ភ្នំពេញ ៖ បុរសជាកម្មករសំណង់ម្នាក់ បន្ទាប់ពីផឹកស្រាស្រវឹងតែងតែឡូឡានិយាយឮៗរំខានដល់អ្នកជិតខាងមកដល់យប់ថ្ងៃកើតហេតុនេះ ខណៈគាត់បើកមុងចូលដេក មិនទាន់លក់ផងក៏ត្រូវអ្នកធ្វើការសំណង់ជាមួយគ្នាលបមកវាយក្បាល និងដែកបំពង់ទីបបណ្ដាលឲ្យបែករយះក្បាលហូរឈាមកក្លាក់។
ករណីនេះកើតឡើងនៅវេលាម៉ោង២០យប់ថ្ងៃទី១៥ ខែកញ្ញា ឆ្នាំ២០១៥នៅចំណុចក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។ជនរងគ្រោះមានឈ្មោះ អាន សុភា អាយុ៤៨ឆ្នាំ មុខរបរកម្មករសំណង់ស្នាក់នៅក្នុងការដ្ឋានសំណង់កន្លែងកើតហេតុ មានស្រុកកំណើតនៅភូមិកញ្ជ្រៀចស្រុកកញ្ជ្រៀចខេត្តព្រៃវែង។
ប្រភពពីជនរងគ្រោះបានឱ្យដឹងថា មុនពេលកើតហេតុគាត់បានផឹកស៊ីជាមួយពួកម៉ាកគាត់ម្នាក់ទៀត បន្ទាប់ពីឈប់ផឹកស៊ីហើយ នោះក៏មកកន្លែងស្នាក់នៅវិញហៀបនឹងចូលមុងដេកទៅហើយនោះស្រាប់តែមានបុរសម្នាក់មកពីស្រុកកំណើតជាមួយគ្នា ដែលគាត់សុំមិនទាន់បញ្ចេញឈ្មោះជាអ្នកធ្វើការសំណង់ដូចគ្នាដើរមកវាយក្បាលគាត់ចំនួនពីរបំពង់ទីប បណ្ដាលឱ្យរយះបែកក្បាលហូរឈាមកក្លាក់ ហើយក៏រត់មករកមេភូមិជួយ ជួយអន្តរាគមន៍តែមេភូមិបាននាំមកដាក់ពាក្យបណ្ដឹងនៅប៉ុស្តិ៍ចោមចៅ តែដោយសារបួសឈាមហូរខ្លាំងពេក និងដោយស្ថានភាពស្រវឹងជោកផងនោះទើបសមត្ថកិច្ចក៏នាំទៅមន្ទីរពេទ្យពោធិ៍ចិនតុង ដើម្បីលាងរបួសសិននិងរង់ចាំស្វាងស្រវឹងទើបនាំមកដាក់បណ្តឹងនាពេលក្រោយ។
ប្រភពដដែលបានបានបន្ដថា កន្លងមកនៅពេលស្រវឹងម្ដងៗគាត់តែងតែនិយាយឮខ្លាំងៗធ្វើឲ្យរំខានដំណេកដល់អ្នកដ៏ទៃ តែនៅយប់កើតហេតុនោះគាត់អះអាងថា មិនបាននិយាយឡូឡាដូចពីពេលមុនទេទោះជាគាត់ខំទប់មាត់មិននិយាយច្រើនប៉ុណ្ណឹងហើយ នៅតែមកវាយគាត់ទៀត៕
ស្រវឹងស្រាពេលចូលដេក គេលបវាយពីរបំពង់ទីបរយះក្បាល
0 Comments