បាត់ដំបង ៖ នៅវេលាម៉ោង១០និង៤៥នាទីយប់ថ្ងៃទី២២ ខែវិច្ឆិកា ឆ្នាំ២០១៥នេះ មន្ត្រីយោធាម្នាក់បានផ្ទុះអាវុធមួយគ្រាប់ នៅក្នុងបន្ទប់ខារ៉ាអូខេមួយកន្លែងយីហោ«ព្រីនសេស» ស្ថិតក្នុងភូមិរំចេក៤ សង្កាត់រតនៈ ក្រុងរតនៈ ខេត្តបាត់ដំបង បណ្ដាលឲ្យផ្អើលអស់ស្រីៗ និងអ្នកនៅទីនោះ។
សេចក្ដីរាយការណ៍បានឲ្យដឹងថា មន្ត្រីយោធារូបនោះមានឈ្មោះរ័ត្ន សៅបញ្ញា អាយុ៣៦ឆ្នាំ បម្រើការនៅបញ្ជាការដ្ឋានរថក្រោះ ហើយក្នុងពេលកំពុងច្រៀងខារ៉ាអូខេនោះ រូបគេបានបាញ់ចំនួន១គ្រាប់ទៅនឹងជញ្ជាំងខារ៉ាអូខេបណ្ដាលឲ្យមានការភ្ញាក់ផ្អើលយ៉ាងខ្លាំងនៅតំបន់នោះ។ ការបាញ់នេះ គេថាដោយសារតែបាត់ទូរស័ព្ទនៅក្នុងបន្ទប់នោះ។
សេចក្ដីរាយការណ៍បានបន្តថា ក្រោយពីទទួលបានពាក្យបណ្ដឹងពីករណីផ្ទុះអាវុធនេះ កម្លាំងការិយាល័យព្រហ្មទណ្ឌកម្រិតធ្ងន់បានចេញប្រតិបត្តិការចុះទៅឃាត់ខ្លួនបុរសនេះ ខណៈពេលគេកំពុងច្រៀងមានគ្នាចំនួន៣នាក់នៅក្នុងបន្ទប់ខារ៉ាអូខេ«ព្រីនសេស»។ ប៉ុន្តែ២នាក់ទៀតមិនមានពាក់ព័ន្ធនោះទេ។
គួរបញ្ជាក់ថា ប្រមាណ៤ថ្ងៃមុនជននេះត្រូវបានសមត្ថកិច្ចនៃស្នងការដ្ឋាននគរបាលខេត្តឃាត់ខ្លួនម្ដងហើយ ខណៈគេបានដកអាវុធកំញើញលេងនៅក្នុងបន្ទប់ខារ៉ាអូខេដដែលនេះ ដោយពេលនោះកម្លាំងបានយកមកធ្វើការអប់រំ ធ្វើកិច្ចសន្យាហើយក៏ប្រគល់អាវុធឲ្យត្រឡប់ទៅវិញ។ ប៉ុន្តែថ្ងៃនេះស្រាប់តែមានការផ្ទុះអាវុធ ទើបកម្លាំងចុះទៅឃាត់ខ្លួន ហើយបច្ចុប្បន្នកំពុងសាកសួរនៅក្នុងការិយាល័យព្រហ្មទណ្ឌកម្រិតស្រាលនៃស្នងការនគរបាលខេត្តបាត់ដំបង។ ចំពោះនីតិវិធីយ៉ាងណានោះយើងមិនទាន់ទទួលបាននៅឡើយទេ៕
មន្ត្រីយោធាម្នាក់ផ្ទុះអាវុធមួយគ្រាប់ក្នុងបន្ទប់ខារ៉ាអូខេផ្អើលអស់ស្រីៗ និងអ្នកនៅទីនោះ
0 Comments