ភ្នំពេញ ៖ តារាសម្ដែងសិចស៊ីដែលធ្លាប់រងការរិះគន់យ៉ាងស្ពឹកមុខងើបស្ទើរមិនរួច កញ្ញា ដួង ម៉ានិច នៅលើបណ្ដាញសង្គមហ្វេសប៊ុកផ្ទាល់ខ្លួនរបស់នាងថ្មីៗនេះបានបង្ហោះរូបថតដែលជាសកម្មភាពការងារមនុស្សធម៌ជាច្រើនសន្លឹកបង្ហាញឲ្យទស្សនិកជនបានឃើញ និងដឹងជាសាធារណៈក្នុងការចេញមុខជូនអំណោយដល់ចាស់ជរាដែលជួបការលំបាកសម្រាប់ជីវភាពប្រចាំថ្ងៃ។
តាមរយៈរូបថតជាច្រើនសន្លឹកដែលត្រូវបានបង្ហោះនៅលើសង្គមហ្វេសប៊ុក របស់កញ្ញា ដួង ម៉ានិច ពេលនេះគឺសុទ្ធសឹងបង្ហាញឲ្យឃើញពីសមកម្មការងារមនុស្សធម៌ដែលធ្វើឡើងតាមរយៈការយកថវិកា និងសម្ភារៈខ្លះជូនដល់ជនទីទាល់ក្រចាស់ជរា និងជនដែលរស់នៅលើចិញ្ចើមផ្លូវគ្មានទីជំរកពិតប្រាកដជាដើម។ ជាក់ស្ដែងកាលពីថ្ងៃម្សិលមិញ នាង ដួង ម៉ានិច បានប្រមូលអ្នកគាំទ្ររបស់នាងជាច្រើននាក់រៀបចំខ្ចប់បាយដាក់ប្រអប់ និងភេសជ្ជៈព្រមទាំងមានថវិកា ដើម្បីយកទៅជួនដល់ជនអនាថាថា រស់នៅតាមចិញ្ចើមបណ្ដាដងផ្លូវមួយចំនួនក្នុងរាជធានីភ្នំពេញ។
នៅក្នុងសកម្មភាពមនុស្សធម៌នេះគេសង្កេតឃើញថា ទោះបីជាមានការលំបាកនិងនឿយហត់បន្តិចក៏ពិតមែនតែនាងនៅតែមិនមានភាពរារែកក្នុងការបន្តសកម្មភាពមនុស្សធម៌របស់ខ្លួនឡើយ។ ក្នុងនោះក៏មានអ្នកគាំទ្ររបស់នាងខ្លះទៀតដែលបានទៅចូលរួមសកម្មភាពនេះជាមួយ ហើយបានបង្ហាញអារម្មណ៍ថា ចូលរួមកម្មវិធីចែកអាហារ និងថវិកាបន្តិចបន្តួចដល់លោកយាយ លោកតា និងជនអនាថាដេកតាមចិញ្ចើមផ្លូវតាមរយៈមូលនិធិកញ្ញា ដួង ម៉ានិច។ សូមអគុណដល់ការបរិច្ចាគថវិកាផ្ទាល់ខ្លួន និងនាក់ចូលរួមទាំងអស់គ្នា។
តារាសម្ដែងវ័យក្មេង កញ្ញា ដួង ម៉ានិច បានប្រាប់កម្ពុជាថ្មីតាមទូរស័ព្ទនៅម៉ោង៩ព្រឹក ថ្ងៃទី១១ ខែវិច្ឆិកា ឆ្នាំ២០១៥នេះថា នាង និងមិត្តភក្ដិក្នុងសិល្បៈប្រមាណ១០នាក់កាលពីថ្ងៃទី៩ ខែវិច្ឆិកា បានសហការគ្នារៀបចំជាបាយមានចំនួន១២០ប្រអប់ និងមានទឹកផ្លែឈើ ព្រមទាំងថវិកាខ្លះយកទៅដើរចែកជូនដល់ចាស់ជរា និងជនអនាថារស់នៅដេកតាមចិញ្ចើមផ្លូវនានាក្នុងរាជធានីភ្នំពេញដែលសកម្មភាពនេះបានចាប់ផ្តើមតាំងពីវេលាម៉ោង៨ព្រឹករហូតទល់ម៉ោង២យប់ ព្រោះមិនមែនធ្វើតែមួយកន្លែងនោះទេគឺចល័ត។
កញ្ញា ដួង ម៉ានិច បាននិយាយបន្តថា ចំពោះថវិកាដែលនាងបានយកមកធ្វើសកម្មភាពមនុស្សធម៌ពេលនេះគឺបានមកពីការប្រមូលរៃអង្គាសពីមិត្តភក្ដិ និងអ្នកលេងហ្វេសប៊ុកបានចំនួន៤០០ដុល្លារហើយក៏ឆ្លាតឱកាសពេលទំនេរពីការងារសម្ដែងនាំគ្នារៀបចំជាអាហារ និងថវិកាបន្តិចបន្តូច ដើម្បីយកទៅចែកជួនពួកគាត់តែម្តង។ ជាមួយគ្នានេះ ម៉ានិច ក៏មានគម្រោងធ្វើសកម្មភាពមនុស្សធម៌នេះចុះទៅជួយកុមារក្រីក្រគ្មានសៀវភៅសិក្សា និងចាស់ជរាមានជីវភាពក្រលំបាកនៅឯខេត្តបន្ទាយមានជ័យនាអំឡុងខែធ្នូឆាប់ៗខាងមុនផងដែរ៕
ដួង មានិច បង្ហាញសកម្មភាពមនុស្សធម៌ បន្ទាប់ពីរងការរិះគន់ស្លៀកពាក់សិចស៊ី
0 Comments