រដ្ឋមន្ត្រីក្រសួងការពារជាតិលោក Kevin Andrews បានឲ្យដឹងកាលពីថ្ងៃពុធថា យន្តហោះចម្បាំងរបស់អូស្ត្រាលីបានចាប់ផ្តើមការវាយប្រហារលើអាកាសជាលើកដំបូងរបស់ពួកគេប្រឆាំងនឹងក្រុមរដ្ឋឥស្លាមនៅក្នុងប្រទេសស៊ីរីដោយបានបំផ្លាញរថពាសដែកមួយគ្រឿង។
លោករដ្ឋមន្ត្រីបានប្រាប់អ្នកសារព័ត៌មានថា “នេះគឺជាផ្នែកមួយនៃការពង្រីកយុទ្ធសាស្ត្ររបស់យើងក្នុងការប្រយុទ្ធប្រឆាំងនឹងក្រុម IS ដើម្បីធ្វើប្រតិបត្តិការដោយមិនមែនត្រឹមតែនៅភាគខាងជើងប្រទេសអ៊ីរ៉ាក់ប៉ុណ្ណោះទេ ប៉ុន្តែថែមទាំងដើម្បីធ្វើប្រតិបត្តិការនៅភាគខាងកើតប្រទេសស៊ីរីផងដែរក្នុងគោលបំណងដើម្បីកម្ចាត់និងបំផ្លាញកងកម្លាំងក្រុមIS”។
ទន្ទឹមជាមួយគ្នានេះ សហរដ្ឋអាមេរិក កាណាដា ទួរគីនិងរដ្ឋឈូងសមុទ្រពែកបានចូលរួមរួចទៅហើយនៅក្នុងការវាយប្រហារលើពួកសកម្មប្រយុទ្ធ IS នៅក្នុងប្រទេសស៊ីរី។
ប្រទេសអូស្ត្រាលីបានចូលរួមក្នុងក្រុមចម្រុះដែលដឹកនាំដោយសហរដ្ឋអាមេរិកដើម្បីវាយប្រយុទ្ធក្រុមISនៅក្នុងប្រទេសអ៊ីរ៉ាក់កាលពីឆ្នាំមុន ប៉ុន្តែកាលពីសប្ដាហ៍មុនអូស្ត្រាលីបានពង្រីកប្រតិបត្ដិការអាកាសរបស់ខ្លួនចូលទៅក្នុងប្រទេសស៊ីរីដោយនិយាយថា មូលដ្ឋានច្បាប់នេះគឺជាការការពារខ្លួនរួមនៃប្រទេសអ៊ីរ៉ាក់ប្រឆាំងនឹងក្រុមជីហាដនិយមដែលមិនគោរពព្រំដែន។
ទោះបីជាយ៉ាងណាក៏ដោយ យន្តហោះចម្បាំងរបស់អូស្ត្រាលីបានបញ្ចប់ប្រតិបត្ដិការលើកដំបូងរបស់ពួកគេនៅក្នុងប្រទេសស៊ីរីកាលពីថ្ងៃសុក្រ ប៉ុន្តែមិនបានវាយប្រហារគោលដៅណាមួយឡើយ។
ដោយឡែកសម្រាប់ប្រទេសអង់គ្លេសវិញ យន្តហោះគ្មានមនុស្សបើករបស់ពួកគេបានសម្លាប់ពួកជីហាដនិយមចំនួនពីរនាក់កាលពីសប្ដាហ៍មុនក្នុងប្រទេសស៊ីរី៕
AFP
យន្តហោះចម្បាំងអូស្ត្រាលីធ្វើការវាយប្រហារលើកដំបូងក្នុងប្រទេសស៊ីរី
0 Comments