បាត់ដំបង ៖ ក្រុមក្មេងពាលមួយក្រុមដែលមានគ្នាប្រហែល៥នាក់ បានធ្វើសកម្មភាពស្ទាក់កាប់ទៅ លើជនរងគ្រោះម្នាក់ បណ្ដាលឲ្យមានការភ្ញាក់ផ្អើលទាំងយប់ ខណៈដែលទីអារាមនេះមានការដង្ហែអង្គកឋិនទានចូលផង និងបង្កឲ្យរងរបួសជាទម្ងន់។
ហេតុការណ៍នេះបានកើតឡើងកាលពីថ្ងៃទី១០ ខែវិច្ឆិកា ឆ្នាំ២០១៥ វេលាម៉ោង៨និង២៥នាទីយប់ ត្រង់ចំណុចខាងមុខវត្តផ្អៀង ស្ថិតក្នុងភូមិផ្អៀង ឃុំកកោះ ស្រុកមោងឬស្សី ខេត្តបាត់ដំបងដោយកាលពីពេលថ្ងៃ វត្តនេះត្រូវបានពុទ្ធបរិស័ទដង្ហែអង្គកឋិនទានចូលផង ដូច្នេះគណៈកម្មការបានរៀបចំកម្មវិធីរាំលេងកម្សាន្តនៅក្នុងបរិវេណវត្តនាពេលរាត្រី។
ភ្លាមៗនោះដែរ ក៏ស្រាប់តែមានការភ្ញាក់ផ្អើលមួយបានកើតឡើងនៅខាងមុខបរិវេណវត្តដោយបន្សល់នូវយុវជនម្នាក់ដែលដួលដេកនៅក្នុងថ្លុកឈាម ដោយសារតែមានក្មេងពាលមួយក្រុមបានព្រួតគ្នាប្រើកាំបិតកាប់ និងចាក់ទៅលើជនរងគ្រោះរូបនោះ ហើយក៏បាននាំគ្នារត់គេចខ្លួនបាត់អស់។
ជនរងគ្រោះដែលមានឈ្មោះ នាក់ នៅ ភេទប្រុស អាយុ១៩ឆ្នាំ រស់នៅក្នុងភូមិកើតហេតុខាងលើបានរៀបរាប់ទាំងការឈឺចាប់ថា នៅយប់នោះ ខ្លួនបានមកលេងក្នុងវត្តនឹងគេដែរ ដោយសារតែមានអង្គកឋិនបានដង្ហែចូល ប៉ុន្តែនៅពេលដែលខ្លួនដើរចេញពីវត្តបំណងត្រឡប់ទៅផ្ទះវិញនោះ ក៏ស្រាប់តែមានក្រុមក្មេងស្ទាវមួយក្រុមមានគ្នាប្រហែល៥នាក់ប្រដាប់ដោយកាំបិតស្ទើរគ្រប់ដៃ បានដេញកាប់មកលើរូបខ្លួនបណ្តាលឲ្យត្រូវចំក្បាលមួយកន្លែង និងចាក់ចំ ពោះទឹកផ្នែកខាងឆ្វេងមួយកន្លែងផងដែរ រួចពួកវាបាននាំគ្នារត់គេចខ្លួនបាត់អស់តែម្ដង ខណៈដែលមានកម្លាំងនគរបាលមកជួយអន្តរាគមន៍ ដោយកម្លាំងបានបញ្ជូនខ្លួនទៅកាន់មន្ទីរពេទ្យបង្អែកស្រុកមោងឬស្សីដើម្បីសង្គ្រោះ ។
ជនរងគ្រោះបានបង្ហាញអត្តសញ្ញាណជនសង្ស័យចំនួន២នាក់ដែលគេបានស្គាល់ក្នុងចំណោមបក្ខពួកទាំង៥នាក់ គឺឈ្មោះ រុំ ហើយ ភេទប្រុស អាយុ២០ឆ្នាំ និងឈ្មោះ ព្រឿម ភេទប្រុស អាយុ២៣ឆ្នាំ អ្នកទាំងពីរមានមុខរបរធ្វើស្រែ និងរស់នៅភូមិកោះចារ ឃុំមោង។
ដោយឡែក លោក គិត ហ៊ាង អធិការនគរបាលស្រុកមោងឬស្សីបានគូសបញ្ជាក់ថា កន្លងមកក្រុមទាំងពីរនេះធ្លាប់មានទំនាស់នឹងគ្នា ដោយសារតែពួកគេរស់នៅភូមិជាប់គ្នា ដូច្នេះករណីនេះវាអាចជារឿងគំនុំចាស់ក្នុងការតាមសងសឹក ប៉ុន្តែបច្ចុប្បន្ន សមត្ថកិច្ចកំពុងតាមរកមុខសញ្ញាទាំងនេះហើយ ដើម្បីយកមកផ្ដន្ទាទោសតាមផ្លូវច្បាប់៕
ស្ទាក់កាប់គ្នាពេលបុណ្យកឋិនទាន ផ្អើលពេញវត្តទាំងយប់
0 Comments