បាត់ដំបង ៖ ទំនិញខូចគុណភាពជាច្រើនមុខ ដែលបាននាំឆ្លងដែនមកពីប្រទេសថៃ ត្រូវបានមន្ត្រីសាខាកាំកុងត្រូល សហការជាមួយនឹងកំលាំងជំនាញមួយចំនួន ធ្វើការដុតកម្ទេចចោលនេះបើយោងតាមមាត្រា៥២និងបន្តបន្ទាប់នៃច្បាប់ស្តីពីការគ្រប់គ្រងគុណភាពសុវត្ថិភាពលើផលិតផល ទំនិញ និងសេវា។
ការដុតបំផ្លាញទំនិញខូចគុណភាពនេះគឺបានប្រព្រឹត្តឡើងនៅថ្ងៃទី២២ ខែវិច្ឆិកា ឆ្នាំ២០១៥ វេលាម៉ោង ១០និង៤៥នាទីព្រឹក នៅចំនុចច្រកគីឡូ១៣ ក្នុងតំបន់ភ្នំដី ប្រចាំស្រុកសំពៅលូនខេត្តបាត់ដំបង ដោយសមាសភាពចូលរួមមាន មន្ត្រីសាខាកាំកុងត្រូលខេត្តបាត់ដំបង មន្ត្រីច្រកគីឡូ១៣ នគរបាលវរៈព្រំដែន៨១៧ និងមន្ត្រីសាខាគយប្រចាំច្រកតំបន់ភ្នំដី បានចូលរួមធ្វើការដុតកម្ទេចចោលនូវ ទំនិញមួយចំនួនខូចគុណភាពដែលហួសកាលបរិច្ឆេទប្រើប្រាស់ និងធ្វើឲ្យប៉ះពាល់ដល់សុខភាព។
ក្នុងនោះផងដែរក៏មាន មីកញ្ចប់តូចកូនក្មេង ចំនួន០៨ការ៉ុងធំ ស្មើនិង ២០០គីឡូក្រាម យីហឺ ៣០គីឡូក្រាម នំគ្មានសញ្ញាចំនួន១០០គីឡូក្រាម ស្ករគ្រាប់៧៥ការុង និង៧៥គីឡូក្រាម សរុបស្មើនឹងចំនួន៨០៥គីឡូក្រាម ទំនិញទាំងនេះត្រូវបានផលិតក្នុងប្រទេសថៃហើយបាននាំចូលមកស្រុកសំពៅលូនតាមច្រកទ្វារគីឡូ១៣ ហើយក៏ត្រូវម្កំលាំងសាខាកាំកុងត្រូលឃាត់ជាប់ ខណៈដែលធ្វើការត្រួតពិនិត្យទៅលើមុខទំនិញទាំងនេះរួចមក។
នៅក្នុងឱកាសនោះដែរ លោកពេជ្រ ប្រាថ្នា អនុប្រធានសាខាកាំកុងត្រូលខេត្តបាត់ដំបងបានគូសបញ្ជាក់ថា ជានិច្ចកាលកម្លាំងរបស់លោក តែងតែឃ្លាំចាំមើល និងត្រួតពិនិត្យទៅលើមុខទំនិញដែលផុតកំណត់ និងខូចគុណភាព ព្រោះមុខទំនិញទាំងនេះបើកម្លាំងជំនាញធ្វើការបណ្តែតបណ្តោយ នោះអាចធ្វើឲ្យប៉ះពាល់ដល់សុខភាពអ្នកប្រើប្រាស់ពិសេសគឺប្រជាពលរដ្ឋតែម្តង៕
កាំកុងត្រូលច្រកទ្វារគីឡូ១៣ ដុតកម្ទេចទំនិញខូចគុណភាពមកពីប្រទេសថៃ
0 Comments