មន្ទីរសាធារណការបាននិងកំពុងបន្តការងាររៀបចំសំអាត និងកែលម្អសោភណភាពរាជធានីដើម្បីអបអរសាទរបុណ្យអុំទូកខាងមុខ

ភ្នំពេញ ៖ មន្ទីរសាធារណការ និងដឹកជញ្ជូនរាជធានីភ្នំពេញ នៅថ្ងៃទី២២ ខែវិច្ឆិកានេះ បាននិងកំពុងបន្តលាបកំបោរតាមគល់ឈើ និងលាបស្ពិចត្រូខឿនចិញ្ចើមនៅសួនមុខវិមានសន្តិភាព សួនមុខទីស្ដីការគណៈរដ្ឋមន្ត្រី សួនមុខក្រសួងការពារជាតិ សួនមុខអតីតប៉ុស្តិ៍លេខ៣ រមណីយដ្ឋានវត្តភ្នំ មហាវិថីព្រះនរោត្តម សួនវិមានឯករាជ្យ ដើម្បីអបអរសាទរបុណ្យអុំទូក ដែលនឹងឈានមកដល់នាពេលដ៏ខ្លីខាងមុខនេះ។ ក្រៅពីនេះក៏បានលាបគំនូសចរាចរណ៍ថ្មើរជើង និងបានជួសជុលថែទាំស្លាកសញ្ញាចរាចរណ៍ និងតម្រង់រនាំងដែកផងដែរ។

មន្ត្រីសាលារាជធានីភ្នំពេញបានឲ្យដឹងថា ដើម្បីអបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទី២១-២២ខែ ខែវិច្ឆិកា ឆ្នាំ២០១៥ នេះមន្ទីរសាធារណការរាជធានី បានបន្តលាបកំបោរគល់ឈើ និងលាបស្ពិចត្រូខឿនចិញ្ចើមនៅសួនមុខវិមានសន្តិភាព សួនមុខទីស្តីការគណៈរដ្ឋមន្ត្រី សួនមុខក្រសួងការពារជាតិ សួនមុខអតីតប៉ុស្តិ៍លេខ៣ រមណីយដ្ឋានវត្តភ្នំ មហាវិថីព្រះនរោត្តម សួនវិមានឯករាជ្យ។ ជាផែនការសាលារាជធានីភ្នំពេញ នឹងបន្តលាបនៅសួនមាត់ទន្លេ សួនបទុមវតី និងសួនចន្ទច្ឆាយាបន្ថែមទៀត។

មន្ត្រីរូបនេះបន្តថា នៅថ្ងៃទី២២ ខែវិច្ឆិកា ឆ្នាំ២០១៥ ដដែរនេះដែរ មន្ទីរសាធារណការរាជធានី ក៏បានលាបគំនូសចរាចរណ៍ថ្មើរជើងនៅមុខមន្ទីរពេទ្យកាល់ម៉ែតនៃមហាវិថីព្រះមុនីវង្ស និង១ក្រុមទៀតបានជួសជុលថែទាំស្លាកសញ្ញាចរាចរណ៍ និងតម្រង់រនាំងដែកមហាវិថីសហព័ន្ធរុស្ស៊ីផងដែរ។ជាងនេះទៅទៀតនៅថ្ងៃទី២១-២២ ខែវិច្ឆិកា ឆ្នាំ២០១៥ នេះដែរមន្ទីរសាធារណការរាជធានី បានបោសកើបសំរាម និងកាត់ស្មៅនៅផ្លូវលេខ២០០៤ សឡា និងបានសហការជាមួយសាលាខណ្ឌដូនពេញ កាត់ស្មៅត្រែងដុះនៅជើងច្រាំងទន្លេសាបផងដែរ៕