បន្ទាយមានជ័យ ៖ នេះជារឿងមួយមិនអាចទទួលយកបាននៅក្នុងសង្គមដែលមានកូនប្រុសតិរច្ឆានម្នាក់ខឹងនឹងម្ដាយបង្កើតសុំលុយមិនបាន បានទាញកាំបិតកាប់ក្បាលម្តាយខ្លួនឯងមួយកាំបិតបណ្ដាលឲ្យបែកដេរអស់១៨ថ្នេរ។ ហេតុការណ៍នេះកើតឡើងនៅវេលាម៉ោង១០ព្រឹកថ្ងៃទី២៨ ខែវិច្ឆិកា ឆ្នាំ២០១៥ ស្ថិតនៅភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
មន្ត្រីនគរបាលមូលដ្ឋានក្រុងប៉ោយប៉ែតបាននិយាយថា ក្រោយពេលជនដៃដល់កាប់ទៅលើម្តាយឲ្យរ ងរបួសធ្ងន់រួចមក ត្រូវបានកម្លាំងនគរបាលចាប់ខ្លួនបានភ្លាមៗយកមកអធិការ ដើម្បីសាកសួរផងដែរ ។
មន្ត្រីនគរបាលមូលដ្ឋានបាននិយាយបន្តទៀតថា ជនដៃដល់នោះមានឈ្មោះ អុំ អន ភេទប្រុស អាយុ៣២ឆ្នាំ រស់នៅភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មុខរបរជាកម្មករ ដោយឡែកស្ត្រីជាម្តាយនោះមានឈ្មោះ យ៉ន ឈួន អាយុ៤២ឆ្នាំរស់នៅភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត មុខរបរកម្មករសំណង់ដូចគ្នា ត្រូវបានប្រជាពលរដ្ឋដឹកយកទៅព្យាបាលនៅគ្លីនិកវិសាលសុខ ដើម្បីសង្គ្រោះជីវិតភ្លាមៗផងដែរ។
នៅមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានយកកាំបិតកាប់ទៅលើម្ដាយបង្កើតពិតប្រាកដព្រោះ ខ្លួនខឹងនឹងម្តាយសុំលុយបន្តិចបន្តួចយកទៅទិញស្រាផឹកមិនព្រមឲ្យ។តាមចម្លើយសារភាព និងមានកាំបិតជាភស្តុតាងផងជនសង្ស័យត្រូវបានសមត្ថកិច្ចបញ្ជូនទៅតុលាការ ដើម្បីដាក់ទោសទៅតាមផ្លូវច្បាប់៕
កូនប្រុសតិរច្ឆាន ខឹងសុំលុយម្តាយមិនបានទាញកាំបិតកាប់ក្បាលម្តាយដេរ១៨ថ្នេរ
0 Comments