បន្ទាយមានជ័យ ៖ ក្រសួងបរិស្ថាន នាព្រឹកថ្ងៃទី២៥ ខែតុលា ឆ្នាំ២០១៥នេះ នៅសាលាស្រុកមង្គលបូរីបាននាំអំណោយជាអង្កចែកជូនដល់ប្រជាពលរដ្ឋក្រខ្សត់ចំនួន១០០គ្រួសារ នៃស្រុកមង្គលបូរីខេត្តបន្ទាយមានជ័យ។
លោក ឡុង ពុន អភិបាលស្រុកមង្គលបូរីបានលើកឡើងថា ដោយពិនិត្យឃើញថា នៅស្រុកមង្គលបូរីមានបងប្អូនប្រជាពលរដ្ឋដែលមានជីវភាពក្រខ្សត់លោកបានចាត់ឲ្យអាជ្ញាធរគ្រប់ឃុំស្រុកយកប្រជាពលរដ្ឋណាដែលពិតជាក្រខ្សត់ក្នុងបាន១០០គ្រួសារមកពីឃុំចំនួន១៣ឃុំ ដើម្បីមកទទួលអំណោយជាអង្កពីឯកឧត្ដមរដ្ឋលេខាធិការក្រសួងបរិស្ថានតំណាងខ្ពង់ខ្ពស់ឯកឧត្ដម សាយ សំអាល់រដ្ឋមន្ត្រីក្រសួងបរិស្ថាន។ អង្កដែលប្រជាពលរដ្ឋទទួលបាន គឺក្នុងមួយគ្រួសារទួលបាន៥០គីឡូក្រាម។
លោក សាប៊ូ អូស្សាណូ រដ្ឋលេខាធិការក្រសួងបរិស្ថានបានមានប្រសាសន៍ផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន និងសម្ដេចកិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន ជូនដល់បងប្អូនដែលលោកទាំងពីរតែងនឹកនាគិតគូរពីសុខទុក្ខ និងការលំបាករបស់បងប្អូន។
លោកបានបន្តទៀតថា ជំនួសមុខឯកឧត្ដម សាយ សំអាល់ រដ្ឋមន្ត្រីក្រសួងបរិស្ថាន ថ្វីបើអំណោយទាំងនេះវាតិចតួចមែន តែវាអាចជួយសម្រួលដល់ការលំបាករបស់បងប្អូនអុំ ពូ មីង បានមួយរយៈពេលដែរ។ ហើយដើម្បីឲ្យជីវភាពកាន់តែល្អប្រសើរ សូមឲ្យមានការខិតខំធ្វើស្រែចម្ការ និងប្រកបរបររកស៊ីផ្សេងៗទាំងអស់គ្នា៕
ពលរដ្ឋ១០០គ្រួសារទទួលបានអំណោយពីក្រសួងបរិស្ថាន
0 Comments