ស្ទឹងត្រែង ៖ ឡានបែនដឹកដីបន្លំដឹកឈើប្រណិតនៅពេលយប់ ត្រូវបានកម្លាំងកងរាជអាវុធហត្ថបង្ក្រាបកាលពីវេលាម៉ោង១១និង៣០នាទីយប់ ថ្ងៃទី០១ ខែតុលា ឆ្នាំ២០១៥ នៅលើកំណាត់ផ្លូវជាតិលេខ៧ ត្រង់ចំណុចគីឡូ៦ ស្ថិតក្នុងភូមិរាជានុកូល សង្កាត់/ក្រុងស្ទឹងត្រែង។
មន្ត្រីអាវុធហត្ថបានឲ្យដឹងថា រថយន្តបែនដឹកឈើខាងលើនេះបានសកម្មភាពដឹកឈើចេញពីចំណុចជិតគល់ស្ពានមេគង្គ ស្ថិតក្នុងភូមិបាចុង សង្កាត់ព្រះបាទ ក្រុងស្ទឹងត្រែង។
ក្រោយពីមានសេចក្ដីរាយការណ៍ លោកឧត្ដមសេនីយ៍ត្រី អឿង វ៉ាន់ឌី មេបញ្ជាការបានបញ្ជាកម្លាំងចុះស្ទាក់ចាប់បញ្ជូនមកកាន់ទីបញ្ជាការកងរាជអាវុធហត្ថទាំងយប់ និងបានឃាត់ខ្លួនមនុស្ស២នាក់ទៀតផងដែរ។
សមត្ថកិច្ចបានបន្តឲ្យដឹងទៀតថា មនុស្ស២នាក់ដែលពាក់ព័ន្ធនឹងការដឹកជញ្ជូនឈើខុសច្បាប់ខាងលើនេះមាន ១-ឈ្មោះ ព្រាប ចន្ថា ភេទប្រុស អាយុ៣៨ឆ្នាំ (តៃកុងឡាន) មានស្រុកកំណើតភូមិសង្កែ ឃុំសង្កែ ស្រុករំដួល ខេត្តស្វាយរៀង បច្ចុប្បន្នស្នាក់នៅក្រុងស្ទឹងត្រែង និងម្នាក់ទៀតឈ្មោះ ពួន ភេទប្រុស អាយុ៣៨ឆ្នាំ មានទីលំនៅក្នុងភូមិបាចុង សង្កាត់ព្រះបាទ សង្កាត់ក្រុងស្ទឹងត្រែង។
សមត្ថកិច្ចបន្តថា នៅព្រឹកថ្ងៃទី០២ ខែតុលានេះ ត្រូវបានសមត្ថកិច្ចធ្វើកំណត់ហេតុផ្ទេរប្រគល់ឲ្យជំនាញរដ្ឋបាលព្រៃឈើខេត្ត មានរថយន្តកូរ៉េបែនដឹកឈើទម្ងន់ពីតោនកន្លះមួយគ្រឿង និងមនុស្ស២នាក់បញ្ជូនទៅកាន់ខណ្ឌរដ្ឋបាលព្រៃឈើខេត្តដើម្បីចាត់វិធានការបន្តតាមផ្លូវច្បាប់។
មន្ត្រីរដ្ឋបាលព្រៃឈើខេត្តបានឲ្យដឹងថា ឈើដែលបង្ក្រាបបានជាប្រភេទឈើធ្នង់មានមុខកាត់២០គុណនឹង២០ប្រវែង១ម៉ែត្រ២តឹក មានចំនួន១៨៩ដុំ បច្ចុប្បន្នបានរក្សាទុកនៅខណ្ឌរដ្ឋបាលព្រៃឈើខេត្ត ដើម្បីឲ្យម្ចាស់ចូលខ្លួនមកបង់ពិន័យអន្តរកាលទៅតាមច្បាប់ស្ដីពីព្រៃឈើ បើមិនដូច្នោះទេនឹងបញ្ជូនសំណុំរឿងទៅកាន់តុលាការចាត់ការបន្តទៀត៕
ឡានបែនដឹកដីបន្លំដឹកឈើប្រណិតត្រូវបានអាវុធហត្ថបង្ក្រាប
0 Comments