ក្រសួងពាណិជ្ជកម្មចិន បាននិយាយ កាលពីថ្ងៃសុក្រថា ចិនកំពុងតែវាយតម្លៃអំពីឥទ្ធិពលនៃកិច្ចព្រមព្រៀងពាណិជ្ជកម្មតំបន់ គឺកិច្ចព្រមព្រៀងដៃគូពាណិជ្ជកម្មឆ្លងកាត់ប៉ាស៊ីហ្វិក Trans-Pacific Partnership (TPP) ដែលគាំទ្រដោយអាមេរិក។
ប្រទេសចិន មិនស្ថិតនៅក្នុងចំណោមប្រទេស Pacific Rim ទាំង ១២ នោះទេ ដែលកាលពីខែមុន បានយល់ព្រមលើកិច្ចព្រមព្រៀងពាណិជ្ជកម្ម ដែលជាមហិច្ឆតាធំបំផុតនៅក្នុងជំនាន់មួយនេះនោះ។ កិច្ចព្រមព្រៀងនេះមានរួមបញ្ចូលទាំង ប្រទេសអូស្ត្រាលី និងប្រទេសជប៉ុន នៅក្នុងចំណោមប្រទេសសេដ្ឋកិច្ចផ្សេងៗទៀត ដែលរួមបញ្ចូលគ្នាមានតម្លៃ ២៨ លានលានដុល្លារ។
អត្ថបទទាំងមូលនៃកិច្ចព្រមព្រៀងត្រូវបានចេញផ្សាយ កាលពីថ្ងៃព្រហស្បតិ៍។ ក្រសួងពាណិជ្ជកម្មចិន បាននិយាយនៅក្នុងសេចក្ដីថ្លែងការណ៍ដ៏ខ្លីមួយថា ចិនបានកត់សម្គាល់ឃើញថា ខ្លឹមសារនៃកិច្ចព្រមព្រៀងត្រូវបានចេញផ្សាយ និងត្រូវបានអនុវត្ដទាំងស្រុង ព្រមទាំងការវាយតម្លៃជាប្រព័ន្ធអំពីឥទ្ធិពលរបស់វា។ ក្រសួងនេះមិនបាននិយាយលម្អិតនោះទេ។
រដ្ឋមន្ដ្រីពាណិជ្ជកម្មចិន បានឱ្យដឹង កាលពីខែមុនថា ប្រទេសចិន មិនមានអារម្មណ៍ថា ត្រូវបានតម្រង់គោលដៅដោយកិច្ចព្រមព្រៀង TPP នោះទេ ប៉ុន្ដែមុខជានឹងវាយតម្លៃអំពីឥទ្ធិពលនៃកិច្ចព្រមព្រៀងនេះឲ្យបានស៊ីជម្រៅមិនខាន។ ក្រុងប៉េកាំង បានជំរុញកិច្ចព្រមព្រៀងពាណិជ្ជកម្មរបស់ខ្លួនផ្ទាល់ គឺកិច្ចព្រមព្រៀងដៃគូពាណិជ្ជកម្មសេដ្ឋកិច្ចទូលំទូលាយតំបន់ RCEP ជាកិច្ចព្រមព្រៀងតំបន់ពាណិជ្ជកម្មសេរី ដែល ១៦ ប្រទេសបានស្នើឡើង និងជាប្លុកធំបំផុតរបស់ពិភពលោក ដែលរួមបញ្ចូលប្រជាជនចំនួន ៣.៤ ពាន់លាននាក់។
RCEP ដែលនឹងរួមមានប្រទេសនៅក្នុងសមាគមប្រជាជាតិអាស៊ីអាគ្នេយ៍ចំនួន ១០ បូកទាំងប្រទេសចិន ឥណ្ឌា ជប៉ុន កូរ៉េខាងត្បូង អូស្ដ្រាលី និងណូវែលហ្សេឡង់ផង គឺជាគម្រោង ដែលគាំទ្រដោយក្រុងប៉េកាំង ដែលបានទទួលនូវភាពលេចធ្លោថា ជាជម្រើសផ្សេងមួយទៀត ចំពោះផែនការរបស់អាមេរិក។
TPP មានបំណងដើម្បីកាត់បន្ថយរបាំងពាណិជ្ជកម្ម និងកំណត់ស្ដង់ដាររួមមួយ ចាប់ពីប្រទេសវៀតណាម ទៅដល់ប្រទេសកាណាដា។ ប៉ុន្ដែកិច្ចព្រមព្រៀង TPP នេះ ក៏ត្រូវបានគេចាត់ទុកថា ជាមធ្យោបាយមួយដើម្បីប្រឆាំងតបចំពោះឥទ្ធិពលសេដ្ឋកិច្ច និងនយោបាយដែលកាន់តែមានជោគជ័យរបស់ចិននោះផងដែរ៕
Reuters
ចិន និយាយវាយតម្លៃអំពីឥទ្ធិពល នៃកិច្ចព្រមព្រៀងពាណិជ្ជកម្មប៉ាស៊ីហ្វិក
0 Comments