ភ្នំពេញ ៖ នារីម្នាក់ខណៈជិះម៉ូតូចេញពីធ្វើការត្រូវជនមិនស្គាល់មុខ ពីរនាក់ជិះម៉ូតូមកទន្ទឹមគ្នាហើយធ្វើសកម្មភាពឆក់កាបូបនារីរងគ្រោះបានសម្រេច តែជិះម៉ូតូធ្លាក់ជង្ហុកដួលរួចរត់ចោលម៉ូតូបន្សល់ទុកម៉ូតូប្រៀបដូចជាទុកម៉ូតូជាថ្នូរជាមួយរបស់របរជនរងគ្រោះទៅវិញ។
ហេតុការណ៍នេះបានកើតឡើយកាលពីវេលាម៉ោង២០និង៤០នាទីយប់ថ្ងៃទី១៦ ខែកញ្ញា ឆ្នាំ២០១៥ស្ថិតនៅតាមបណ្ដោយផ្លូវបេតុងក្នុងភូមិចំការឪឡឹកសង្កាត់កាកាប ខណ្ឌពោធិ៍សែនជ័យ។
នារីរងគ្រោះឈ្មោះ សុខ លីនដា អាយុ ២៤ឆ្នាំមុខរបរបុគ្គលិកក្រុមហ៊ុនមានស្រុកកំណើតនៅភូមិកំសី ឃុំញ៉ែញ៉ងស្រុក ត្រាំកក់ខេត្ត តាកែវ បច្ចុប្បន្ននេះស្នាក់នៅកន្លែងកើតហេតុខាងលើ។ ជនរងគ្រោះជិះម៉ូតូម៉ាកYamaha fino ពណ៌ស ពាក់ស្លាកលេខភ្នំពេញ1Y1178។ រីឯជនសង្ស័យមានគ្នាពីរនាក់មិនស្គាល់អត្តសញ្ញាណនោះទេ ដោយជិះម៉ូតូម៉ាកHonda ឌ្រីមសេC125 ពណ៌ខ្មៅពាក់ស្លាកលេខភ្នំពេញ1AH8581។
តាមសម្ដីរបស់នារីរងគ្រោះបានឲ្យដឹងថា នៅមុនពេលកើតហេតុខ្លួនបានជិះម៉ូតូម្នាក់ឯងចេញពីធ្វើការក្នុងគោលបំណងវិលត្រឡប់មកផ្ទះវិញនៅពេលជិះមកដល់ចំណុចកើតហេតុស្រាប់តែមានជនសង្ស័យជិះម៉ូតូមួយគ្រឿងមានគ្នាពីនាក់តាមមកពីក្រោយមកដល់ទន្ទឹមគ្នា បានធ្វើសកម្មភាពឆក់យកកាបូបរបស់ជនរងគ្រោះតែម្ដងដែលនៅក្នុងកាបូបនោះមានលុយចំនួន៧៥$លុយខ្មែរ២០០០០៛ទូរស័ព្ទ IPhone 4 មួយគ្រឿង ទូរស័ព្ទណូគាអិនចុចពិលមួយគ្រឿង និងរបស់របរមួយចំនួនទៀត។
តាមសំដីរបស់ឪពុកជនរងគ្រោះដែលបានឃើញហេតុការនេះដែរ ព្រោះកូនស្រីរបស់គាត់បានជិះម៉ូតូជិតមកដល់ផ្ទះទៅហើយ គាត់ក៏បានឃើញជនសង្ស័យជិះម៉ូតូអែបកូនស្រីរបស់គាត់រួចឆក់យកកាបូបពីកូនស្រីរបស់គាត់។ បន្ទាប់ពីគាត់ឃើញសកម្មភាពបែបនេះគាត់ក៏បានជិះម៉ូតូដេញតាមពីក្រោយជនសង្ស័យធ្វើឲ្យជនសង្ស័យភ័យជិះម៉ូតូធ្លាក់ជង្ហុកដួលបាក់កាំម៉ូតូខាងក្រោយ(កាំបន្ទះ)ជិះទៅមុខលែងរួច ក៏ទុកម៉ូតូចោលនៅនឹងកន្លែងដួលនោះ ហើយពួកគេបានបន្តរត់ដោយថ្មើរជើងគេចខ្លួនបាត់ស្រមោល។ ក្រោយពីកើតហេតុនារីរងគ្រោះបានមកដាក់ពាក្យបណ្ដឹងនៅប៉ុស្តិ៍រដ្ឋបាលសង្កាត់កាកាប។ចំណែកឯម៉ូតូបង្កហេតុត្រូវនគរបាលប៉ុស្តិ៍យកមករក្សាទុកជាភស្តុតាងនិងធ្វើរបាយការទុកជាឯកសារក្រែងថ្ងៃណាមួយអាចតាមចាប់ជនសង្ស័យបាន៕
ចោរពីរនាក់ឆក់កាបូបជនរងគ្រោះ បានសម្រេចតែរត់ចោលម៉ូតូ
0 Comments