ភ្នំពេញ ៖ គ្រោះថ្នាក់ចរាចរណ៍ដ៏រន្ធត់មួយបានកើតឡើងនៅលើកំណាត់ផ្លូវជាតិលេខ៣ ដោយរថយន្តហ៊ីយ៉ាន់ដាយ បានបុកគ្នាពេញទំហឹងជាមួយរថយន្តសុំាយ៉ុង ដែលបើកក្នុងទិសដៅបញ្ច្រាសគ្នាបណ្ដាលឲ្យមនុស្សរបួស និងស្លាប់៨នាក់។
ហេតុការណ៍នេះកើតឡើងកាលពីវេលាម៉ោង១២និង៤៥នាទីរសៀលថ្ងៃទី២ ខែតុលា ឆ្នាំ២០១៥ នៅចំណុចភូមិក្រាញ់ឈើនាង ឃុំត្បែង ស្រុកកណ្ដាលស្ទឹង ខេត្តកណ្ដាល នៅលើកំណាត់ផ្លូវជាតិលេខ៣ គីឡូម៉ែត្រ៣២-៣៣។
សមត្ថកិច្ចស្រុកកណ្ដាលស្ទឹងបានឲ្យដឹងថា ករណីគ្រោះថ្នាក់ចរាចរណ៍នេះបង្កឡើងដោយរថយន្ត ហ៊ីយ៉ាន់ដាយភ្លៅ៥ ប្រភេទដឹកស៊ីម៉ងត៍ពណ៌ប្រផេះ ពាក់ស្លាកលេខស្លាកលេខ កំពត 3A,0227 (អ្នកបើកបរគេចខ្លួនបាត់)បានបើកក្នុងទិសដៅពីជើងមកត្បូង ទៅបុកជាមួយរថយន្តម៉ាកសាំយ៉ុង ពាក់ស្លាកលេខកណ្ដាល 0690 ពណ៌ទឹកប៊ិចចាស់ (អ្នកបើកបរស្លាប់) ដែលបើកបរក្នុងទិសដៅ ពីត្បូងមកជើង។ ករណីនេះបណ្ដាលឲ្យមនុស្សរងរបួសធ្ងន់៥នាក់ ត្រូវបានបញ្ជូន ទៅព្យាបាលមន្ទីរពេទ្យលោកសង្ឃ និងស្លាប់បីនាក់ (ប្រុស២ ស្រី១)។
សមត្ថកិច្ចបានបញ្ជាក់ថា មូលហេតុនៃគ្រោះថ្នាក់ចរាចរណ៍នេះ ដោយសារតែអ្នកបើកបររថយន្តដឹកស៊ីម៉ងត៍ខ្វះការប្រុងប្រយ័ត្ន។ ក្រោយពេលកើតហេតុ វត្ថុតាងត្រូវបានបញ្ជូនមករក្សាទុកនៅអធិការដ្ឋាននគរបាលស្រុកជាបណ្ដោះអាសន្ន៕
រថយន្ត២គ្រឿងបុកគ្នាបណ្ដាលឲ្យស្លាប់ និងរបួស៨នាក់រដូករណែលពេញផ្លូវ
0 Comments