ភ្នំពេញ ៖ នាព្រឹកថ្ងៃទី១០ ខែកញ្ញា ឆ្នាំ២០១៥នេះ ក្រុមការងារសមាគមគ្រូពេទ្យស្ម័គ្រចិត្តយុវជនសម្ដេចតេជោ បានដឹកនាំក្រុមវេជ្ជបណ្ឌិត និងនិស្សិតពេទ្យស្ម័គ្រចិត្ត ព្រមទាំងក្រុមយុវជនសហភាពសហព័ន្ធខណ្ឌច្បារអំពៅ សហការសម្របសម្រួលជាមួយខាងពេទ្យជោរ៉ៃ ចុះពិនិត្យ និងព្យាបាល ទូទៅ ពិសេសជំងឺភ្នែក ជំងឺមាត់ធ្មេញដល់កុមារ និងប្រជាពលរដ្ឋជាង៥០០នាក់នៅក្នុងមន្ទីរពេទ្យជោរៃភ្នំពេញរយៈពេល៣ថ្ងៃ ចាប់ពីថ្ងៃទី១០ ខែកញ្ញានេះទៅ ស្ថិតនៅតាមបណ្ដោយផ្លូវជាតិលេខ១សង្កាត់និរោធ ខណ្ឌច្បារអំពៅ។
នេះគឺជាបេសកកម្មមនុស្សធម៌មួយដែលតែងតែចុះពិនិត្យព្យាបាលប្រជាពលរដ្ឋឥតគិតថ្លៃពីសំណាក់សមាគមគ្រូពេទ្យយុវជនស្ម័គ្រចិត្តសម្ដេចតេជោ ពិសេសជំងឺភ្នែកជំងឺមាត់ធ្មេញដល់គ្រប់ទីកន្លែងក្នុងប្រទេសកម្ពុជា។
លោក ស៊ី សុផាន់ណាង តំណាងលោកជំទាវ ហ៊ុន ម៉ាណា ក្នុងនាមជាប្រធានក្រុមគ្រូពេទ្យយុវជនស្ម័គ្រចិត្តសម្ដេចតេជោបានឲ្យដឹងកាលពីវេលាម៉ោង៨និង៥០នាទី ថ្ងៃទី១០ ខែកញ្ញា ឆ្នាំ២០១៥ថា សម្ដេចតេជោ និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងលោកជំទាវ ហ៊ុន ម៉ាណា តែងតែគិតគូរពីសុខទុក្ខ និងតម្រូវការផ្សេងៗរបស់ប្រជាពលរដ្ឋទូទាំងប្រទេស ពិសេសកុមារនៅតាមមូលដ្ឋាន និងតាមអង្គការ បាននាំជាអំណោយផ្សេងៗចែកជូនដល់ក្មួយៗកុមារដើម្បីឱ្យពួកគេមានសេចក្តីសង្ឃឹម និងភាពកក់ក្តៅក្នុងការកសាងអនាគតដ៏ប្រសើររបស់ពួកគេ។ ជាក់ស្ដែងថ្ងៃនេះ ក្រុមគ្រូពេទ្យស្ម័គ្រចិត្តសម្ដេចតេជោបានចុះពិនិត្យព្យាបាលដល់ប្រជាពលរដ្ឋជាង៥០០នាក់ដោយឥតគិតថ្លៃក្នុងមន្ទីរពេទ្យជោរ៉ៃភ្នំពេញ។ នេះជាការយកចិត្តទុកដាក់ចំពោះការថែទាំសុខភាពការរស់នៅរបស់ពលរដ្ឋទូទាំងប្រទេសពីសំណាក់ប្រមុខរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី និងជាអគ្គមគ្គុទ្ទេសក៍ដ៏ឆ្នើមរបស់ប្រទេសជាតិ៕
គ្រូពេទ្យស្ម័គ្រចិត្តយុវជនសម្ដេចតេជោ ចុះពិនិត្យព្យាបាលកុមារ និងពលរដ្ឋក្នុងពេទ្យជោរៃភ្នំពេញជាង៥០០នាក់
0 Comments