សៀមរាប ៖ ពលរដ្ឋទូទាំងខេត្តសៀមរាបឲ្យដឹងថា ពួកគាត់មានការត្រេកអរយ៉ាងខ្លាំងបន្ទាប់ពីទទួលដំណឹងថា រាជរដ្ឋាភិបាលបានសម្រេចបញ្ឈប់ការផ្តល់សិទ្ធិទៅឲ្យក្រុមហ៊ុន សុខ គង់ ក្នុងការប្រមូលថវិកាពីការលក់សំបុត្រនៅតំបន់អង្គរវត្ត ទៅឲ្យរដ្ឋគ្រប់គ្រងវិញ។
ពលរដ្ឋនៅខេត្តសៀមរាបនៅព្រឹកថ្ងៃសុក្រនេះបានឲ្យដឹងថា សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីបានសម្រេចបែបនេះនៅក្នុងកិច្ចប្រជុំគណៈរដ្ឋមន្ត្រី។ សម្តេចបានបញ្ជក់ថា ការដកយកមកគ្រប់គ្រងវិញនេះ ជាកំណែទម្រង់មួយ ហើយការសម្រេចនេះនឹងចូលជាធរមានចាប់ពីដើមឆ្នាំ២០១៦នេះតទៅ។
លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរអប្សរា បានឲ្យដឹងនៅរសៀលថ្ងៃទី០៦នេះថា សម្តេច អគ្គមហាសេនាបតីតេជោហ៊ុន សែន នាយករដ្ឋមន្ត្រីបានសម្រេចនៅក្នុងកិច្ចប្រជុំគណៈរដ្ឋមន្ត្រី កាលពីព្រឹកថ្ងៃទី០៦នេះថានឹងដកសិទ្ធពីក្រុមហ៊ុន សុខាអូតែលដែលបានទទួលសិទ្ធិលក់សំបុត្រនៅតំបន់អង្គរ មកឲ្យរាជរដ្ឋាភិបាលគ្រប់គ្រងវិញ។
លោកបន្តថា ក្រសួងសេដ្ឋកិច្ចនិងហិរញ្ញវត្ថុជាអន្តរក្រសួងរៀបចំគណៈកម្មាធិការនេះ។ លោកបញ្ជាក់ថា ចំណែកកាងាររបស់អាជ្ញាធរអប្សរាមានតួនាទីដដែលគឺមិនមានអ្វីផ្លាស់ប្តូរនោះទេ។
លោកបន្ថែមថា តាមការជាក់ស្តែងការងារកាន់តែល្អប្រសើរសម្រាប់រាជរដ្ឋាភិបាលដែលបានសម្រេចចិត្តយ៉ាងត្រឹមត្រូវដើម្បីបង្កើនថវិការបស់ជាតិឲ្យកាន់តែកើនឡើង។ ជាមួយគ្នានោះដែរលោកឃឹម ប៊ុនសុង អភិបាលខេត្តសៀមរាបបានមានប្រសាសន៍ប្រាប់កម្ពុជាថ្មី តាមទូរស័ព្ទ នៅរសៀលថ្ងៃទី០៦នេះថា ក្នុងនាមអាជ្ញាធរខេត្តលោកមានការគាំទ្រនិងពេញចិត្តទៅនឹងចំណាត់ការរបស់ សម្តេច អគ្គមហាសេនាបតីតេជោហ៊ុនសែននាយករដ្ឋមន្ត្រីដែលបានសម្រេចដកសិទ្ធិពីក្រុមហ៊ុន សុខ គង់ ដើម្បីឲ្យរដ្ឋ ជាអ្នកគ្រប់គ្រងលើការលក់សំបុត្រនៅតំបន់អង្គរ។
សូមរំលឹកថា ក្រុមហ៊ុន សុខ គង់ ដែលបានទទួលសិទ្ធិគ្រប់គ្រងចំណូលអង្គរវត្តតាំងពីឆ្នាំ១៩៩៩ ហើយនៅដើមឆ្នាំ២០១៦នេះនឹងត្រូវប្រគល់សិទ្ធិឲ្យរដ្ឋជាអ្នកគ្រប់គ្រងវិញ៕
ពលរដ្ឋសាទរទៅនឹងការសម្រេចដកសិទ្ធិពី ក្រុមហ៊ុន សុខ គង់ ក្នុងការប្រមូលថវិកាពីការលក់សំបុត្រអង្គរវត្ត
0 Comments