កំពង់ស្ពឺ ៖ បុរសម្នាក់បានឈ្លោះប្រកែកគ្នាជាមួយប្រពន្ធរបស់ខ្លួន ហើយប្រពន្ធបានជេរម្រាយធ្វើរូបគេខឹង ក៏ទាញកាំបិតចុងស្រួចគប់ទៅលើប្រពន្ធបណ្ដាលឲ្យត្រូវចំកំប៉េះគូទរងរបួសធ្ងន់ ត្រូវបញ្ជូនទៅសង្គ្រោះនៅមន្ទីរពេទ្យ។
ហេតុការណ៍នេះបានកើតឡើងកាលពីថ្ងៃទី២៤ ខែតុលា ឆ្នាំ២០១៥ វេលាម៉ោង១៥និង៣០នាទី រសៀល ស្ថិតក្នុងភូមិអង្គ ឃុំរុងរឿង ស្រុកឧដុង្គ ខេត្តកំពង់ស្ពឺ។ អំពើហិង្សាក្នុងគ្រួសារនេះបង្កឡើងដោយបុរសជាប្តីឈ្មោះយ៉ាត យឿង ភេទប្រុស អាយុ៣៧ឆ្នាំ មានស្រុកកំណើតភូមិគោកសណ្ដែក ឃុំក្រាំងចេក ឧដុង្គ ខេត្តកំពង់ស្ពឺ។
សមត្ថកិច្ចបាននិយាយថា មុនពេលកើតហេតុពួកគេ២នាក់ប្តីប្រពន្ធ បានឈ្លោះប្រកែកគ្នា ហើយប្រពន្ធបានជេរម្រាយ ធ្វើឲ្យបុរសជាប្តីខឹង ក៏ទាញកាំបិតចុងស្រួច គប់ទៅលើប្រពន្ធឈ្មោះ ឃុន រីន អាយុ៣៦ឆ្នាំ ចំកំប៉េះគូទខាងឆ្វេងបណ្ដាលឲ្យរងរបួសធ្ងន់បញ្ជូនទៅពេទ្យបង្អែកកំពង់ស្ពឺ។
បច្ចុប្បន្នជនរងគ្រោះត្រូវបានបងប្អូនដឹកទៅសង្គ្រោះនៅមន្ទីរពេទ្យ។ ចំណែកបុរសជាប្តីត្រូវបានសមត្ថកិច្ចឃាត់ខ្លួន៕
ខឹងប្រពន្ធជេរប្រមាណទាញកាំបិតចុងស្រួចគប់ត្រូវកំប៉េះគូទរបួសធ្ងន់
0 Comments