ខ្សែប្រយុទ្ធ Luis Suarez របស់ក្លិបយក្សអេស្ប៉ាញ Barcelona បាននិយាយថា ឆ្នាំដំបូងរបស់គាត់នៅក្នុងទឹកដី Camp Nou ពិតជាអស្ចារ្យខ្លាំងណាស់ ប៉ុន្តែលោកចង់ឈ្នះជើងឯកទាំងនេះ បន្ថែមទៀត ជាមួយក្រុមរបស់លោក Luis Enrique។
កីឡាករស្ថិតនៅក្នុងក្រុមជម្រើសជាតិអ៊ុយរូហ្គាយម្នាក់ បានចូលលេងជាលើកដំបូងឲ្យក្រុម Barcelonaពេលជួបជាមួយក្រុម Real Madrid នៅក្នុងការប្រកួត Clasico ហើយបើគិតមកទល់នឹងចុងសប្តាហ៍នេះ គឺវាមានរយៈពេល ១ ឆ្នាំមកហើយ បើទោះជាគាត់បានមកដល់កាលពីរដូវក្តៅយ៉ាងណាក្តី។ នេះដោយសារតែលោកនៅជាប់បម្រាមមិនឲ្យចូលប្រកួតសម្រាប់ការខាំកីឡាករ Giorgio Chiellini កាលពីលើកមុន។
កីឡាករ Suarez បានបន្តរកបាន ២៥ គ្រាប់ពី ៤៣ ប្រកួតរបស់គាត់ នៅរដូវកាលដំបូង ជាមួយក្លិបរបស់គាត់ ហើយឥឡូវគាត់នឹងគម្រប់ខួប១ឆ្នាំ ពេលជួបជាមួយក្រុម Eibar នៅក្នុងទឹកដី Camp Nou នាថ្ងៃអាទិត្យសប្ដាហ៍នេះ។
លោកបាននិយាយប្រាប់កាសែត Diario SPORT ថា លោកមិនធ្លាប់នឹកស្មានថា ខ្លួនអាចយកឈ្នះជើងឯក ចំនួន៣ នៅក្នុងរដូវកាលដំបូងបែបនេះទេជាមួយក្លិប Barcelona ហើយវាគឺជាមោទនភាពមួយគួរឲ្យស្ញប់ស្ញែងសម្រាប់លទ្ធផលដ៏អស្ចារ្យនេះ។ លោកបានបន្តទៀតថា យើងបានជម្រះឧបសគ្គច្រើនណាស់ តែវាគឺជាឆ្នាំដ៏អស្ចារ្យមួយ វាមិនមែនជាការងាយស្រួលនោះទេ វាពិបាក ហើយស្មុគស្មាញជាទីបំផុត នៅពេលឈ្នះជើងឯកបាល់ទាត់ធំទាំងបីនេះ៕
កីឡាករ Luis Suarez ចង់ឈ្នះជើងឯកជាច្រើនទៀតជាមួយក្លិប Barcelona
0 Comments