ការកើតមានករណីចម្លងកញ្ជ្រឹលមួយនៅតំបន់រ៉ែស្ពាន់ភាគអាគ្នេយ៍ នៃសាធារណរដ្ឋប្រជាធិបតេយ្យកុងហ្គោ បានសម្លាប់មនុស្ស៤២៨នាក់ ហើយបានចម្លងមនុស្សប្រមាណ៣០,០០០នាក់ ចាប់តាំងពីផ្ដើមឡើងនៅឆ្នាំនេះ នេះជាការលើកឡើងដោយសហប្រជាជាតិ។
មានស្លាប់ជាង១០០នាក់ និងមានបន្ថែមជាង១០,០០០ករណីថ្មីនៃការឆ្លងត្រូវបានកត់ត្រា ចាប់តាំងពីពាក់កណ្ដាលខែសីហាមក ពេលដែលអង្គការសហប្រជាជាតិ បានសន្យាផ្ដល់ទឹកប្រាក់២.៤លានដុល្លារសម្រាប់ការប្រយុទ្ធទប់ទល់ទៅនឹងការកើតមានជំងឺកញ្ជ្រឹលនៅអតីតខេត្ដ Katanga ដែលកាលពីពេលថ្មីៗនេះត្រូវបានពុះចែកចេញជាបួនផ្នែក។
ក្រុមជំនួយមនុស្សធម៌បាននិយាយថា ទឹកប្រាក់មិនគ្រប់គ្រាន់ទេ សូម្បីតែផ្លូវក៏ពិបាកធ្វើដំណើរ រួមទាំងសេវាសុខាភិបាលទៀតសោតក៏ខ្វះខាតសម្រាប់ការបើកយុទ្ធនាការចាក់វ៉ាក់សាំុងបង្ការនោះ។
ការកើតមានជំងឺកញ្ជ្រឹលកាន់តែធ្ងន់ ចាប់តាំងពីឆ្នាំ២០១០-១១ ខណៈដែលមនុស្ស១,០៨៥នាក់បានស្លាប់ ហើយប្រមាណ៧៧,០០០នាក់ទៀតរងការចម្លងនៅក្នុងអតីតខេត្ដ Katanga នោះ។
កញ្ជ្រឹលជាជំងឺដែលឆ្លងដោយសារវីរុសអាចបណ្ដាលឲ្យកើតអាការៈស្មុគស្មាញ អាចបាត់បង់ជីវិតបាន ដោយសារតែកើតអាការៈរាករូស ខ្សោះជាតិទឹក រងជំងឺផ្លូវដង្ហើម និងរលាកខួរក្បាល អត្រានៃមរណភាពអាចកើតឡើងខ្ពស់រហូតដល់២០ភាគរយនៅក្នុងបណ្ដាប្រទេសក្រីក្រ នេះបើយោងតាមការឲ្យដឹងពីអង្គការវេជ្ជសាស្ដ្រសប្បុរសគ្រូពេទ្យគ្មានព្រំដែន Medecins Sans Fronctieres បើទោះជាតម្លៃវ៉ាក់សាំងត្រឹមតែប្រមាណ១ដុល្លារចំពោះកុមារម្នាក់ក៏ដោយ។
អង្គការសុខភាពពិភពលោក WHO បានព្រមានកាលពីខែវិច្ឆិកា ឆ្នាំទៅមិញថា ភាពចម្រើនជឿនលឿនឆ្ពោះទៅលុបបំបាត់ជំងឺកញ្ជ្រឹលនេះ បានពន្យារពេលទូទាំងពិភពលោក ព្រោះតែខ្វះខាតវ៉ាក់សាំង៕
Reuters
UN ៖ មានស្លាប់ដល់ទៅជាង៤០០នាក់ ដោយសារកញ្ជ្រឹលនៅភាគអាគ្នេយ៍កុងហ្គោ
0 Comments