កំពង់ឆ្នាំង ៖ បុរសជាជនសង្ស័យពាក់ព័ន្ធករណីរំលោភសេពសន្ថវៈម្នាក់ ត្រូវសមត្ថកិច្ចឃាត់ខ្លួន ទៅតាមបណ្ដឹងរបស់នារីរងគ្រោះ ដោយចោទប្រកាន់ថា បានល្បួងយកទៅចាប់រំលោភរហូតបានសម្រេច។ ដែលករណីនេះបានកើតឡើងកាលពីវេលាម៉ោងជិត១២ថ្ងៃត្រង់ ថ្ងៃទី១០ ខែវិច្ឆិកា ឆ្នាំ២០១៥ នៅជើងភ្នំវត្តភ្នំចំពុះ ស្ថិតក្នុងឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចបានឲ្យដឹងថា ជនសង្ស័យដែលសមត្ថកិច្ចធ្វើការឃាត់ខ្លួននេះ មានឈ្មោះ នាម សំណាង ភេទប្រុស អាយុ២៥ឆ្នាំ រស់នៅភូមិបាញ់ឆ្គោល ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។ ចំណែកនារីរងគ្រោះមានឈ្មោះ ហ ស ល អាយុ១៩ឆ្នាំ មានស្រុកកំណើតនៅខេត្តតាកែវ បច្ចុប្បន្នស្នាក់នៅសង្កាត់ប្អេរ ក្រុង/ខេត្តកំពង់ឆ្នាំង។ តាមការរៀបរាប់របស់ជនរងគ្រោះបានប្រាប់ថា នៅមុនពេលកើតហេតុ រូបគេ និងបងស្រីបង្កើតរបស់គេម្នាក់ទៀតបាននាំទៅផឹកស៊ីនៅផ្ទះមិត្តភ័ក្ដិជនសង្ស័យ ក្រោយពីបានផឹកអស់ជិត១កេះមក ជនសង្ស័យឈ្មោះ នាម សំណាង បានបបួលនាងទៅទិញសាច់ក្លែម។ ក្នុងពេលនោះ នាងបានទៅតាមជនសង្ស័យ ដោយគ្រាដំបូងជនសង្ស័យបានឌុបទៅផ្ទះរបស់គេ រួចឌុបបង្ហួសមកវត្តភ្នំចំពុះ នៅពេលទៅដល់ទីនោះ ជនសង្ស័យបានឈប់ម៉ូតូ រួចអូសដៃនាងរងគ្រោះចុះពីលើម៉ូតូចូលទៅក្នុងព្រៃរបោះ បន្ទាប់មកក៏ធ្វើសកម្មភាពចាប់រំលោភរហូតបានសម្រេចតែម្ដង ក្រោយមកបន្ទាប់ពីធ្វើសកម្មភាពចាប់រំលោភរួច នាងក៏បានមកប្តឹងសមត្ថកិច្ចភ្លាមៗតែម្ដង។
នៅចំពោះមុខសមត្ថកិច្ច ជនសង្ស័យឈ្មោះ នាម សំណាង បានសារភាពថា ខ្លួនពិតជាបានរំលោភនារីរងគ្រោះមែន ប៉ុន្តែមិនមែនជាការចាប់បង្ខំនោះទេ គឺជាការត្រូវរ៉ូវគ្នាទាំងសងខាង ប៉ុន្តែដោយសារតែនាងតួចចិត្តនឹងរូបគេនិយាយបង្អាប់ថា មុខនាងមិនស្អាត ហើយបានខឹង ក៏មកដាក់ពាក្យបណ្ដឹងទៅសមត្ថកិច្ចឲ្យចាប់ខ្លួនគេតែម្ដង។
សមត្ថកិច្ចនគរបាលស្រុករលាប្អៀរកំពុងធ្វើការសាកសួរដើម្បីកសាងសំណុំរឿងបញ្ជូនមកស្នងការដ្ឋាននគរបាលខេត្តកំពង់ឆ្នាំង នៅព្រឹកថ្ងៃទី១១ ខែវិច្ឆិកា ដើម្បីចាត់ការបន្តតាមនីតិវិធី៕
ត្រូវរ៉ូវគ្នាឡើងឋានសួគ៌ ខាងប្រុសបង្អាប់ថាមិនស្អាត ប្តឹងសមត្ថកិច្ចឃាត់ខ្លួន
0 Comments