កំពង់ឆ្នាំង ៖ ប្រជាពលរដ្ឋជាង២ពាន់គ្រួសារនៅតំបន់ដីក្រហម ស្ថិតក្នុងឃុំកោះថ្កូវ ស្រុកជលគិរី ខេត្តកំពង់ឆ្នាំងបានសម្តែងនូវការសាទរ និងលែងមានការព្រួយបារម្ភចំពោះការអត់ទឹកប្រើប្រាស់ និងសម្រាប់ធ្វើស្រែប្រាំងទៀតហើយ បន្ទាប់ក្រុមការងារមន្ទីរធនធានទឹក និងឧតុនិយមខេត្តកំពង់ឆ្នាំង ចុះជួយអន្តរាគមន៍បូមយកទឹកពីទន្លេមកបញ្ចូលអាងទាំង១៤ជូនពួកគាត់នៅព្រឹកថ្ងៃទី២៤ ខែតុលា ឆ្នាំ២០១៥នេះ។
លោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្តកំពង់ឆ្នាំងបានឲ្យដឹងថា ឃុំកោះថ្កូវ គឺជាឃុំមួយដែលមានផ្ទៃដីស្រែប្រាំងធំជាងគេនៅក្នុងខេត្តកំពង់ឆ្នាំង ហើយប្រជាពលរដ្ឋក្នុងឃុំប្រមាណ៩៨ភាគរយ ជាអ្នកប្រកបមុខរបរធ្វើស្រែប្រាំង។ ទឹកសម្រាប់ប្រើប្រាស់ប្រចាំថ្ងៃ និងសម្រាប់ស្រោចស្រពស្រូវប្រាំងនៅតំបន់នេះ គឺពឹងផ្អែកទៅលើអាងទឹកដែលមានសរុបចំនួន១៤។ ដោយសារទឹកទន្លេឆ្នាំនេះតូចបានធ្វើឲ្យបណ្តាអាងទឹកទាំងនេះពុំមានទឹកហូរចូលដូចរាល់ឆ្នាំទេ។
លោកប្រធានមន្ទីរបានបន្តថា ការងារបូមទឹកបញ្ចូលអាងទាំង១៤ខាងលើ គឺយើងប្រើប្រាស់ម៉ាស៊ីនបូមទឹកខ្នាតធំ ប្រភេទ៦៥សេស ចំនួន១១គ្រឿង ដើម្បីបូមយកទឹកពីទន្លេមកបញ្ចូលក្នុងអាងទឹកចំនួន១២ ឯអាងទឹកចំនួន០២ផ្សេងទៀត ប្រើប្រាស់ម៉ាស៊ីនតូចៗរបស់ប្រជាកសិករសរុបចំនួន៥២គ្រឿង ដោយយើងផ្តល់ប្រេងជូនពួកគាត់៕
កសិករស្រុកជលគិរី លែងព្រួយបារម្ភពីការអត់ទឹកប្រើប្រាស់ និងធ្វើស្រែប្រាំង
0 Comments