កណ្ដាល ៖ ជនបរទេសម្នាក់ទំនងជិះម៉ូតូប៉ះដៃចង្កូតជាមួយរថយន្តបណ្ដាលឲ្យដួលចូលក្នុងទឹកស្លាប់កាលពីម៉ោង៦និង៣០នាទីថ្ងៃទី០៥ ខែកញ្ញា ឆ្នាំ២០១៥ នៅកំណាត់ផ្លូវជាតិលេខ៣ ចន្លោះគីឡូម៉ែត្រលេខ34-35ចំណុចដីភូមិជីមៅ ឃុំត្បែង ស្រុកកណ្តាលស្ទឹង ខេត្តកណ្ដាល។
សមត្ថកិច្ចស្រុកកណ្ដាលស្ទឹងបានឲ្យដឹងថា ជនរងគ្រោះជិះម៉ូតូម៉ាក hornet ពណ៌ប្រផេះពាក់ស្លាកលេខ ភ្នំពេញ1AF-8314 មានឈ្មោះ ខេវិន អាយុ៤៥ឆ្នាំ ជនជាតិ អាយរលែន (ICELAND)គ្មានលិខិតឆ្លងដែន ឬលិខិតស្នាមអ្វីទេ។ ជនរងគ្រោះមានប្រពន្ធឈ្មោះ សរ ស្រីណុច អាយុ២៨ឆ្នាំស្នាក់នៅផ្ទះជួល ផ្សារកណ្ដាល ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងទៀតថា មុនពេលកើតហេតុជនរងគ្រោះបានជិះម៉ូតូhornetក្នុងទិសដៅពីជើងមកត្បូងនៅលើកំណាត់ផ្លូវជាតិលេខ៣ ទំនងប៉ះដៃចង្កូតជាមួយរថយន្តទើបបណ្ដាលឲ្យដួលបោកក្បាលចូលក្នុងទឹកស្លាប់តែម្ដង។ រថយន្តមិនស្គាល់ម៉ាកបានបើកគេចពីកន្លែងហេតុបាត់។
គិតត្រឹមម៉ោង៧ព្រឹកថ្ងៃទី៥ ខែកញ្ញា ឆ្នាំ២០១៥នេះ សពបានរក្សានៅនៅកន្លែងកើតហេតុ ហើយកំពុងរង់ចាំសាច់ញាតិ ក្រុមគ្រួសារមកទទួលយក៕
ជនបរទេសម្នាក់ជិះម៉ូតូប៉ះដៃចង្កូតជាមួយរថយន្តដួលចូលទឹកស្លាប់
0 Comments