កណ្ដាល ៖ បុរសម្នាក់ផឹកស្រាស្រវឹងបានបើកម៉ូតូបោះពួយលឿនដូចហោះទៅបុករថយន្តចំពីក្រោយពេញមួយទំហឹងបណ្ដាលឲ្យស្លាប់ភ្លាមៗនៅនឹងកន្លែងកើតហេតុ។
សមត្ថកិច្ចប៉ូលិសបានប្រាប់ឲ្យដឹងថា នៅថ្ងៃទី១៥ ខែកញ្ញា វេលាម៉ោង២០និង៣០នាទី ចន្លោះគីឡូម៉ែត្រលេខ៥៦,៦៧ នៅលើកំណាត់ផ្លូវជាតិលេខ១ ស្ថិតនៅភូមិកំពង់ពោធិ៍ ឃុំកំពង់ភ្នំស្រុកលើកដែក ខេត្តកណ្ដាល មានគ្រោះថ្នាក់ចរាចរណ៍មួយរវាងម៉ូតម៉ាកFTR ដោយអ្នកបើកបរឈ្មោះ ពុយ វុត្ថា ភេទប្រុស អាយុ២៨ឆ្នាំ មុខរបរកសិករ មានទីលំនៅភូមិរាំងដេក ឃុំគគីរធំ ស្រុកកៀនស្វាយ ខេត្តកណ្តាល។
ចំណែកអ្នកបើកម៉ូតូម៉ាកFTR ពណ៌.ស លាយខ្មៅ គ្មានស្លាកលេខទិសដៅពីភ្នំពេញទៅអ្នកលឿង ដោយបើកក្នុងល្បឿនលឿនដូចហោះ លុះមកដល់ត្រង់ចំណុចខាងលើបានជ្រុលទៅបុករថយន្តចំពីក្រោយពេញទំហឹងស្លាប់ភ្លាមៗតែម្តង។ ដោយឡែករថយន្តបង្កគឺមិនស្គាល់ម៉ាកបានបើកគេចខ្លួនបាត់។
ករណីនេះសមត្ថកិច្ចបានប្រាប់ថា បណ្ដាលមកពីអ្នកបើកបរម៉ូតូមានល្បឿនលឿន ហើយក្នុងស្ថានភាពស្រវឹងមិនប្រុងប្រយ័ត្ន និងកំពុងភ័យស្លន់ស្លោបានជាមានការបុកប៉ះរថយន្តតែម្ដង។ ក្រោយពីកើតហេតុ សមត្ថកិច្ចបានចុះទៅកន្លែងធ្វើការវាស់វែង ចំណែកម៉ូតូ និងសាកសពជនរងគ្រោះបានប្រគល់ជូនក្រុមគ្រួសារធ្វើបុណ្យតាមប្រពៃណី៕
បើកម៉ូតូលឿនដូចហោះទៅបុករថយន្តពីក្រោយ បណ្ដាលឲ្យស្លាប់ភ្លាមៗនៅនឹងកន្លែង
0 Comments