ភ្នំពេញ ៖ មនុស្ស៣នាក់បានរងរបួសធ្ងន់ស្រាល ដោយសាររថយន្តលុចស៊ីសRX300បុក ខណៈបើកបរច្រាសទិសគ្នានៅតាមបណ្តោយផ្លូវជាតិលេខ៥ បន្ទាប់រថយន្តបង្កបុកជនរងគ្រោះហើយ រត់ទៅដល់គីឡូម៉ែត្រលេខ៩ ទើបប៉ូលិសដេញចាប់បាន។
ហេតុការណ៍នេះបានកើតឡើងកាលពីវេលាយប់ថ្ងៃទី៤ ខែកញ្ញា ឆ្នាំ២០១៥នៅបណ្តោយផ្លូវជាតិលេខ៥មុខរោងចក្រទឹកដោះគោភូមិផ្សារតូច សង្កាត់ទួលសង្កែ ខណ្ឌឫស្សីកែវ។
ប្រភពព័ត៌មានបានឲ្យដឹងថា មុនពេលកើតហេតុ គេឃើញរថយន្តម៉ាកលុចស៊ីសRX300 ពាក់ស្លាកលេខ ភ្នំពេញ 2U4685 បើកបរពីជើងទៅត្បូង ក្នុងល្បឿនលឿន ខណៈមកដល់ចំណុចកើតហេតុក៏បានបុកម៉ូតូស្មាសជនរងគ្រោះដែលបើកបរច្រាសទិសគ្នា បណ្ដាលឲ្យរងរបួសធ្ងន់ទាំង៣នាក់ តែម្តងក្នុងនោះមានក្មេងស្រីម្នាក់សន្លប់ឈឹងផងដែរ។
សមត្ថកិច្ចបានឲ្យដឹងថា បន្ទាប់ពីកើតហេតុអ្នកបើករថយន្តបានបើករត់គេចរហូត ទៅដល់គីឡូម៉ែត្រលេខ៩ទើបចាប់បាន រីឯជនរងគ្រោះទាំង៣នាក់ ត្រូវបានដឹកទៅសង្គ្រោះភ្លាមៗនៅមន្ទីរពេទ្យកាល់ម៉ែត។ ចំណែកអ្នកបើកបរ និងរថយន្តបង្ករួមទាំងម៉ូតូត្រូវបានខាងចរាចរណ៍រាជធានីភ្នំពេញ ស្ទូចយកទៅរក្សាទុកនៅការិយាល័យចរាចរណ៍ ដើម្បីដោះស្រាយ៕
មនុស្ស៣នាក់រងរបួសធ្ងន់ស្រាលដោយសាររថយន្តលុចស៊ីសRX300បុក
0 Comments