កំពង់ស្ពឺ ៖ ប្រធានសមាគមស្ត្រីមេផ្ទះ នៃបញ្ជាការដ្ឋានភូមិភាគទី៣ បាននាំយកគ្រឿងឧបភោគបរិភោគ និងសាកសួរសុខទុក្ខដល់កងកម្លាំងដែលឈរជើងតាមបន្ទាត់ព្រំដែនក្នុងឱកាសអបអរសាទរខួបអនុស្សាវរីយ៍លើកទី៦២ ទិវាបុណ្យឯករាជជាតិ ០៩វិច្ឆិកា ឆ្នាំ១៩៥៣ និង៩វិច្ឆិកា ឆ្នាំ ២០១៥ និងថ្ងៃកំណើតកងយោធពលខេមរភូមិន្ទផងដែរ។
ការចុះសួរសុខទុក្ខកម្លាំងយោធាជួរមុខប្រចាំទិសកោះកុងនេះ ដឹកនាំដោយលោកស្រី ពេជ្រ ភារុណ ភរិយារបស់លោកឧត្ដមសេនីយ៍ឯក យឿង សុខុន មេបញ្ជាការរង កងទ័ពជើងគោក និងជាមេបញ្ជាការយោធភូមិទី៣ បានចុះសួរសុខទុក្ខដល់នាយ នាយទាហានរង និងពលទាហាន ដែលកំពុងឈរជើងនៅតំបន់ក្បាលឆាយ ភ្នំ១០០ ស្ថិតក្នុងស្រុកមណ្ឌលស៊ីមា ខេត្តកោះកុង កាលពីថ្ងៃទី០៩ ខែវិច្ឆិកាកន្លងមកនេះ។
លោកឧត្ដមសេនីយ៍ទោ សោម សាមិត្ត មេបញ្ជាការរងភូមិភាគទី៣ប្រចាំទិសខេត្តកោះកុង បានប្រាប់ថា កងកម្លាំងនៅជួរទាំងអស់មានភាពកក់ក្ដៅបំផុតក្នុងការការពារទឹកដីមិនមានបរទេសណាមកឈ្លានពានបាននោះទេ ហើយចំពោះអ្នករស់នៅខាងក្រោយ ក៏មិនបានភ្លេចពីសុខទុក្ខកងកម្លាំងដែលឈរជើងតាមបន្ទាត់ព្រំដែនដែរ។
លោកបន្តថា ដោយសារតែការផ្តល់នូវការលើកទឹកចិត្តទាំងអស់នោះ ទើបកងកម្លាំងនៅតាមព្រំដែនមានការម៉ឺងម៉ាត់ដើម្បីការពារទឹកដី ជាក់ស្ដែងក្នុងឱកាសអបអរសាទរបុណ្យឯករាជជាតិ គម្រប់ខួបលើទី៦២ ថ្ងៃទី០៩វិច្ឆិកា សហគមន៍ស្ត្រីមេផ្ទះ នៃយោធភូមិភាគទី៣ បានដឹកនាំប្រតិភូមួយក្រុមអញ្ជើញជួបសាកសួរសុខទុក្ខ និងការរស់នៅរបស់នាយ នាយទាហានរង និងពលទាហាន ដែលកំពុងបំពេញភារកិច្ចការពារបូរណភាពទឹកដីកម្ពុជា នៅបន្ទាត់ព្រំដែនកម្ពុជា-ថៃ ប្រចាំទិសខេត្តកោះកុង។
លោកបានបញ្ជាក់ថា សភាពការណ៍តាមបន្ទាត់ព្រំដែនរវាងកម្ពុជា-ថៃ នៅខេត្តកោះកុងមានការស្ងប់ស្ងាត់ធម្មតា ហើយការទំនាក់ទំនងគ្នារវាងភាគីទាំងសងខាង បានធ្វើឡើងជាញឹកញាប់ ដើម្បីបង្កភាពស្និទ្ធស្នាលនឹងគ្នា និងការទំនាក់ទំនងការងារផ្សេងៗជាមួយគ្នាយ៉ាងល្អប្រសើរបំផុត។
លោកស្រី ពេជ្រ ភារុណ ប្រធានសមាគមស្ត្រីមេផ្ទះនៃបញ្ជាការដ្ឋាន ភូមិភាគទី៣បានថ្លែងថា គ្រប់កាលៈទេសៈអ្នករស់នៅតំបន់ក្រោយ តែងតែផ្តល់នូវកម្លាំងចិត្ត ស្មារតី ដល់នាយ នាយទាហានរង និងពលទាហានដែលកំពុងឈរជើង តំបន់ជួរមុខរហូត ដើម្បីលើកទឹកចិត្តឲ្យបងប្អូនមានឆន្ទៈកម្លាំងមោះមុតក្នុងការបំពេញភារកិច្ចការពារទឹកដី។
លោកស្រីបន្តថា ឆ្លៀតឱកាសថ្ងៃបុណ្យឯករាជជាតិ០៩វិច្ឆិកា ឆ្នាំ១៩៥៣ និង០៩វិច្ឆិកា ឆ្នាំ២០១៥ គម្រប់ខួបលើកទី៦២នេះ ក្រុមការងារសហគមន៍ស្ត្រីមេផ្ទះភូមិភាគ៣ បាននាំយកការសាកសួរសុខទុក្ខពីថ្នាក់ដឹកនាំ និងផ្តល់ជូនគ្រឿងឧបភោគបរិភោគ មានមីចំនួន១៨៦កេះ ត្រីខកំប៉ុង១០កេះ ប៊ីចេង៣៣គីឡូ ទឹកត្រីដបតូច៥០យួរ ទឹកត្រីប៊ីដុង២០ប៊ីដុង ទឹកក្រូច២០កេះ ស្រាបៀរ៤៥កេះ និងថវិកា៨.៤០០.០០០រៀល សម្រាប់ផ្គត់ផ្គង់ជីវភាពប្រចាំថ្ងៃ។
សូមបញ្ជាក់ថា ក្រោយពីសភាពការណ៍តាមបន្ទាត់ព្រំដែនកម្ពុជា-ថៃ កម្លាំងយោធាភូមិភាគទី ៣ បានដាក់កម្លាំងឈរជើងជួរជាប្រចាំ ហើយសភាពការណ៍មិនសូវជាតានតឹងដូចសមរភូមិខេត្តព្រះវិហារឡើយ និងធ្លាប់មានប៉ះទង្គិចគ្នាបន្តិចបន្តួចដែរ ប៉ុន្តែបច្ចុប្បន្នសភាពការណ៍ជាធម្មតាទេ៕
ប្រធានសមាគមស្ត្រីមេផ្ទះ នៃបញ្ជាការដ្ឋានភូមិយោធភូមិភាគទី៣ នាំយកសម្ភារៈជូនកងទ័ពជួរមុខ
0 Comments