រៃឈើឆែបបានទេពាក់ព័ន្ធការកាប់បំផ្លាញដើមឈើធ្នង់ដ៏ធំ១ដើមខាងលើជាប្រភេទឈើប្រណីត ដ៏កម្រនាពេលបច្ចុប្បន្ននេះដោយសារគាត់ជាប់រវល់៕
ដើមធ្នង់១ដើម ដែលមានបារមីអ្នកតាសណ្ឋិត ត្រូវបានកាប់បំផ្លាញ
0 Comments