ភ្នំពេញ ៖ ខណៈពេលដែលឯកឧត្ដម Shri Mohammad Hamid Ansari អនុប្រធានាធិបតីឥណ្ឌាបានអញ្ជើញមកបំពេញទស្សនកិច្ចជាផ្លូវការនៅក្នុងប្រទេសកម្ពុជាកាលពីថ្ងៃទី១៦ ខែកញ្ញា ឆ្នាំ២០១៥នេះ នៅវិមានមិត្តភាពទីស្ដីការគណៈរដ្ឋមន្ត្រី ឯកឧត្ដមក៏បានអញ្ជើញចូលរួមក្នុងពិធីធ្វើបទបាឋកថា ស្ដីពីទំនាក់ទំនងកម្ពុជា-ឥណ្ឌា “ក្រោមវត្តមានស្វាគមន៍យ៉ាងកក់ក្តៅពីឯកឧត្ដមបណ្ឌិត្យសភាចារ្យ សុខ អាន ឧបនាយករដ្ឋមន្ត្រីរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រួមនឹងមន្ត្រីរាជការក្រោមឧវាទ និងនិស្សិតជាច្រើនកុះករ។
អនុប្រធានាធិបតីឥណ្ឌា ឯកឧត្ដម Shri Mohammad Hamid Ansari បានមានប្រសាសន៍ថា ពេលដែលមកដល់ប្រទេសកម្ពុជា គឺឯកឧត្ដមមានការរំភើបចិត្តយ៉ាងខ្លាំង ដោយសារតែឃើញទំនាក់ទំនងដ៏ល្អរវាងកម្ពុជា និងឥណ្ឌា ហើយតាមពិតទៅកម្ពុជា និងឥណ្ឌា គឺមានវប្បធម៌ និងសាសនាដូចគ្នា។
ឯកឧត្ដមបន្តថា កន្លងមកនេះ គឺឥណ្ឌាបានជួយជួសជុលប្រាសាទបាយ័នដែលស្ថិតនៅក្នុងក្រុមប្រាសាទអង្គរធំ ហើយឥណ្ឌាក៏មានទំនាក់ទំនងល្អជាមួយប្រទេសនៅក្នុងតំបន់មេគង្គ ដែលហៅថាសហប្រតិបត្តិការ Ganga and Mekong (មេគង្គ -ឥណ្ឌា)។
អនុប្រធានាធិបតីឥណ្ឌាក៏បានកោតសរសើរពីការរីកចម្រើនរបស់ប្រទេសកម្ពុជា ដែលបានឈានដល់កំណើនសេដ្ឋកិច្ច គឺផលិតផលសរុបក្នុងស្រុក (GDP) ប្រមាណជា៧%ក្នុងមួយឆ្នាំ ហើយឥណ្ឌាសង្ឃឹមថាទំនាក់ទំនងសេដ្ឋកិច្ចវិនិយោគ និងទេសចរណ៍រវាងកម្ពុជា-ឥណ្ឌា និងកាន់តែមានភាពប្រសើរឡើងបន្ថែមទៀតដើម្បីផលប្រយោជន៍ប្រជាជន និងប្រទេសទាំងពីរ។
អនុប្រធានាធិបតីឥណ្ឌាបានបង្ហាញការចាប់អារម្មណ៍យ៉ាងខ្លាំងទៅលើការអភិវឌ្ឍន៍របស់ប្រទេសកម្ពុជា នៅក្នុងពីរទសវត្សចុងក្រោយនេះ ដោយសារតែប្រទេសកម្ពុជាបច្ចុប្បន្នគឺពោរពេញទៅដោយសន្តិភាព និងការរីកចម្រើនយ៉ាងឆាប់រហ័ស ហើយនេះគឺជាការរីកចម្រើនដែលគួរឲ្យកត់សម្គាល់លក្ខណៈជាប្រវត្តិសាស្ត្រតែម្ដង ហើយប្រទេសឥណ្ឌាក៏កំពុងសម្លឹងមើលដើម្បីពង្រឹង និងពង្រីកសហប្រតិបត្តិការជាមួយប្រទេសកម្ពុជានៅពេលអនាគត។
ទន្ទឹមនឹងនេះដែរ ឯកឧត្ដមក៏បានថ្លែងអំណរគុណដល់កម្ពុជាដែលបានជួយជ្រោមជ្រែងភាពជាដៃគូរវាងឥណ្ឌា និងអាស៊ាននាពេលកន្លងមក ហើយប្រទេសឥណ្ឌា ក៏កំពុងសម្លឹងមើលកិច្ចសហប្រតិបត្តិការឲ្យកាន់តែប្រសើរ និងស៊ីជម្រៅបន្ថែមទៀតទាំងផ្នែកសេដ្ឋកិច្ច និងវិនិយោគ ក៏ដូចជាបង្កើនទំនាក់ទំនងផ្នែកវិនិយោគបរទេសជាមួយប្រទេសកម្ពុជាផងដែរ។
ឯកឧត្ដម Shri Mohammad Hamid Ansari បានមានប្រសាសន៍បន្ថែមទៀតថា ឥណ្ឌា នឹងជំរុញការបង្កើនទំនាក់ទំនងផ្នែកវិស័យទេសចរណ៍ ដូច្នេះហើយបានយើងមានការចុះហត្ថលេខាទៅលើការពង្រីកទៅលើវិស័យទេសចរនេះ។ ចំពោះផ្នែកពាណិជ្ជកម្ម និងវប្បធម៌ ឥណ្ឌាមើលឃើញប្រទេសកម្ពុជាគឺនៅចំកណ្ដាលបេះដូងនៃសមាគមអាស៊ានតែម្ដង ដូច្នេះឥណ្ឌា និងសម្លឹងមើលពីសហប្រតិបត្តិការឲ្យកាន់តែស៊ីជម្រៅជាមួយប្រទេសកម្ពុជាបន្ថែមទៀត ទាំងផ្នែកពាណិជ្ជកម្ម វិនិយោគ និងផ្នែកទេសចរណ៍។
ឯកឧត្ដមបានលើកឡើងថា កន្លងមកនេះ ឥណ្ឌាក៏បានជួយកម្ពុជាក្នុងការបណ្ដុះបណ្ដាលធនធានមនុស្សផងដែរ ដូចជាផ្នែកបច្ចេកវិទ្យា ហើយឥណ្ឌាក៏បានកសាងនូវមជ្ឈមណ្ឌលសម្ភារៈសូត្រ ដែលបានសាងសង់ឡើង និងកំពុងដំណើរការនៅខេត្តសៀមរាប។
ឯកឧត្ដម Shri Mohammad Hamid Ansari បញ្ជាក់ឲ្យដឹងថា ការដែលឥណ្ឌាបានជួយជួសជុលនៅប្រាសាទបាយ័ន នៅអង្គរធំគឺបានឆ្លុះបញ្ចាំងឲ្យឃើញនូវការយល់ស្របគ្នាតែមួយទៅលើបេតិកភណ្ឌវប្បធម៌ ហើយបច្ចុប្បន្នឥណ្ឌាកំពុងតែជួសជុលប្រាសាទតាព្រហ្មផងដែរ និងសម្លឹងមើលជាបន្តបន្ទាប់ដើម្បីជួសជុលជួយអភិរក្សប្រាង្គប្រាសាទបេតិកភណ្ឌពិភពលោករបស់កម្ពុជាបន្ថែមទៀត។
ឯកឧត្ដមបណ្ឌិត្យសភាចារ្យ សុខ អាន ឧបនាយករដ្ឋមន្ត្រីរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានមានប្រសាសន៍ថា កម្ពុជាមានសក្ដានុពលខ្ពស់លើវិស័យទេសចរណ៍ ហើយអ្វីដែលជាចំណុចសំខាន់របស់កម្ពុជានោះគឺថា ទេសចរណ៍វប្បធម៌ ព្រោះកម្ពុជាមានប្រាង្គប្រាសាទបុរាណដ៏ច្រើនសំបើមណាស់ ហើយគ្រាន់តែប្រាង្គប្រាសាទនៅខេត្តសៀមរាប មានប្រហែលជា១០០ប្រាង្គប្រាសាទ ដូច្នេះឯកឧត្ដមបណ្ឌិត្យសភាចារ្យ សុខ អាន ចង់ឲ្យមានសហប្រតិបត្តិការទេសចរណ៍ និងវប្បធម៌ថែមទៀត ព្រោះកាលណាទេសចរមកកាន់កម្ពុជា ក៏ជាការបើកច្រកនូវការវិនិយោគរបស់ឥណ្ឌាមកកាន់កម្ពុជាផងដែរ។
ឯកឧត្ដមបណ្ឌិត្យសភាចារ្យ សុខ អាន ក៏បានលើកទឹកចិត្តឲ្យមានក្រុមហ៊ុនខ្សែភាពយន្តឥណ្ឌាគឺ Bollywood មកផលិតខ្សែភាពយន្តអំពីរឿងរ៉ាវដែលទាក់ទងសម័យអង្គរ ដែលជាផ្នែកមួយដើម្បីទាក់ទាញឥណ្ឌាមកទស្សនានូវប្រាសាទបុរាណរបស់កម្ពុជា ដូចជាប្រាសាទអង្គរជាដើម។ ឯកឧត្ដមឧបនាយករដ្ឋមន្ត្រី ក៏លើកទឹកចិត្តឲ្យមាននូវការហោះហើរដោយត្រង់ពីឥណ្ឌាមកកាន់កម្ពុជាដើម្បីរួមចំណែកដល់ការដឹកជញ្ជូនភ្ញៀវទេសចរណ៍មកកាន់ប្រទេសកម្ពុជាឲ្យកាន់តែច្រើនថែមទៀត៕
ឯកឧត្ដម Shri Mohammad Hamid Ansari ធ្វើបទបាឋកថា ស្ដីពី”ទំនាក់ទំនងកម្ពុជា-ឥណ្ឌា”
0 Comments